Read Kok Borok 1 SAMUEL 27 Bible Online

1 SAMUEL 27 - Kok Borok bible

1 SAMUEL 27

¹Daud bini bwkha bising bising hai hwnwi sa kha, “Ang salsa Solni yago ma thwinai; ang Philistia ha-o khárwi thángwi yókmani slái tei kaham kwrwi; hakhe Sol ano Israilo tei rutuk glak, abo hai khe ang bini yakni yóknai.”

²Hakhe Daud tei bini khorok dok-ra borok bai khe Gatni habugra Maokni bwsla Akisni thani tháng lai kha.

³Daud bini núkhungni bebak bororok, bini sengkrakrok, bihik khoroknwirok: Jejrilni Ahinoam tei Karmelni Nabalni bihik randijwk Abigailsong Gatni Akisni thani tongwi lai kha.

⁴Daud Gato khárwi tháng kha hwnwi Sol khna khe, bo tei Daudno rutuk li ya.

⁵Aphuru Daud Akisno hai hwnwi sa kha, “Nini mokolo ano chajak khe, ang tongnani bagwi kami kotor khungsa rw ja di, hakhe ang aro tongwi man anw; tamni bagwi nini o seleng ba nwng bai baksa kamiyungo tongna klainai?”

⁶Hakhe a salo Akis Jiklagno rw kha; aboni bagwi’-no Jiklag khe tabuk jora Judani habugrani klai-o.

⁷Philistia ha-o Daud nokha bisi kaisa tei tal brwi jora tong kha.

⁸Aphuru Daud bai bini borok Gesursa, Girjisa tei Amaleksarok bai thángwi choba nangwi lai-o. Bórok agini simino a amchoi-o Surni simi ha Ijip jora tong bai-o.

⁹Hakhe Daud a hano choprogwi bwrwi chwla bebakno butharwi, merarok musukrok koraichirkarok mangingangrok tei rí-chumrok bebak na baiwi Akisni thani kiphilwi phai kha.

¹⁰Akis Daudno hai hwnwi sẃng kha, “Nwng tini biyango nang lai kha?” Hakhe Daud, “Judani Negeb, Negebni Jeramilsa tei Kenisarok tongmani amchoi-o choprok kha,” hwnwi Daud sa kha.

¹¹Gato thángwi Daud bai bini borok tamo khlai kha abono saui man phai ya tẃi khe bo aroni bebak bwrwi-chwla khoroksano phano kar ya khe buthar bai kha. Daud Philistia-o tong sak abo hai mángno khlai kha.

¹²Hakhe Akis Daudno poito cháui tei bwkha-o hai hwnwi saui tong kha, “Bo sakno katswi bini borok Israilrok bai khibi rwjak kha; aboni bagwi bo ani seleng wng phlai tong sinai.”