Read Kok Borok 1 SAMUEL 3 Bible Online

1 SAMUEL 3 - Kok Borok bible

1 SAMUEL 3

¹Aphuru chwrai Samuel Elini yakchu-o tongwi Subraiyungno monwi tongo. Tei a jora-o Subraiyungni aroni kók phunukjakmabo báng tha ya.

²Abo hai jora-o Eli mokolbo nuk tha li ya, bo bini thuthaini khotolo rokoui tongo.

³Kaitorni chati thwiwi tháng ya kho tei Samuel Subraiyungni nok bisingo Kaitorni swmai bokhok tong thani thu-ui tongo.

⁴Hakhe Subraiyung Samuelno, “Samuel, Samuel!” Hwnwi ring kha. Bo, “Iko ang orono,” hwnwi sa kha.

⁵Elini thani khabrumwi thángwi hai hwnwi saui kha, “Iko ang oro se, nwngno ano ringna ble?” Tamo khe Eli, “Ang nono ring ya, thu-ui tongwi di,” hwnwi sa kha. Hakhe bo thángwi thu-ui kha.

⁶Hakhe Subraiyung Samuelno tei uáisa “Samuel!” hwnwi ring phi u kha, hakhe Samuel bachaui Elini thani thángwi hai hwnwi sa kha, “Iko ang oro se, nwng de ano ring?” Tamo khe bo hai hwnwi sa kha, “Sajla ang nono ring ya, thu-ui tongwi di.”

⁷Samuel abo Subraiyung hwnwi saui man ya kho, tamni hwn ba Subraiyung kók saui bini thani uáisa’-bo nukjak ya kho.

⁸Subraiyung Samuelno uáitham ring kha. Hakhe bo bachaui Elini thani thángwi hai hwnwi sa kha, “Iko ang oro se, nwng ano ringna ble?” Hakhe Eli abo Subraiyung se chwraino ringwi tongo hwnwi saui man kha.

⁹Aboni bagwi Eli Samuelno hai hwnwi sa kha, “Thángwi tongwi di, bo nono ring phi khe ‘Subraiyung nini seleng khnaui tongo’ hwnwi nwng sa di. Hakhe Samuel thángwi thu-ui tongwi kha.”

¹⁰Subraiyung phaiwi bacha phai khe swkang phuruni hai khe’-no, “Samuel, Samuel!” Hwnwi ring phi kha. Samuel, “Sa di, nini seleng khnaui tongo!” Hwnwi sa kha.

¹¹Aphuru Subraiyung Samuelno hai hwnwi sa kha, “Nai di, ang Israilni bisingo samung kaisa khlai anw, abono khnanairok belai uanama chánai.

¹²A salo ang Elini núkhungno kebengwi kók sama hai yaphangni simi páithak jora khlai anw.”

¹³Ang bini núkhungno mol brúmni bagwi sátoknai hwnwi saui’-no páijak, tamni hwn ba bini bwslasong Kaitorno kebengwi kók sa kha, Eli abono saui mano. Hai phano bo abono kasu li ya.

¹⁴Abo baino ang Elini núkhungno swmai tangwi sa-o tei mungsa yapharmungrok bai bo bórokni sumsokno mol brúmni bagwi norwi man li ya.

¹⁵Samuel phung jora thuyamo rokoui tong kha, hakhe bo bachaui Subraiyungni nok duglamrok phiyok kha. Tamo khe bo Elino bini nukmani kókno sanani kiri kha.

¹⁶Phiya ba Eli bono ringhorwi hai hwnwi sa kha, “Samuel, ani sajla.” “Ang oro se,” hwnwi Samuel sa kha.

¹⁷Eli hai hwnwi sẃng kha, “Bo nono tamo sa kha? Ano mungsa huiwi ta tong di. Bo samani kókrokno ano sa phi ya hwn khe Kaitor nono belai khe sátoknai.”

¹⁸Hakhe Samuel tong kwrwi saui rw bai kha, mungsa phano huiwi ton li ya. Eli hai hwnwi sa kha, “Bo se Subraiyung; bini chajakmani hai’-no khlai thung.”

¹⁹Hakhe Samuel torsaui phai khe, Subraiyung bo bai tong kha, bini kók tháisa-láisa phano ha-o klai li ya.

²⁰Hakhe bebak Israilni bororok Danni simi Birseba jora Samuel kubui’-no khoroksa Subraiyungni diyari hwnwi saui man bai-o.

²¹Subraiyung Silo-o nukjak nukjagwi tong kha, Subraiyung Silo-o kók bai khe Samuelni bising tẃi nukjak kha.