Read Kok Borok 1 SAMUEL 23 Bible Online

1 SAMUEL 23 - Kok Borok bible

1 SAMUEL 23

¹Tabuk bórok Daudno sa kha. Nai di Philistiasarok Keilarokno kebengwi choba khlaiwi aroni mai kwtal radropno segwi tlang bai kha.

²Hakhe Daud Subraiyungno hai hwnwi sẃngwi nai kha, “Ang thángwi Philistiasarok bai nang laina da?” Hakhe Subraiyung Daudno “Nwng thángwi Philistiasarok bai nang laiwi Keilano mwthang di” hwnwi sa kha.

³Tamo khe Daudni bororok bono hai hwnwi sa kha, “Chwng oro Judia-o se belai kiri laijak, hakhe Keila-o thángwi Philistiasarok bai choba nang lainani abo tei bwswk se kirimasingcha?”

⁴Hakhe Daud tei uáisa Subraiyungno sẃngwi nai phi kha. Subraiyung bono, “Keila-o tháng di, ang Philistiasarokno nini yago yapharnai,” hwnwi sa kha.

⁵Hakhe Daud bai bini borok Keila-o thángwi Philistiasarok bai choba nang laiwi kwbángmano buthar kha tei bórokni mal-matarokbo tubu lai kha. Abo hai khe Daud Keilani borokno mwthang kha.

⁶Ahimelekni bwsla Abiathar Keila-o Daudni thani khárwi tháng phuru yago ochaini chumma ephod tlango.

⁷Aphuru khe Daud Keila-o phai kha hwnwi Sol sajak kha. Sol hai hwnwi sa kha, “Kaitor bono ani yago yaphar kha, tamni hwn ba bo kami kotor duglamrok hap-lam kholobwi tonjaknai gwnango habwi kwcha kha.”

⁸Hakhe Sol bini jotono’-no Keila-o thángwi choba nang laiwi Daud bai bini bororokno romwi tubunani sakhlai kha.

⁹Sol bono hamya khe chabwi tongmano Daud saui man khe, bo Abiathar ochaino, “Oro ephod tubu di,” hwnwi sa kha.

¹⁰Hakhe Daud hai hwnwi sa kha, “O Subraiyung Israilni Kaitor, ani bagwi Sol Keila-o phaiwi kamiyungno sokomor bainani chabwi tongo hwnwi nini o seleng khna kha.

¹¹Keilani borok ba ano Solni yago yapharwi nai de? Nini seleng khnamani hai Sol phainai de? Subraiyung Israilni Kaitorno ang koi ja-o nini selengno sa ja di” Subraiyung, “Sol phainai,” hwnwi sa kha.

¹²Hakhe Daud hai hwnwi sẃng phi khua, “Keila-o tongnairok ang bai ani bororokno Solni yago yapharnai de?” Subraiyung, “Bórok nono yapharnai,” hwnwi sa kha.

¹³Hakhe Daud bai bini bororok bórok bebagwi dok-ra swk wng anw, Keilano yakarwi bórok thángwi manma-o’-no tháng lai kha. Daud Keilani khárwi tháng kha hwnwi Sol sajak khe bo aro tháng li ya.

¹⁴Hakhe Daud Jip ganani hasing panthorni hathái kami-o huijagwi tong kha. Sol khe bono sal brúmno naitugwi tongo, phiya ba Kaitor Daudno bini yago yaphar li ya.

¹⁵Sol bono butharna ongkhorwi phaimani bagwi Daud belai khe kirijak kha. Jip ganani hasing panthorni Horeso Daud tongo.

¹⁶Jonathan Horeso Daudni thani thángwi Kaitorni bising tẃi bwkha rak rw kha.

¹⁷Jonathan bono hai hwnwi sa kha, “Ta kiri di Sol ani apha nono naitugwi romwi man glak, nwng Israilni habugra wngnai tei ang khe nini yakchu wngnai, abo ani apha kaham kheno saui mano.”

¹⁸Bórok khorok nwi’-no Subraiyungni bwskango swmai tangwi kók kha lai kha, Daud Horeso’-no tong kha, phiya Jonathan khe nogo kiphilwi tháng kha.

¹⁹Jibo tongnairok Gibea-o Solni thani thángwi hai hwnwi sa kha, “Daud chini amchoi Horesni Hakila hachuk saka Jesimonni hasing panthorni salgrabai bwkhago se huijagwi tong ya de ba?

²⁰Hakhe o habugra nini bwkha-o muchungma tẃi khe phai di; bono habugrani yago yapharna khe chini samung.”

²¹Hakhe Sol hai hwnwi sa kha, “Norok ano khásukmani bagwi Subraiyung norokno hamari rw thung.

²²Tháng di, sói khe nai phi di, buro tong biyang tháng kaham khe naiwi di teisabo bono aro nuk nai di; tamni hwn ba bo belai siyan kwrwng hwnwi ang khna kha.

²³Bini huijakthai buro abo kari di, hakhe kiphilwi ano sa phai di; hwn khe ang norok bai thángwi bo aro tong khe ang bono bebak ha Juda bisingni phano wng thung rutugwi karinai.”

²⁴Hakhe bórok Solni slái swkango Jibo tháng lai kha. Aphuru Daud bai bini bororok Jesimonni salgrabai Arabani Maon hasing panthoro se tong lai-o.

²⁵Sol bai bini bororok bono rutuknani tháng lai kha, Daud abono khna khe Maonni holong kupulung hachugo thángwi tongwi kha. Sol abono khna khe Daudno naitugwi tháng kha.

²⁶Sol bai bini bororok khe hachukni babaisa bwkhago tei Daud bai bini bororok khe tei babaisa bwkhago tháng kha, Daud khe Solni yakni khárwi yókna bagwi dophra-káphra wngjak tei Sol bai bini bororok khe bórokni gana-o phaiwi gerepsaui rom laina naijak,

²⁷A jora-o se khoroksa tẃitun phaiwi Solno hai hwnwi sa phai kha, “Dakti phai gra di! Philistiasarok chini ha-o choprok phaina naiwi tong kha.”

²⁸Hakhe, Sol Daudno riphrikmani khibiui Philistiasarok bai nang laina tháng kha. Aboni bagwi’-no abono yókmani holongthai hwnjago.

²⁹Daud aroni Engedi-o thángwi huijakthai-o tongwi kha.