Read Kok Borok 1 SAMUEL 2 Bible Online

1 SAMUEL 2 - Kok Borok bible

1 SAMUEL 2

¹Hanna suriui hai hwnwi sa kha, “Subraiyungno tẃi ani bwkha tongthogo; ani phan Subraiyungo tongthogo. Ani kena arirokni bwskango ang tongthogwi rwchap kha, tamni hwn ba ang nini mwthangma-o se tongthogo.”

²Subraiyung hai khoroksa phano kwthar kwrwi, bo hai khoroksa phano kwrwi, chini Kaitor hai kati rwui mannai khoroksabo kwrwi.

³Kung chugui tei kók ta sa si di, tei khúk hamya ta per si di, tamni hwn ba Subraiyung wng kha khá sinai Kaitor tei bebak bororokni samungno buj thumo.

⁴Phan gwnang sengkrakrokni badukhungrok báiwi tháng kha, phiya ba phan kwrwi khe phan man kha.

⁵Bebak chámung kupulung tongmani tabuk chánani ma rutuk kha, phiya ba ok khuinairok tei ok khui li ya bwsa kwrwi bwrwi khoroksni bwsa man kha. Tamo khe bwsa kwbángma bumani bwsa khoroksa phano kwrwi kha.

⁶Subraiyung se butharo tei mwthang phiro; bo bororokno kwthwi ha-o rohoro tei tisa phiro,

⁷Subraiyung se bigrabo khlai-o, gwnangbo khlai-o. Bo hache’-obo kari-o, tei kuchugobo tisa-o.

⁸Bo kwrwirokno hani khocha-o, chúk yarokno bórokni tektoni tisa-o, bo habugrani bwslasongni bayap snamo tei bórom gwnang achukthai-o achuk rw-o, hani thongla khe Subraiyung se, tei bórokni saka-o se hayung snamo.

⁹Bo bini kók khnanairokno mwrwgo; tamo khe borok hamya mwnakma-o ma kwmanai; borok sakni phan bai kwplai wngwi man glak.

¹⁰“Subraiyungni kena arirok phindrik phandrak khe sokomorjaknai; bo chuknohani borokno phirang bai koknai. Subraiyung bebak hayungno buj thumnai, bo bini habugrano phan rwnai, bini chongjak bugrano kwplai khlainai.”

¹¹Hakhe Elkana Rama-o bini nogo kiphilwi tháng kha; tamo khe chwrai Samuel khe Silo’-ono tong rwk kha; tei ochai Elini bising tẃi khe Subraiyungno mon kha.

¹²Elini bwslasong borok cha ya gwja, bórok Subraiyungni kók kisa phano khna lai ya.

¹³Ochairok bai bororokni bisingo raida tongmani wng kha, khoroksa swk yapharmung yaphar khe, ochaini seleng muihanno rugwi tong phuru pwraktham gwnang tharuk tubu-ui phainai.

¹⁴Hakhe karai-o, tosla bisingo eba twk bisingo abo tharuk bai khókchaui manmani bebak muihan ochaini wngo. Abo hai khe Israilrok Silo-o yapharna phainairok khlaijak bai-o.

¹⁵Abono karwi teibo bupham naui hóro sók ya sini ochaini seleng phaiwi yapharnaino hai hwnwi sa phainai, “Ochaini banta sóngnani ano kisa muihanno rw di, bo nini aroni rukjak muihanno yachak glak, kwthwngno se yachago.”

¹⁶Bórok bono hai hwnwi sa kha, “Chwng buphamno hóro sók grana, hakhe nini muchung tẃi na di,” bo, “I’nhi! Ano tabuk se rw di, nwng rw ya khe ang phan khe segwi se nanai!” Hwnwi sa anw.

¹⁷Elini bwsla khoroknwini sumsok Subraiyungni bwskango belai kotorma wng kha, tamni hwn ba bórok abo hai khe Subraiyungni thani yapharmano chokoi-phokoi khlai kha.

¹⁸A jora chwrai Samuel ephod kamchwlwi chumwi Subraiyungno monwi tongo.

¹⁹Bisi brúm brúm bini buma bini banta kamchwlwi snamwi bwsai bai khoroknwi bisini yapharmung yapharna tháng khe abono tlango.

²⁰Hakhe Eli Elkana bai bini bihikno hamari rwui hai hwnwi sa-o, “Bo sanmani hai Subraiyung nono o bwrwini bising tẃi teibo bwsa rw si thung.” Hakhe bórok nogo kiphil lai-o.

²¹Subraiyung Hannano sói’-no hamari rw kha, hakhe bo teibo khoroktham chwla bwsa tei khoroknwi bwrwi bwsa man phi kha. Tei chwrai Samuel Subraiyungni bwskango tor kha-lok kha.

²²Tabuk Eli belai khe chakra wng kha tei Israilrokni thani bini bwslasong khlaimano tei bórok kuthum laiwi rínok duglamo samung tangnai bwrwirok bai suda thu lai chá lai wngmani kóknobo khnaui tongo.

²³Hakhe bo[5] bórokno hai hwnwi sa kha, “Tamni norok abo hai samung tang lai? Ang bororokni khugo norok samung hamya tongmano khna-o.

²⁴Abo hai ta khlai di sajlarok, Subraiyungni bororok abo hai sa lai tongmani cha li ya.

²⁵Borok khoroksa tei borok khoroksani thani sumsok khlai khe Kaitor bono chubaui mano; tamo khe borok khoroksa Subraiyungni thani sumsok khlai khe sabo chubaui mannai?” Tamo khe bórok buphani kók se khna lai li ya, aboni bagwi Subraiyung bórokno butharna bwkha chong kha.

²⁶Tabuk chwrai Samuel tor kha-lok kha, Subraiyung tei bororok bai bo chajak kha.

²⁷Khoroksa diyari Kaitorni aroni Elini thani phaiwi hai hwnwi sa phai kha, “Subraiyung hai hwnwi sa-o, ‘Ang nini chuchusong ha Ijibo Pharaoni thani seleng wngwi tong bai phuru ang sak baithang nukjak kha.

²⁸Bebak Israil bosongni bisingo ang bini núkhungno ani ochai wngnani, háyá-o samung tangnani, satrai sóknani tei ephod[6] chumnani bagwi saiwi na kha tei ang nwphani núkhungno Israilrok yaphar páijak manwino banta rw kha.

²⁹Hakhe tamo wngwi ang bororokni thani sanmano nwng aswk khámai lang? Tei Eli nwng tamni ani slái nwslasongno bórom khlaiwi ani bororok yapharmani kaham kukrokno narwgwi bórokni sak phung rw lang?’

³⁰Abo bai’-no Subraiyung Israilni Kaitor hai hwnwi sa-o, ‘Nini núkhung, nini bosong se mol brúmni bagwi ani ochai wngnai,’ hwnwi swmai tangmani, phiya ba tabuk ang Subraiyung sakhlai-o; ‘Ang bai hakchalo tong thung! tamni hwn ba ano bórom khlainaino se angbo bórom khlai-o, ano sak nang yarokno angbo sak nang glak.

³¹Khna di, jora phaiwi tong kha, ang nini núkhung tei bosongni bebak siklarokno butharwi páinai, hakhe nini núkhungo khoroksa phano chakra borok se tong glak.

³²Hakhe nwng tekto manẃi tei kubun Israilrokno hamari rwmano khámaiwi ma tongnai tei nini núkhungo khoroksa phano chakra khe ma tong glak.

³³Ang ani háyá-o samung tangnai khoroksa nini borokno buthar ya khe narwk anw, bo muktwi ma klainai tei bwkha ma khamnai tei nini núkhungni tong rwkma bororok seng bai butharjak bainai.

³⁴Nini nwsla khoroknwi Hopni bai Phinehasni saka-o wngmani abono nini bagwi mari wngnai, bórok salsa’-ono khoroknwnwi thwi bainai.

³⁵Tei ang khoroksa sói kók khnanai ochai chong anw tei bo ani muchungma tẃi samung tangnai, ang bini bosongno snamnai, bo mol brúm ani chongjak wngnai.

³⁶Phiya nini núkhungo kwthang tong rwknai borok thwgwi’-no bini thani phaiwi rukphai belep lepsa tei auan lepsani bagwi hai hwnwi koi phai anw, “Auan lepsa chánani ano ochaini samung tang rw ja di.” ’ ”