Read Kok Borok 1 SAMUEL 18 Bible Online

1 SAMUEL 18 - Kok Borok bible

1 SAMUEL 18

¹Sol bai Daud kók sa laimani pái khe, Solni bwsla Jonathan Daudno mokol thái kha, hakhe sak bai baksa Daudno bo hamjak kha.

²A salni simi Sol Daudno bini thani tong rw kha tei nogo kiphilwi rohor li ya.

³Hakhe Jonathan Daud bai kiching kha lai kha, tamni hwn ba bo bono belai kheno chajak kha.

⁴Jonathan bo chumwi tongmani kamchwlwino khugwi Daudno rw kha tei bini seng, badukhung, chakhla tei bwchango khajaknai bebakno rw kha.

⁵Daud bebak Sol rohorma’-ono samung cha rwui phai-o, hakhe Sol bono bini sengkrak bokhorok snam kha. Abo bai bebak Solni bororok bai selengrok chajak bai kha.

⁶Daud Goliatno butharwi kiphil phuru tei sengkrakrok nogo kiphil khe kami kotoro tong bainai Israilni bwrwirok tammung tam laiwi rwchap laiwi mwsa laiwi Sol bai malainani ongkhorwi phai bai kha.

⁷Bwrwirok tongthok laiwi omo hai khe rwchap lai kha, “Sol borok khorok sasai buthar kha, Daud khe borok khorok chisai buthar kha.”

⁸Hakhe Sol abo bai belai khe jolijagwi hai hwnwi sa kha, “Bórok Daudno khe khorok 10,000 tei ano khe khorok 1,000 se butharo hwn lai-o, bo bugra chánani tei tamo tong si?”

⁹Aphuruni simi khe Sol Daudno naisler kha.

¹⁰Teini salo Kaitorni aroni phola hamya Solno kobol phai khe bini nok bisingo kobor hai khe khúk hamyarok perwi tong kha. Sal brúm tammani hai Daud chongpreng tamwi tong kha, aphuru Sol khe yago koslu tẃijak,

¹¹Sol hai hwnwi uansugwi kolonga sul hór kha, “Ang Daudno chokdeualo yórtharwi rw anw.” Hai phano Daud bini bwskangni uáinwi yógwi tháng kha.

¹²Sol Daudno kirijago tamni hwn ba Subraiyung bini logi-o tongo tei Solno khe ba yakarwi tháng kha.

¹³Hakhe Sol bini bwskangni rohorwi khorok 1,000 sengkrakrokni bokhorok snam kha. Hakhe Daud aroni ongkhorwi thángwi bororokni bwskango phai kha.

¹⁴Tei Daud bebak tangma samung’-no cha kha, tamni hwn ba Subraiyung bo bai pal tongo.

¹⁵Sol Daudni samung chajakmarokno nugwi bono teibo kirijak kha.

¹⁶Daudno bebak Israil bai Judani borok hamjak kha; tamni hwn ba bo bororok bai tháng phai khe tongo.

¹⁷Hakhe Sol Daudno hai hwnwi sa kha, “Iko oro ani sajwk okra Merab, Subraiyungni choba-o ani bwkhak wngwi nang lai khe ang bono nwng bai káinai.” Tamni hwn ba Sol, “Ani yak baithang wng yaui Philistiasarokni yak bai bo kosonjak thung,” hwnwi uansuk kha.

¹⁸Tei Daud Solno hai hwnwi sa kha, “Ang ba sabo ba, Israilni bisingo ani núkhung ba tamo, ang ba habugrani chamari wngna klainai?”

¹⁹Tamo khe Solni sajwk Merab bai Daudno kainani jora sók phai phuru khe Merebno Meholani Adriel bai se kái si-o.

²⁰Solni bwsajwk Mikail Daudno hamjak kha Sol abono khna khe belai chajak kha.

²¹Sol hai hwnwi uansuk kha, “Ang Mikail bai Daudno káinai tei bini khẃi bai khaui Philistiasarokni yago butharnai.” Aboni bagwi Sol tei uáisa Daudno, “Tabuk khe nwng ani chamari wngnai,” hwnwi sa kha.

²²Sol bini selengrokno tepsa khe Daudno hai hwnwi sa di hwnwi dagi kha, “Nai di, ‘Habugra nono belai khe hamjak kha tei bini selengrokbo nono hamjago, aboni bagwi tabuk habugrani chamari wng si di.’ ”

²³Hakhe Solni selengrok o kókno Daudno sa lai khe Daud hai hwnwi sa kha, “Habugrani chamari wngnani ba kisa-misani kók de, ang hai kwrwi tei chúk ya borokni bagwi belai kók kotor ya diba?”

²⁴Seleng Solno Daud hwnmani kókno sa lai kha.

²⁵Sol bórokno abo hai khe Daudno hai hwnwi saui di hwnwi dagi kha, “Habugra káilai pandani bagwi bini kena arirokno yagul sunani sara Philistiasarokni sakurno karwi tei mungsabo san ya.” Abo hai khe Sol Philistiasarokni yago Daudno butharna nai-o.

²⁶Solni selengrok Daudno a kókrok thángwi saui kha. Hakhe bo habugrani chamari wngna chajak kha, jora sók phai ya sini swkang’-no

²⁷Daud bini bororok bai thángwi khorok nwira Philistiasarokno buthar kha, habugrani chamari wngnani bagwi Daud bórokni sakur raui habugrani thani tlangwi lekhaui rwui kha. Hakhe Sol bini bwsajwk Mikail bai Daudno kái kha.

²⁸Sol kaham khe saui man kha Subraiyung Daud bai tongo tei bebak Israilrokbo bono hamjago.

²⁹Aboni bagwi bo teibo Daudno kirijak kha tei kwthang tong langsak bini kena ari wngwi bacha kha.

³⁰Philistiani sengkrakrok choba nang lainani phai khe Solni sengkrakrokni slái Daudni bebak samungno cha kugo; hakhe bini mung kotor wng kha.