Read Kok Borok 1 SAMUEL 31 Bible Online

1 SAMUEL 31 - Kok Borok bible

1 SAMUEL 31

¹Philistiasarok Israilrok bai choba nang lai kha; tei Israilni bororok Philistiasarokni bwskangni ma khár bai kha, hakhe hachuk Gilboa-o kwbángma butharjak bai kha,

²Philistiasarok Sol bai bini bwslasongno mechen kha; bórok Solni bwsla Jonathan, Abinadab tei Malkisuano buthar kha.

³Hakhe Solno kebengwi teibo choba nangwi phaisa kha; chakhla koknairok bono nugwi belai khe chakhla kogwi thwi twtwi khlai kha.

⁴Aphuru khe Sol bini da-seng tẃinaino hai hwnwi sa kha, “Nini seng naui ano yophlaui buthar si di, wng ya khe o sakur rajak yarok se phaiwi ano yophlaui lachimung rwnai kha.” Phiya ba a seng tẃinai lon li ya; tamni hwn ba bo belai khe kirijak kha. Hakhe Sol baithangni seng naui sak sakno aro yórjagwi thwi kha.

⁵A da-seng tẃinai Solno thwima nuk khe bo’-bo bini seng naui sak sak yórjagwi bo bai baksa thwi kha.

⁶Abo hai kheno Sol tei bini bwsla khorokthamrok tei bini da-seng tẃinai pal khe salsani salo thwi bai kha.

⁷Israilrok harungni tei babaisa bwkhago tong bainairok tei Jordan twimani saka bwkhago tong bainairok Israilni sengkrakrok khár bai kha tei Sol bai bini bwslasong butharjak bai kha hwnwi khna khe, bórokni kamiyungrok yakarwi khárwi tháng bai khe; hakhe Philistiasarok aro phaiwi abono naui tong phai bai kha.

⁸Teini salo Philistiasarok kwthwirokni rí khochanani phai khe, Sol bai bini bwsla khorokthamrokno Gilboa hachugo klaiwi tongma nuk kha.

⁹Bórok Solni bokhorok tansu-ui bini da-seng naui tẃitunrok rohorwi bebak Philistia ha-o, bórokni mwtairokni nokrogo tei bororokni thani o kóktma kahamno sa rw hor kha.

¹⁰Bórok bini da-sengno Astarte mwtaijwkni nok bisingo tei bini mangno khe Betsanni chokdeualo khachiui rw lai kha.

¹¹Jabes-giliado tong bainai bororok Philistiasarok Solno tamo khlai kha abono khna kha.

¹²Aroni bebak bwkha kotor kuk borok bacha laiwi hopung himwi Betsano thángwi Sol bai bini bwslasongni mangno chokdeualni kariui Jabeso tubu-ui abono hór bai sógwi pái lai kha.

¹³Hakhe bórok bórokni bekrengrokno thumwi Jabesni tamarisk buphang yaphango abono phobwi rw laiwi nokha salsni ok bukcha tong lai kha.