Read Kok Borok 1 SAMUEL 15 Bible Online

1 SAMUEL 15 - Kok Borok bible

1 SAMUEL 15

¹Hakhe Samuel Solno, “Subraiyung Israil bini bororokni saka-o nono habugra chongnani bagwi ano se thok phul di hwnwi rohoro; aboni bagwi tabuk Subraiyung tamo sa khna di,” hwnwi sa kha.

²Kwplaisa Subraiyung hai hwnwi sa-o, “Israilrok ha Ijipni ongkhorwi phai phuru bórokno kebengmani bagwi ang Amaleksarokno sátoknai.

³Tabuk thángwi Amaleksarokno swpragwi bórokno tong kwrwi bebak sokomor súk di, bórokno kwthang ta narwk di; chwla, bwrwi, chwrairok, absarok, musukrok, merarok, mangingang tei koraichirkarok bebakno buthar bai di.”

⁴Sol bini sengkrakrokno buthup khe ringwi Telaimo lekhaui nai ba khorok 200,000 Israilni tei khorok 10,000 khe Judani sengkrakrok ká-o.

⁵Sol bini bororok bai Amaleksani kamiyungo tháng laiwi harungo naisingwi tong lai kha.

⁶Sol Kenisarokno hai hwnwi sa kha, “Amaleksarok bai kagwi tháng di, wng ya khe bórok bai baksa norokbo butharjak bainai se, tamni hwn ba Israilrok ha Ijipni yógwi phai phuru norok bórokno khairok kha.” Hakhe Kenisarok Amaleksarokno yakarwi tháng lai kha.

⁷Sol Amaleksarokno ha Ijipni salka bwkhak Habilani simi Sur jora mechen kha.

⁸Bo Amaleksani habugra Agagno kwthangno rom kha tei bororokno khe seng bai buthar bai kha.

⁹Tamo khe Sol tei bini bororok Agagno buthar li ya kaham kaham merarok, musukrok, musuk bwsarok, mera bwsarok tei kahamrokno buthar lai li ya tei hamya, chúk yarokno khe sokomor súk bai kha.

¹⁰Subraiyung Samuelno hai hwnwi sa kha,

¹¹“Ang Solno habugra snamwi belai cha ya khlai kha, bo ani aroni uphilwi tháng kha, ani dagimarokno khna li ya. Samuel belai khe jolijagwi hopung Subraiyungni thani kap kha.”

¹²Teini phung aidrobo Sol bai malaina tháng kha. Sol Karmel kami kotoro tháng kha hwnwi sajak kha. Bo aro sakni bagwi thongla kaisa songchaui Gilgalo tháng kha.

¹³Samuel Solni thani phai khe Sol bono, “Subraiyung nono hamari rw thung! Ang Subraiyungni dagima hai’-no khlai kha,” hwnwi sa kha.

¹⁴Samuel hai hwnwi sẃng kha, “Hakhe tamni ang musukrok pungmani tei merarokni khorang khna?”

¹⁵Sol hai hwnwi sa kha, “Ani bororok Amaleksarokni yakni abórokno tubu kha. Nini Subraiyung Kaitorni thani yapharnani bagwi abórokni bisingo kaham kukrokno na lai kha tei bebakno sokomor súk bai kha.”

¹⁶Hakhe Samuel Solno, “Thak di, tini horo Subraiyung ano tamo sa kha ang saui khna rw anw,” hwnwi sa kha. Sol, “Ano sa di,” hwnwi sa kha.

¹⁷Samuel hai hwnwi sa kha, “Nini sakno nwng mungsa chúk ya hwnwi chong phano nwng Israilrokni bokhorok. Subraiyung nono Israil bosongni habugra chong kha.”

¹⁸Subraiyung nono bebak borok hamya Amaleksarokno sokomor di hwnwi dagiui rohor kha tei bórokno komor súk ya sak choba nangwi di hwnwi sa kha.

¹⁹Nwng tamni Subraiyungni kók khna li ya? Hakhe tamni manwirokno segwi naui Subraiyungni bwskango cha ya samung tang?

²⁰Sol Samuelno hai hwnwi sa kha, “Ang Subraiyungni kók khna kha, bo sama haino ang ongkhorwi thángwi Amaleksani habugra Agagno tubu kha, bebak Amaleksarokno sokomor kha.

²¹Tamo khe ani bororok se kaham kaham merarok, musukrokno Gilgalo Subraiyung nini Kaitorni thani yapharnani bagwi buthar lai ya khe tubu lai kha.”

²²Hakhe Samuel hai hwnwi sa kha, “Subraiyung tamono chajak, sógwi yapharma de tei bini kók khnanani de? Nai di, yapharmani slái bini kók khnamani se ham kugo.

²³Bono kebengmani le danda-baji phunuknairok bai baksano hamya, khá si ya wngmarokbo mwtai khulummani bai baksano sumsok khlaima klai-o. Nwng Subraiyungni kók na li ya wngmani bagwi’-no bo’-bo nono tei habugra ton glak.”

²⁴Hakhe Sol Samuelno hai hwnwi sa kha, “Ang sumsok khlai kha, ang Subraini dagimarok khna li ya tei nini kókbo na li ya. Ang ani bororokno kiriui se bórokni kók ma khna si-o.

²⁵Aboni bagwino tabuk ang nono koi ja-o, ani sumsok nakar si di. Ang Subraiyungno khulumui mannani tẃi khe ang bai baksa kiphilwi phai ja di.”

²⁶Tei Samuel Solno hai hwnwi sa kha, “Ang nwng bai kiphil glak, nwng Subraiyungni kókno normani, Subraiyungbo haino nono Israilrokni saka-o habugra tongmano nor kha.”

²⁷Samuel thángnani bagwi uphil khe Sol bini rí romwi soton khe abo kichik kha.

²⁸Aphuru khe Samuel bono hai hwnwi sa kha, “Subraiyung tini Israil hano nini aroni sichigwi nini slái borok kaham kukno abono rw kha.

²⁹Israilni Chẃngsacha Kaitor tatal wng glak tei khábo slái glak, tamni hwn ba bo borok buya hakhe bini khábo slái glak.”

³⁰Hakhe Sol hai hwnwi sa kha, “Ang sumsok khlai kha, phiya ba tabuk ani bororokni tẃiphangrok tei bebak Israilrokni bwskango ano bórom khlai di, Subraiyung nini Kaitorno khulumui mannani bagwi ang bai pal kiphil di.”

³¹Hakhe Samuel bo bai pal khe tháng kha tei Sol Subraiyungno khulum kha.

³²Aphuru khe Samuel, “Amaleksarokni habugra Agagno oro ani thani tubu di,” hwnwi sa kha. Agag bwkha srangjak khe phai kha tei “Butharjakna ma nangmani yók kha!” hwnwi tong kha.

³³Hakhe Samuel, “Nini seng bai kwbángma bumarokno bwsa kwrwi khlaima hai tabuk nini bumabo bwsa kwrwi wngnai,” hwnwi sa kha. Hakhe Samuel Agagno Gilgalo Subraiyungni bwskango phondrik-phandrak khe tanwi pái kha.

³⁴Aboni ulo Samuel Rama-o tháng kha tei Sol Gibea bini nogo tháng kha.

³⁵Samuel kwthang tong lang sak Solno tei mwkhang nuk li ya, bo Solni bagwi belai bwkha kham kha. Subraiyung Solno Israilni habugra snamwi belai bwkha nang kha.