Read Kok Borok 1 SAMUEL 21 Bible Online

1 SAMUEL 21 - Kok Borok bible

1 SAMUEL 21

¹Aphuru Daud Nobo tongnai ochai Ahimelekni thani phai kha, Ahimelek kwlwi twtwi Daud bai malainani ongkhorwi phaiwi hai hwnwi sa kha, “Nwng saichung de? Tamo nini logi-o khoroksabo kwrwi da?”

²Tei Daud ochai Ahimelekno hai hwnwi sa kha, “Ang habugrani samungni bagwi se oro phai-o. Bo ano khlai di hwnmano ‘Kebono ta sa di’ hwnwi dagi kha. Ani logini siklarokno kwrẃngsa-o mungsa samungni bagwi malainani sa kha.

³Hakhe tabuk nini yago tamo chájaknai tong? Ano auan lep ba wng ya khe yago tongmano phano rw gra di.”

⁴Hakhe Ochai Daudno hai hwnwi sa kha, “Ani yago lukuni bagwi auan kwrwi phiya ba auan kwthar simi se tongo, tamo khe bwrwirok bai thujak ya sikla hwn khe simi se cháui mannai,”

⁵Daud hai hwnwi sa kha, “Kubui’-no chwng samungo ongkhorwi thángna hwn khe bwrwirok bai hakchalo tongo tei se ahai’-no samungo ongkhor phurubo ani sengkrakrok kwthar’-no tongo; hakhe tini khe teibo bwswk se kwthar wngno?”

⁶Hakhe ochaibo Daudno auan kwtharno rw kha, tamni hwn ba aro Subraiyungno yapharjak auanno karwi kubun auanrok kwrwi, abono a salo háyá kwtharni norwi kutung kutung auan bai sláiwi tubujakmani.

⁷Doeg mungwi Solni seleng khoroksa Idomsa Subraiyungni samung mungsa swkni bagwi aro tongmani jora; bo Solni mera mwrwknai bokhorok.

⁸Daud Ahimelekno hai hwnwi sẃng kha, “Oro nini thani mungsa koslu eba seng kwrwi de? Habugrani samung dóro kukni bagwi ang ani seng eba mungsa swk aitalrok phano tubu-ui man li ya.”

⁹Hakhe ochai hai hwnwi sa kha, “Nwng Ela harungo Philistiani sengkrak bokhorok Goliatno butharmani seng rí bai duljak khe ephodni uklogo tongo. Nwng tlangna hwn khe abono tlangwi mano, abono karwi le oro tei seng kwrwi.” Daud hai hwnwi sa kha, “Abo hai tei seng kaham buro tongnai? Abono ano rw di.”

¹⁰Hakhe Daud a salo Solni aroni khárwi thángwi Gato tongnai habugra Akisni thani tháng kha.

¹¹Hakhe Akisni seleng bono hai hwnwi sa kha, “Omo bini hani habugra ya diba?” Bono tẃiwi’-no rwchabwi mwsaui hai hwnwi sa lai ya da, “Sol khorok sasai buthar kha; phiya ba Daud khe khorok chisai butharo!”

¹²Hakhe bórokni kókno khnaui Daudni bwkha-o belai khe uanajak kha, hakhe Gatni habugra Akisno belai khe kirijak kha.

¹³Hakhe bo bórokni bwskango bini tongmungno sláiwi kobor hai khe phunuk kha. Bo duglamo ahai’-no rigwi swi trwng kha tei sakni khochairogo khuktwirok yor khlai rwui ton kha.

¹⁴Hakhe Akis bini selengrokno hai hwnwi sa kha, “Nai di, o borok kobor se, hakhe tamni norok bono ani thani tubu lai?

¹⁵Ani oro ba kobor kwrwi diba? Koborsuluk wngmani phunukna bagwi da norok bono ani thani tubu lai? O borok da ani nogo phainai?”