Read Kok Borok 1 SAMUEL 16 Bible Online

1 SAMUEL 16 - Kok Borok bible

1 SAMUEL 16

¹Subraiyung Samuelno hai hwnwi sa kha, “Nwng bwswk tei Solni bagwi khá khamwi tong sinai? Ang bono Israilni saka-o habugra tongma nor kha. Tabuk nwng bokorongo thok kupulung naui Betlehemo Jisaini thani tháng di, tamni hwn ba ang bini bwslasongni bisingo khoroksano habugra chong kha.”

²Samuel hai hwnwi sa kha, “Ang bahai khe thángnai? Sol abono khna khe ano bo butharnai!” Tei Subraiyung hai hwnwi sa kha, “Musuk bwsa masa na di, hakhe ang Subraiyungno yapharnani bagwi se phai-o hwnwi sa di.

³Yapharma jora-o Jisaino ring di, hakhe nwng tamo khlaina nangno ang nono phunuknai. Ang nono samani borokno nwng habugra wngnani thok ma lunai.”

⁴Samuel Subraiyung samani haino khlai kha tei Betlehemo phai kha, kamiyungni tẃiphangrok kwlwi twtwi bo bai malainani phaiwi hai hwnwi sa phai kha, “Kaham kwrwng khe da phai kha?”

⁵Tei bo hai hwnwi sa kha, “I’n, kahamno, ang Subraiyungno yapharnani bagwi se phai-o. Norok sak sak kwthar wng baiwi ang bai pal phai di. Bo Jisai bai bini bwslasongno kwthar wngwi yapharma-o phainani kobok kha.”

⁶Bórok sók phai khe bo Eliabno nuk khe hai hwnwi uansuk kha, “Bwskango bachaui tongnai bono Subraiyung chongmani wng anw.”

⁷Phiya ba Subraiyung bono hai hwnwi sa kha, “Bini mwkhang bai tormani simi ta naisik di, tamni hwn ba ang bono gosi li ya, tamo khe Subraiyung borok naima hai khe nai ya, borok khe saka saka naisigo, tamo khe Subraiyung khe bwkhano se nai-o.”

⁸Hakhe Jisai bini bwsla Abinadabno ringwi Samuelni bwskango tubu kha. Tamo khe Samuel, “Subraiyung bonobo chong ya kho,” hwnwi sa kha.

⁹Hakhe Jisai Sammano tubu khe Samuel, “Subraiyung bonobo chong ya,” hwnwi sa kha.

¹⁰Abo hai khe Jisai bini khoroksni bwslasongno Samuelni bwskango tubu kha, Samuel Jisaino hai hwnwi sa kha, “Subraiyung abórokni bisingo khoroksano phano se chong ya.”

¹¹Samuel Jisaino hai hwnwi sa kha, “Nini bwsa bebak de oro sók phai bai kha?” Jisai hai hwnwi sa kha, “Tei kusu kuk khoroksa tong kho, phiya ba bo mera se mwrwgwi tongo.” Samuel Jisaino hai hwnwi sa kha, “Bono oro na rw hor di, bo sók phai ya sak chwng achuk lai glak.”

¹²Hakhe Jisai bono na rw hor kha, bo belai chwla kaham, mokolbo naithokma goron gwnang. Subraiyung Samuelno, “Bacha di, bono thok phulwi chong chongthar chong di, omo se ang chongmani,” hwnwi sa kha.

¹³Hakhe Samuel bokorongni thok naui bini takhukrokni bwskango Daudno thok phul kha, a salni simi khe Subraiyungni phola Daudni thani phai kha. Samuel aboni ulo Rama-o kiphilwi tháng kha.

¹⁴Tabuk Subraiyungni phola Solno yakar khe, Subraiyungni aroni phola hamya bono sátok kha.

¹⁵Solni seleng bono hai hwnwi sa kha, “Nai di, Kaitorni aroni phola hamya nono sátogwi tong kha.”

¹⁶Tabuk chwngno dagiui rohor di, chwng budukni tammung bai tam kwrwng borok khoroksa rutugwi anw phola hamya nini saka-o phai phuru khe bo nono tamwi khna rwnai hakhe nwng hamnai.

¹⁷Sol bini selengrokno hai hwnwi sa kha, “Tamnai kwrwng borok khoroksa rutugwi ani thani tubu di.”

¹⁸Sikla khoroksa hai hwnwi sa kha, “Ang Betlehemo tongnai Jisaini bwsla khoroksano belai tamnani kwrwng nuk kha bo belai chwla naithok, choba nang laiwi mannai kókbo saui mano, Subraiyung bini logi-o tongo.”

¹⁹Abo baino Sol Jisaini thani tẃitun rohorwi hai hwnwi sa hor kha, “Mera mwrwknai nini nwsla Daudno ani thani rohor di.”

²⁰Hakhe Jisai bini bwsla Daudno punsa masa, koraichirka saka-o auan kupulung tei bukurni sola kupulung arak naui Solni thani rohor kha.

²¹Daud Solni thani phaiwi, bini samungo hap kha. Sol bono belai hamjagwi bini sílai-patham tẃinai snam kha.

²²Sol Jisaino hai hwnwi sa hor kha, “Ang Daudno belai hamjak kha, bo ani samungo tong si thung.”

²³Aphuruni simi Solni thani Kaitorni aroni phola hamya phai khe, Daud tammung tamwi khna rw khe phola hamya bono yakarwi tháng khe tei uáisa ham phi-o.