Read Kok Borok 1 SAMUEL 22 Bible Online

1 SAMUEL 22 - Kok Borok bible

1 SAMUEL 22

¹Daud kamiyung Gatni khárwi thángwi Adulamni ganani hagurungo huijagwi kha hwnwi khna khe; bini takhukrok bai núkhungni bororok bini aro tháng lai kha.

²Bwkha báijakrok, lakai suthai gwnangrok tei bwkha kochom yarok bebakno bini thani kuthum lai kha tei bo bórokni tẃiphang wng kha. Abo tẃi khe bórok borok khorok brwira swk wng lai kha.

³Tei Daud aroni khe Moab amchoini Mijpa-o thángwi Moabni habugrano hai hwnwi sa kha, “Kaitor ani bagwi tamo khlaino ang saui man ya sak ani ama bai aphano nini thani tong rw ja di.”

⁴Hakhe Daud bórokno Moabni habugra bai klangwi tháng kha, Daud hagurungo tongwisak bórok arono tong lai kha.

⁵Hakhe diyari Gad Daudni thani phaiwi hai hwnwi sa phai kha, “Nwng oro tei ta tong si di, ha Juda-o tháng di.” Daud aroni khe Heret bolongo tháng kha.

⁶Hakhe Daud bai bini palrokno rutugwi manjak kha hwnwi Sol khna kha, aphuru bo Gibeani kaisa hathái saka-o tamarisk buphang yaphango achugwi tongo, bo yago koslu kongsa tẃijak tei bini selengrok bono kitingwi tong bai-o.

⁷Sol bini gana-o bachaui tongnai selengrokno hai hwnwi sa kha, “Benjaminsarok norok ani kók khna di! Jisaini bwsla norokno panthorrok, angur barirok rw da rwno ba? Tei sengkrak khorok sasairokni eba khoroksararokni bokhorok swda snam langno ba?

⁸Aboni bagwi da norok ano kebeng laiwi hamya chap lai? ani sajla, Jisaini bwsla bai kók kha laimano norokni bere khoroksa phano ano sa ya gwja. Tini angsla ani selengrokno ano butharnani bagwi ampaui tongna bagwi swksaui rwmano nugwi suda norok ano khá sajak bai li ya gwja.”

⁹Hakhe Solni selengrok bai bachaui tongnai Idomni Doeg hai hwnwi sa kha, “Ang Jisaini bwslano Nobo tongnai Ahitubni bwsla Ahimelekni thani thángma nuk kha;

¹⁰tei bo Jisaini bwslano tẃi Subraiyung tamo nai abono sẃng kha, bono chámung-nungmungrok rw kha phiya Philistia Goliatni sengnobo rw kha.”

¹¹Hakhe, habugra Sol Ahitubni bwsla ochai Ahimelekno tei bini sandairokno tei Nobo tong bainai ochairok bebakno ring rw hor kha; hakhe bórok jotono habugrani thani phai lai kha.

¹²Phiya Sol, “Khna di, Ahitubni sajla!” Hwnwi sa kha. Bo hai hwnwi sa kha, “Tamo bugra.”

¹³Sol bono hai hwnwi sẃng kha, “Tamo wngwi Jisaini sajla bai nwng ano kebengwi hamya chap lai? Bo ano kebengwi bachaui man thung hwnwi tamni nwng bono chámung tei seng ma rw? Tei bini bagwi Kaitorni thani kaham hamya ma sẃng?”

¹⁴Hakhe Ahimelek habugrano hai hwnwi sa kha, “Nini selengrokni bisingo nwchamari Daudni slái tei kók narwknai sabo tong? Bo le nono mwrwknai tẃiphang bokhorok,[22] tei nini núkhungo bebak bai’-no bórom khlaijago.

¹⁵Ang ba tini simi bini bagwi Kaitorni thani kaham hamya naimani wng ya bla? Ahai ya, abórokno nini o seleng eba nini o selengni núkhungni bororok mungsa phano saui man ya!”

¹⁶Tamo khe habugra hai hwnwi sa kha, “Ahimelek nwng bai bebak nini sandairok ma thwinai.”

¹⁷Hakhe habugra bini gana-o bachaui tongnai mwrwknaino hai hwnwi sa kha, “Subraiyungni ochairokno buthar di, bórok Daud bai yak tongo, bo khárwi thángjak bórok hwnwi saui manẃi suda ano mungsa phano sa ya gwja.” Phiya ba habugrani selengrok Subraiyungni ochaini saka-o yak tisanani lon li ya.

¹⁸Hakhe Sol Doegno, “Nwng bórokno buthar di!” hwnwi sa kha. Doeg bórok bebak’-no buthar bai kha. Bo a salo charchiba ochaini kamchwlwi chumnai borokno buthar kha.

¹⁹Tei ochairokni kamiyung Nobo tong bainai bebakno buthar bai kha, bwrwirok tei chwlarok chwrairok bai absa kwlwirok musukrok koraichirkarok tei merarokno tanthar bai kha.

²⁰Tamo khe Ahitubni busuk phiya Ahimelekni bwsla Abiathar khoroksa yógwi Daudni aro khárwi tháng kha.

²¹Abiathar Sol bahai khe Subraiyungni ochairokno buthar kha abono sa kha.

²²Hakhe Daud Abiatharno hai hwnwi sa kha, “Ang a salo Doegno aro nuk kheno saui man kha bo Solno saui rwnai hwnwi romwi man kha. Nini bebak sandairok ma thwimani le ani se marja tongo.

²³Ang bai tong di ta kiri di, tamni hwn ba ano butharna nainai le nonobo butharna nai-o: hakhe ang bai tong khe nwng yógwi tongnai.”