Read Kok Borok 1 SAMUEL 13 Bible Online

1 SAMUEL 13 - Kok Borok bible

1 SAMUEL 13

¹Sol habugra chána cheng phuru bisi ... wng kha teibo ... bisik nwi jora Israilo habugra chá kha.[12]

²Sol Israilni 3,000 bororokno saiwi na kha, Mikmaso tei hathái kami Bethelo 2,000 bororok khe bo bai tong kha tei 1,000 khe Jonathan bai Benjaminni Gibea-o rohor kha tei bororokno khe sak sakni rínogo kiphil rwui rohor kha.

³Jonathan Philistiani sengkrak bokhorokno Geba-o buthar khe bebak Philistiasarok abono khna kha. Hakhe Sol bebak ha gwnangwi tẃitunrokno rohorwi totro kotor khorang khlaiwi Hibrurok khna bai di hwnwi sa rw hor kha.

⁴Bebak Israilsarok Sol Philistiani sengkrak bokhorokno buthar kha hwnwi sajak bai kha, hakhe Philistiasarok bórokno naisler bai kha. Hakhe bororok Gilgalo Solno chubana ringjak bai kha.

⁵Philistiasarok Israilrok bai choba nang laina bagwi kuthum lai kha. Khung 30,000 korai malkhung, khorok 6,000 korai kasanai sengkrak tei twijlang rukungni hasingsa bángma swk sengkrak tongo. Bórok Bethabenni salka babai Mikmaso batham khlai kha.

⁶Hakhe bórok Israilrokno jai khe choprok lai kha baksa hagurungo, baksa hakhor bisingo baksa holong beserrogo baksa mangkhor bisingo, baksa twikhor bisingo huijak bai kha.

⁷Baksa khe Jordan twima bárwi Gad bai Giliad amchoi-o tháng bai kha. Sol khe Gilgalo tong kho, bo bai tong bainairok kirijak baiwi kwlwi bai kha.

⁸Samuel samani hai bo Samuelno aro salsni jora naisingwi tong kha, phiya ba Samuel Gilgalo phai li ya, hakhe bororok Solno yakarwi thángna cheng kha.

⁹Hakhe Sol hai hwnwi sa kha, “Ani oro sókmung yapharma bai khakchang yapharma tubu di.” Hakhe bo sógwi yaphar kha,

¹⁰bo sógwi yapharma páidrobo khe yang Samuel phaiwi sók phai kha. Sol bo bai malaiwi lamjaksokna tháng kha,

¹¹Samuel, “Nwng omo tamo khlai kha?” Hwnwi sa kha. Hakhe Sol hai hwnwi sa kha, “Bororok ano yakarwi tháng baima nuk khe tei nwng’-bo haino chongjakmani salo sók phai li ya tei a bisingo se Philistiasarokbo haino Mikmaso thum lai tongo.

¹²Hakhe ang uansuk kha tabuk le Philistiasarok oro Gilgalo ano choprokna phai bainai kha tei yang ang khe Subraiyungni thani kwplai wngnani se sanjak ya kho, aboni bagwi ang muchung ya phano sógwi yapharmung ma yaphar kha.”

¹³Hakhe Samuel Solno hai hwnwi sa kha, “Nwng butua hai khe samung tang kha. Nwng nini Subraiyung Kaitor dagimano khna li ya, tumung nwng khnama te Subraiyung nini ha Israilrokni saka-o mol brúmni bagwi habugra snam kha mun,

¹⁴tamo khe tabuk nini habugra cháma aswk dwgwi tong glak kha. Subraiyung bini kháni borokno rutugwi na kha tei Bo bono bini bororokni saka-o habugra chongnai. Tamni hwn ba nwng Subraiyungni dagimano khna li ya.”

¹⁵Hakhe Samuel aroni Gilgalni Benjamin amchoini Gibea-o tháng kha. Sol bo bai pal tong bainai bororokno lekhaui nai kha borok khorok dok-ra ká-o.

¹⁶Sol, bini bwsla Jonathan tei bo bai tongnai bororok Benjamin amchoini Geba-o tong lai kha tei Philistiasarok khe Mikmaso batham khlai kha.

¹⁷Philistiani sengkrakrok bodol doltham khe bathamni ongkhorwi tháng lai kha, dolsa khe Sual amchoini Ophra bwkhak tháng lai kha,

¹⁸dolsa khe Bet-horon bwkhak tei bodol dolsa khe hasing panthor bwkhak Jeboim harungni ha ari naikhlaima-o tháng lai kha.

¹⁹Aphuru Israil ha-o khoroksa phano sorni manwi taknai kwrwi kha. “Hibrusarok bórok baithang sengrok tei kolongarok tagwi ta man thung;” hwnwi Philistiasarok sa lai kha.

²⁰Israilrok jotono Philistiasarokni thani se thángwi al chuaimarok, ruarok, chekhrarok[13] ma naui si-o;

²¹ruarok hul rwnani bagwi langon snam phirnani bagwi rang lepsa tei al chuaijaknai hulnani bagwi rang lepnwi nango.[14]

²²Hakhe a choba nang laima salo Sol bai Jonathanno karwi aro tei sengkrakrokni thani tei olonga jatharok mungsa kwrwi kha.

²³Philistiasarok sengkrak bodol dolsa sak mwthangna bagwi Mikmasni bwkhak rohor kha.