Read Kok Borok 1 SAMUEL 19 Bible Online

1 SAMUEL 19 - Kok Borok bible

1 SAMUEL 19

¹Sol Daudno butharnani chongmano bini bwsla Jonathan tei bebak bini selengrokno sa kha. Tamo khe Jonathan Daudno belai khe hamjago.

²Hakhe Jonathan Daudno hai hwnwi sa kha, “Apha nono butharna naiwi tongo, aboni bagwi khwna phungo hus wng di; hakhe tepsa khe kwrẃngsa swgo huijagwi tongwi di.

³Hakhe nwng tongmani panthoro ang ongkhorwi aphani gana-o bachauinai, ang nini bagwi aphani thani kók sa anw, ang mungsa swk khe nono sa anw.”

⁴Jonathan buphani thani Daudni kókno kaham khe hai hwnwi saui kha, “Habugrani seleng Daudni thani sumsok ta khlai di, tamni hwn ba bo nono kebengwi sumsok khlai ya tei bini samungrok nini kahamni bagwi se.

⁵Bo bini langmano yago naui se Philistiasano buthar kha tei Subraiyung Israilrokno kwplai khlai kha. Nwngbo abono nugwi tongthokjak kha, hakhe nwng tamo wngwi ahai’-no borok kaham Daudno butharwi sumsok khlaina nai?”

⁶Hakhe Sol Jonathanni kókno khnaui, “Subraiyung kwthang tong sak bo Daudno buthar glak,” hwnwi swmai tang kha.

⁷Hakhe Jonathan Daudno ring horwi bebak saui rw kha, hakhe Jonathan Daudno Solni thani tubu kha, swkang phuruni hai kheno Daud habugrano mon kha.

⁸Philistiasarok bai tei uáisa choba nang phi kha, Daud bórok bai nang laiwi mechen súk bai kha, hakhe bórok ma khár bai kha.

⁹Salsa Subraiyungni aroni phola hamya Solno kobol phai kha, bini nok bisingo khe yago olonga tẃiwi achugwi tongo, Daud khe tam mung tamwi tongo.

¹⁰Sol bini yakni olonga bai khe Daudno chokdeualo yórtharnani nai kha, tamo khe Daud yók kha. Kol khe chokdeualo yórjak kha tei Daud khárwi tháng kha.

¹¹Aboni horo Sol borok rohorwi teini phungo Daudno butharnani bagwi mwrwk rw kha. Phiya ba Mikal Daudni bihik bono hai hwnwi sa kha, “Tini horo nwng khárwi tong ya khe khwna nwng butharjaknai.”

¹²Hakhe Mikal Daudno tailam tẃi khár rwui rohor kha; tei bo khárwi yók kha.

¹³Mikal mang takjak kaisa naui thuyamo mokholwi kobong kaisa tonwi aboni bokhorogo pun buikhumu bai khobwi rí bai dului ton kha.

¹⁴Sol Daudno tlangnani borok rohor khe, bo lumui tong kha hwnwi Mikal sa kha.

¹⁵Hakhe Sol bórokno hai hwnwi saui rohor kha, “Ang bono butharnani thuyamo khe’-no bono oro tubu di.”

¹⁶Tei tẃitunrok phaiwi nok bisingo habwi nai ba mang takjak se thuyamo mokholjak tei aboni bokhorogo pun buikhumuni kobong snamjak.

¹⁷Sol Mikalno hai hwnwi sẃng kha, “Nwng tamni ano omo hai khe bandiui ani kena arino phiyógwi ma rohor lang?” Mikail Solno hai hwnwi sa kha, “Daud ano sa kha, ‘Nwng ano chuba ya hwn khe ang nono butharnai.’ ”

¹⁸Daud khárwi thángwi Rama-o Samuelni thani phai kha tei Sol bono bebak khlaimani kókrokno saui khna rw kha. Hakhe Daud bai Samuel Naiotho thángwi tongwi lai kha.

¹⁹Nai di, Daud Ramani Naiotho se tongo hwnwi Sol sajak kha.

²⁰Hakhe Sol tẃitun bai khe Daudno naharna rohor kha, aphuru bórok diyarirokni bodol kaisa Samuelno ojama songwi diyarirok thinangni kók sa lai tongmani nuk kha. Subraiyungni phola Solni tẃitunrokno kobol phai khe bórokbo thinangni kók sa lai kha.

²¹Sol abono khna khe teibo kwbáng tẃitun rohor kha, bórokbo abórok bai baksa thinangni kók sa lai kha. Sol omo bai khe uáitham tẃitun rohor kha, abórokbo bórok haino wng phi kha.

²²Hakhe bo sak baithang’-no Rama-o tháng kha, bo Sekuni twikhor kotorma kaisa-o sók phai khe “Samuel bai Daud buro tong?” hwnwi sẃng khe bórok “Naiotho se tongo” hwnwi sa kha.

²³Bo Naiotho thángwi tong phuru Subraiyungni phola bini thanibo kobol phai khe, bo Ramani Naiotho sók phai yasakno thinangni kók saui phai kha.

²⁴Bini rírok khugwi Samuelni bwskango bo’-bo thinangni kók sa kha, sago rí kwrwi khe sapung-hopung klaiwi tong kha, aboni bagwi omo hai khe kók achai kha, “Sol suda de diyari wng kha?”.