Read Kok Borok 1 SAMUEL 28 Bible Online

1 SAMUEL 28 - Kok Borok bible

1 SAMUEL 28

¹A molo Philistiasarok Israilrok bai choba nang lainani bagwi bórokni sengkrakrokno thum lai kha. Hakhe Akis Daudno, “Saui man khna bla, nwng tei nini bororok ang bai pal khe choba-o ma thángnai,” hwnwi sa kha.

²Daud, “Belai kaham, nini seleng tamo khlai man nwng nuk anw,” hwnwi sa kha. Hakhe Akis, “Belai’-no ham kha, ang thwi yasakni bagwi nono ani sak mwrwknai khlainai,” hwnwi sa kha.

³Aphuru khe Samuel thwi kha, bebak Israilrok bini bagwi kap lai kha tei bono bini kamiyung Rama-o phob lai kha. Sol bebak danda-baji phunuknairokno, thikna nainairokno hani rwkhlaiwi rohor bai kha.

⁴Philistiasarokni buthup khe kuthumui Sunemo batham khlai kha; tei Sol bebak Israilrokno thumwi Gilboa-o batham khlai kha.

⁵Sol Philistiasarokni sengkrakrokno nuk khe bo kirijak kha tei bini bwkha belai kwlwijak kha.

⁶Hakhe bo Subraiyungno tamo khlaima cha hwnwi sẃng kha, tamo khe Subraiyung mungsa sa li ya; imang tẃi buya, Urim bai buya eba diyarirokni khúk tẃi buya.

⁷Hakhe Sol bini selengrokno hai hwnwi dagi kha, “Sema naiwi thinangni kók saui mannai bwrwi khoroksano ani oro rutugwi tubu di, hakhe ang bini thani thángwi sẃngwi nai anw.” Bini selengrok hai hwnwi sa kha, “En-doro khoroksa sema nainai tongo.”

⁸Hakhe, Sol tei kubun rí chumwi sakno bui bai sinijak ya tẃi khe horo logi-o borok khoroknwi tlangwi a bwrwini thani tháng kha. Bo bwrwino hai hwnwi sa kha, “Tamo wngno wng ya pholarokno sẃngwi nai di tei ang mung khumani borokni pholano ringwi tubu di.”

⁹A Bwrwi bono hai hwnwi sa kha, “Sol tamo khlai kha, nwng sóino saui mano, bo mwtai manjakrok tei thinangni kók sanairokno Israil hani rwkhlaiwi rohor kha. Hakhe nwng tamo ano butharnani bagwi khẃi thonna nai?”

¹⁰Hakhe Sol swmai tangwi hai hwnwi sa kha, “Subraiyung kwthangni mungwi ang swmai tangwi sa-o, aboni bagwi nono sátokjak glak.”

¹¹Aphuru khe Solno khoroksa bwrwi, “Nini bagwi sabono ringnai?” hwnwi sẃng kha. “Samuelno,” Hwnwi bo sa kha.

¹²A bwrwi Samuelno nuk khe bo khorang kotor khe chirigwi Solno hai hwnwi sa kha, “Tamni nwng ano bandi lang? nwng ba habugra Sol se bla!”

¹³Habugra bono, “Ta kiri di!” hwnwi sa kha. “Nwng tamo nuk?” Hwnwi Sol sẃng khe bwrwi hai hwnwi sa kha, “Ang kaisa mwtaino hani kasaui phaima nuk kha.”

¹⁴Bo bwrwino, “Abo bahai tamono kosol?” hwnwi sẃng kha. Bwrwi hai hwnwi sa kha, “Khoroksa chakra kasaui phaisa kha, bo kamchwlwi lolang chumjak.” Hakhe Sol abo Samuel hwnwi saui man kha tei bo ha-o pwtapsa bolokhógwi khulum kha.

¹⁵Aphuru khe Samuel Solno, “Nwng ano tamni oro tubu-ui tekto ma phnang?” hwnwi sa kha. Sol hai hwnwi sa kha, “Ang belai kirima chá kha, tamni hwn ba Philistiasarok ang bai choba nang lainani phaisa kha, Kaitorbo ano yakar kha tei ano mungsa sa li ya, diyarirokni khúk tẃi buya, imang tẃi bu li ya; omo haini bagwi se ang tamo khlaina nangno hwnwi nono ring horo.”

¹⁶Samuel hai hwnwi sa kha, “Subraiyung se nono yakarwi nini kena ari wng kha hwn khe nwng ano tamni ring hor?

¹⁷Ani bising tẃi khe sama haino Subraiyung nono khlai kha; hakhe Subraiyung nini yakni hano segwi nini ganani Daudno rw kha.

¹⁸Tamni hwn ba nwng Subraiyungni kókno khna li ya, bini jolimano nwng Amaleksarokno phunuk li ya, aboni bagwi Subraiyung nono tini abo hai khlai-o.

¹⁹Subraiyung nono tei Israilrokno Philistiasarokni yago yapharnai; nwng bai nini sajlarok khwna ang bai tongnai; Subraiyung Israilni sengkrakrokno Philistiasarokni yago yapharnai.”

²⁰Hakhe Samuelni sama kókrokno khna khe’-no Sol belai kirima cháui ha-o botok khe klai kha; sapung-hopung mungsa phano chájak yani bagwi bini kisa phano phan kwrwi kha.

²¹Bwrwi Solni thani thángwi nuk kha bo belai kirijak; hakhe bo bono hai hwnwi sa kha, “Nai di ang nini o selengjwk langma yago tẃiwi se nini kókno ma khna kha.

²²Aboni bagwi’-no tabuk nwngbo nini o selengjwkni kókno ma khnanai; ang nini bwskango chámung rw anw. Abono chá di, hakhe nwng nini lama-o thángna bagwi phan man anw.”

²³Sol chána gosi li ya khe tei hai hwnwi sa kha, “Ang mungsa chá glak.” Phiya ba bini selengrok bebakno bono chánani koi kha, hakhe bo bórokni kók khna kha. Hakhe bo hani bachaui thuyamo achuk kha.

²⁴A bwrwini nogo musuk bwsa kuphung masa tongo. Bo abono dodro-dodro ratharwi kha tei auan gungri naui abono sapigwi chuan kwrwi auang snam kha.

²⁵Bo Sol bai bini selengrokni bwskango abono khúrwi rw phai kha, hakhe bórok abono chá lai kha. Hakhe bórok a horo’-no aroni kiphilwi tháng lai kha.