Read Kok Borok 1 SAMUEL 12 Bible Online

1 SAMUEL 12 - Kok Borok bible

1 SAMUEL 12

¹Samuel bebak Israil bororokno, “Nai di, norok ano samani bebak kókno ang khna kha, ang norokno khoroksa habugra rw kha,” hwnwi sa kha.

²Tei nai di, tabuk habugra norokni swkango himnai, ang khe chakra wng kha tei bwkhnaibo phur kha tei ani bwsarok norokni logi-o, ang sikla phuruni simi tabuk jora norokni swkang swkang him kha.

³“Ang orono tongo, ang mungsa swk hamya khlaima tong khe Subraiyungni bwskango tei bo chongmani habugrani bwskang ano kul di, ang khoroksa swkni musuk tei koraichirkano namani de tong kha? Khoroksa swkno ang bade bandi kha tei khoroksa swkno kuda kusup kha? Ang khoroksa swkni thani rang de chá kha? Abo hai kaisa swk khlaima tong khe ang abórokno kiphilwi rw anw.”

⁴Bororok hai hwnwi sa kha, “Nwng chwngnobo bandi ya, kubo kusup ya tei khoroksani thanibo mungsa na ya.”

⁵Tei bo bórokno, “Subraiyung bai bini chongjak habugra se tini sakki, norok ani thani mungsa phano man li ya,” hwnwi sa kha. Tei bórok hai hwnwi sa kha, “Bo’-no chini sakki.”

⁶Hakhe Samuel bororokno hai hwnwi sa kha, “Au, Subraiyung’-no sakki tongo, bo se Musi bai Aronno chongnai tei norokni chuchusongno ha Ijipni phiyógwi tubunai.

⁷Tabuk abo baino norok thir khe bachaui tong di, norok bai norokni chuchusongno mwthangnani bagwi Subraiyung samung kotorma khlaimano tẃiwi Subraiyungni bwskango norok bai sa lai anw.

⁸Jakob bai bini núkhung ha Ijibo tháng phuru Ijipsarok bórokno kusup kha, hakhe norokni chuchusong Subraiyungni thani chirigwi kap laimani bagwi Subraiyung Musi bai Aronno rohorwi ha Ijipni tubu-ui o ha-o tong rw kha.

⁹Phiya ba bororok Subraiyung bórokni Kaitorno pogwi tháng bai kha; hakhe bo Philistiasarok, Moab bai Siserani habugrarok tei Hajor kamiyungni sengkrakrok norokni chuchusong bai nang lai rwui bórokni yago yaphar kha.

¹⁰Bórok Subraiyungni thani chirik laiwi hai hwnwi sa lai kha, ‘Chwng sumsok khlai kha, tamni hwn ba chwng Subraiyungno yakarwi Bal tei Astartes mwtairokno khulum kha, phiya ba tabuk chwngno chini kena arirokni yakni phiyók ja si di, chwng nono se monnai.’

¹¹Hakhe Subraiyung Jerubal tei Barak,[11] Jepta tei Samuelno rohorwi norokno kena arirokni yakni phiyógwi norokno tong kwchang tong rw kha.

¹²Phiya ba norok Ammonsarokni habugra Nahas norok bai choba nangnani phai phuru Subraiyung norokni Kaitor baithangno bugra wng twtwi se, ‘Chwngno naikolnai habugra khoroksa rw di,’ hwnwi san lai kha.

¹³Tei tabuk nai di omo se norok chongmani habugra, norok sanmani, Subraiyung norokno bono rw kha.

¹⁴Norok khoroknwino habugra tei Subraiyung norokni Kaitorno kiriui bono mon lai khe, bini kókno khna khe tei bini dagimarokno kebeng ya khe bebakno kaham kwrwng wngnai.

¹⁵Phiya ba norok Subraiyungni kók khna ya wng khe, bini dagimarokno kebeng khe Subraiyungbo norok bai norokni habugrano kebengnai.

¹⁶Hakhe tabuk thir khe bachaui tong di, Subraiyung norokni mokol bwskango samung kotor tangmano nai di.

¹⁷Tabuk gom ranani mol ya diba? Ang Subraiyungno uatwi bai phirang rohor di hwnwi sannai, aphuru khe abono nugwi norok bini thani habugra sanwi bwswk sumsok kotorma khlai kha abono saui mannai.”

¹⁸Hakhe Samuel Subraiyungni thani suri kha, Subraiyung uatwi bai phirang a salo’-no rohor kha hakhe bebak bororok Subraiyung bai Samuelno kirijak bai kha.

¹⁹Tei bebak bororok Samuelno hai hwnwi sa kha, “Chwng thwi ya tẃi khe Subraiyung nini Kaitorni thani chini bagwi suri san gra di, chwng habugra sanwi chini sumsokno teibo báng rw kha.”

²⁰Samuel bororokno, “Ta kiri di, norok hamya khlai phano Subraiyungno ta yakar di, bono norokni khá bai’-no mon lai di,” hwnwi sa kha.

²¹Tatal mwtairokni thani ta tháng di, bórok norokno chubauibo man ya, mwthangwibo man ya, tamni hwn ba abórok kubui ya.

²²Subraiyung bini bororokno khibiui rohor ya, tamni hwn ba bo norokno bini sakni borok snamna chong kha.

²³Ang norokni bagwi Subraiyungni thani surimani mwthagwi sumsok khlai glak, abo hai ta wng thung, ang norokno sói tei lama kahamno se phrwngnai.

²⁴Subraiyungno kiriui norokni khá bai sói khe bono mon lai di, bo norokni bagwi samung kotor tangmano muitu khlai di.

²⁵“Phiyba norok haino hai sumsok khlai khe norok bai norokni habugra komor suknai.”