Read Kok Borok 1 SAMUEL 30 Bible Online

1 SAMUEL 30 - Kok Borok bible

1 SAMUEL 30

¹Nokha salthamni salo Daud bai bini borok Jiklago sók phai khe Amaleksarok Negeb tei Jiklago choprok lai kha. Bórok Jiklago choprogwi abono sókchaui khibi kha,

²Bórok bebak bwrwirokno tei aro tong bainai bebak okra-kusu khoroksano phano buthar li ya tamo khe romwi tlang bai kha.

³Daud bai bini bororok kamiyungo sók phai khe bórok kamiyungo hór sókjak nuk kha tei bórokni hik, sajwk sajlasongrok khaui tlangjak kha hwnwi saui man kha.

⁴Aphuru khe Daud bai bini bororok aswk khorang chirigwi kap lai kha, lengma bai kapnani phan suda kwrwi kha.

⁵Daudni bihik khoroknwirok, Jejrilni Ahinoam bai Karmelni Nabalni randijwk Abigail suda tlangjak bai kha.

⁶Phiya Daud kirimasingcha-o klai kha, tamni hwn ba lukurok bwsa-bẃtẃirok kwmajak baima bagwi bono holong khitarwi butharnani sa lai kha. Tamo khe Daud sakno bini Subraiyung Kaitorni thani rak rwui tong kha.

⁷Tei Daud Ahimelekni bwsla ochai Abiatharno, “Ani thani ephod tubu di,” hwnwi sa kha. Hakhe Abiathar Daudni thani ephod tubu kha.

⁸Hakhe Daud Subraiyungno, “Ang bórokni uklogo riphriknai da? Ang bórokno romwi da narwgwi manno?” Hwnwi sẃng kha. Bo hai hwnwi sa kha, “Tháng di riphrik di, nwng bórokno romwi bebakno phiyógwi mannai.”

⁹Hakhe Daud bini khorok dok-ra bororokno tlangwi lam rw kha. Bórok Besor twisa rukungo sók phai khe aro baksano klangwi tháng kha.

¹⁰Phiya Daud bini khorok brwira bororok bai khe riphrigwi tháng phi kha; khorok nwira bororok khe aro-o tong rwk kha, bórok belai lengma bagwi Besor twisa basu-ui man li ya.

¹¹Bórok a sula-o khoroksa Ijipsano nuk kha tei bono Daudni thani tubu lai kha. Bórok bono chánani mai tei twi nungna rw khe bo chá kha nung kha;

¹²bórok bono khwichang kwranni auan kisa tei lepnwi angurni auanbo rw kha. Bo abono chá bai khe phan man phi kha; tamni hwn ba bo hortham saltham mungsa mabo ma chá li ya, mabo ma nung li ya.

¹³Aphuru khe Daud bono, “Nini bugra le sabo? Nwng buroni?” Hwnwi sẃng kha. Bo hai hwnwi sa kha, “Ang khe Ijipni borok, khoroksa Amaleksani seleng se. Ani bugra salthamni swkang ang hamya klaima bagwi ano yakarwi klang kha.

¹⁴Chwng Keritsarokni Negeb amchoi, Juda amchoi tei Kaleb amchoirogo sekproui kha; Jiklagno hór phnangwi rw lai kha.”

¹⁵Hakhe Daud bono hai hwnwi sẃng kha, “Nwng ano a sekpronai bodolrokni thani tlangwi da manno?” Bo hai hwnwi sa kha, “Nwng Kaitor kwthangni mung bai swmai tangwi ano buthar glak eba ano ani bugrani yago yaphar glak hwnwi gosi khe ang tlangwi mano.”

¹⁶Bo Daudno tlangwi tháng phuru bórok bebakno hapharo aro-uro wngwi tong laijak. Chá lai nung lai tei mwsa laiwi tongthok laiwi tongmani, tamni hwn ba bórok ha Philistiani tei Judani kwbángma manwi-khwnwirok tubu-ui man kha.

¹⁷Daud bórokno aichuk pile-palani simi teini salni sanja jora bórok bai choba nang lai kha. Khorok brwira borok mangingango kasaui khárwi yóknairokno karwi tei khoroksa phano yók li ya.

¹⁸Daud Amaleksarok tlangmani bebakno phiyógwi tubu kha; tei bo bini bihik khoroknwirokno bo phiyók kha.

¹⁹Okra hwn di kusu hwn di, sajwk-sajlarokno tei sekproui tlangjakmani bebak manwi-khwnwirokno Daud kiphilwi tubu phir kha.

²⁰Daud musukrok-meraroknobo tubu-ui phai kha, bini bororok abono tei kubun musuk-merarokni swkang swkang béngsaui tubu kha. Bórok “Omo khe Daud sekpromani!” Hwnwi sa lai kha.

²¹Hakhe lengjakma bagwi bini logi-o thángwi man bai li ya khe Besor twima rukungo tong rwk bainai khoroknwira bororokni thani Daud kiphilwi phai kha. Bórok Daud tei bini palrok bai malainani phai lai kha. Daud bórokni gana-o thángwi bo borokno khá kaham yaphar kha.

²²Daud bai thángnai baksa borok hamyarok hai hwnwi sa lai kha, “Bórok chwng bai pal tháng yani bagwi chwng bórokno sekproui manmani aroni mungsa banta rw glak, bórokni bihik bwsarokno simi tlangwi tháng bai thung.”

²³Phiya ba Daud hai hwnwi sa kha, “Takhukrok, Subraiyung chwngno rwmano norok abo hai ta khlai di; bo chwngno kati rw kha tei chwngno choprok phainairokno chini yago yaphar kha.

²⁴Abono sabo gosiui mannai? Choba-o thángnai bai manwi-khwnwirokno mwrwgwi tongnairok bebakno baksa kheno banta mannai.”

²⁵A salni simi Daud Israilrokni bagwi raida kaisa snamwi rw kha, abo Israilo tabuk jorabo tong kho.

²⁶Daud Jiklago kiphilwi phai khe bórok segwi tubumani baksa manwirokno bini kichingsongni thani tei Judani tẃiphang okrarokni thani rohorwi hai hwnwi sa hor kha, “Omo Subraiyungni kena arirokni yakni segwi namani norokni bagwi yapharmung”;

²⁷Omorok wng kha Bethelo tongnairokni banta, Negebni Ramoto tei Jatirni bororokni banta,

²⁸Aroer, Sipmot, Estemoa

²⁹tei Rakal, Jeramilni bosongni kamiyungrokni banta, Kenisarokni kamiyungrokni banta,

³⁰Horma kamiyungni bororokni, Borasanni, Athakni

³¹tei Hebrono tongnai bororokni banta rohor kha, phiya Daud bai bini bororok bebak thángwi tongwimarogo rohor kha.