Read Kok Borok 1 SAMUEL 24 Bible Online

1 SAMUEL 24 - Kok Borok bible

1 SAMUEL 24

¹Sol Philistiasarok bai choba nang laiwi kiphilwi phai khe Engedi ganani hasing panthoro se Daud tongo hwnwi sajak kha.

²Hakhe Sol Israilni thamsai kaham kuk sengkrakrokno tlangwi bolongni pun hwnma hathái gana Daud bai bini bororokno rutukna tháng lai kha.

³Lama tẃi tháng te tháng te bo harungo punrokni bathamo sók phai kha, aro hagurung kaisa tongo, Sol aro khina tháng kha. Daud bai bini borok khe a hagurungni bisingo achuk laiwi tong lai-o.

⁴Daudni borok bono hai hwnwi sa kha, “Nai di, omo’-no Subraiyung ‘Ang nini kena arino nini yago yapharnai tei tabuk nwng bono nini muchung tẃi khlai di’ hwnwi samani a salni kók.” Hakhe Daud tepsa khe thángwi Solni kamchwlwi buchuk raui na kha.

⁵Ulo khe Solni kamchwlwi buchuk ramani bagwi Daudni bwkha-o nangjak kha.

⁶Bo bini bororokno hai hwnwi sa kha, “Subraiyungni chongjak, ani bugrani saka-o ani yak tisanani Subraiyung nai li ya, tamni hwn ba bo wng kha Subraiyung bai chongthar chongjak.”

⁷Hakhe Daud bini borokno jai khe kul kha tei Solno kosonna rw li ya. Sol ha gurung yakarwi bini lama-o bo tháng kha.

⁸Aboni ulo khe Daudbo hagurungni ongkhorwi thángwi Solno chirigwi hai hwnwi ring kha, “Ani bugra!” Hakhe Sol uphilwi nai khe Daud bono bórom khlaiwi botok khe klai khulum kha.

⁹Daud Solno, “Tamni nwng ‘Daud nono butharna nai-o hwnwi sanai bororok sa laimano khna?’ Hwnwi sa kha.

¹⁰Nai di, nwng tini nini mokol baithangno nuk kha, Subraiyung hagurungo nono ani yago yapharmani se; hakhe ani bororok baksa nono buthar di hwn kha, phiya ba ang nono koson li ya. ‘Ang bórokno hai hwnwi sa kha, ani bugrani saka-o ani yak tisa glak, tamni hwn ba bo Subraiyung bai chongthar chongjak.’

¹¹Nai di, ani apha, nini kamchwlwi buchukni rí ani yago; ang nono buthar yaui nini kamchwlwi buchukni ríno se ra si-o. Abo bai nwng saui man di, ang ani yak bai nono mungsa hamya khlaina chongma kwrwi. Nwng se ano butharna bagwi rutugwi tong phano ang le nini mungsa hamya se khlai ya.

¹²Subraiyung nwng bai ani bising bujsói khlai thung! tei nwng ano khlaimani bagwi Subraiyung nono yagul su thung; phiya ba ang le nono mungsa khlai glak.

¹³Kógono tongo, ‘Borok hamyani se hamya ongkhoro,’ tamo khe ang le nono yak koson glak.

¹⁴Israilni habugra sabono butharna bagwi ongkhorwi phai? Sabono riphrigwi tong? Nwngba tamo sẃi kwthwinoba tei sitopnoba riphrigwi tong lang?

¹⁵Aboni bagwi Subraiyung nini bai ani bujsói khlaiwi thung. Bo ani samungrokno nugwi ani phaising wngwi ano nini yakni mwthang thung.”

¹⁶Daud Solno o kókrok sa bai khe Sol, “Abo nwng de, ani sajla Daud?” hwnwi saui khorang kotor khe kap kha.

¹⁷Bo Daudno hai hwnwi sa kha, “Nwng ani slái borok ham kugo; tamni hwn ba ang nono hamya khlai phano nwng le ano kaham khlai kha.

¹⁸Tini nwng ano bwswk khe hamjak abono phunuk kha, Subraiyung nini yago ano yaphar phano nwng ano buthar li ya.

¹⁹Khoroksa swk bini kena arino yago manẃi bini mungsa hamya khlai yaui bono yakarwi rwnai hai de? Tini nwng ano omo tẃi khlaimani bagwi Subraiyung nono hamari rw thung.

²⁰Ang tabuk sói saui man kha, nwng Israilni habugra chánai tei Israilni ha nini bising thẃi’-no songchajaknai.

²¹Hakhe Subraiyungni mung bai swmai tangwi sa di, nwng ani ulo ani bosongno sokomor glak tei ani mungno ani aphani núkhungni hu-ui khibi glak.”

²²Daud abono Solni thani swmai tangwi sa kha. Hakhe Sol nogo kiphilwi tháng kha tei Daud bai bini bororok bai khe huijakthai kwrago tháng lai kha.