Read Kok Borok 1 SAMUEL 4 Bible Online

1 SAMUEL 4 - Kok Borok bible

1 SAMUEL 4

¹A jora-o Israilrok Philistiasarokno kebengwi choba nang lainani bagwi thum lai kha. Israilrok khe Ebenejero batham kha lai kha, Philistiasarok khe Aphego batham kha lai kha.

²Philistiasarok Israil bai nang laina bagwi bwtang khe bacha laiwi choba nang lai khe, Israilrok mechenjagwi borok khorok brwisai choba khola-o butharjak bai kha.

³Yóknairok bathamo sók phai khe Israilni tẃiphangrok hai hwnwi sa kha, “Tamni Subraiyung tini chwngno Philistiasarok bai mechen rw lang? Phai di, chwng thángwi Siloni Subraiyungni swmai bokhokno tubu lai anw, hakhe bo chwng bai pal thángwi kena arirokni yakni chwngno mwthang thung.”

⁴Hakhe Silo-o borok rohorwi aroni Subraiyungni swmai bokhokno tubu lai kha, abo kwplaisa Subraiyungni achukthayung, bo cherubrokni kwcharo tongo; hakhe Elini bwslasong khoroknwi Hopni bai Phinehasbo Kaitorni swmai bokhok bai baksa phai lai kha.

⁵Subraiyungni swmai bokhok bathamo sók phai khe bebak Israilrok chirikhók laimani ha suda ma kwlwi kha.

⁶Philistiasarok chirik laimano khna khe hai hwnwi sa lai kha, “Hibrurokni bathamo abo tamo wngwi chirik lai?” Bórok Subraiyungni swmai bokhok bathamo sók phai kha hwnwi saui man kha,

⁷Philistiasarok kirijak baiwi hai hwnwi sa lai kha, “Bórokni bathamo khoroksa mwtai sók phai kha,” bórok teibo hai hwnwi sa lai kha, “Chwng thwi kha, abo hai chini thani uáisa phano wng ya kho.

⁸Sabo chwngno o phan gwnang mwtairokni yakni phiyógwi mannai? O mwtairok’-no Ijipsarokno hasing panthoro podrepot bemuk bai butharo.

⁹Bwkha rak di, bórok hai khe choba nang lai di, o Philistiasarok! wng ya khe, bórok chini seleng wngma hai norokbo bórokni selengma wng ya tẃi. Hakhe bororok hai khe choba nang lai di!”

¹⁰Hakhe Philistiasarok phan bai khe choba nang laiwi Israilrokno mechenma bai bórok sak sakni nogo ma khár bai kha, kwbángma butharjak kha, khorok 30,000 Israilni sengkrakrok butharjak bai kha.

¹¹Kaitorni swmai bokhokbo najak kha tei Elini bwsla khoroknwi Hopni bai Phinehasbo butharjak kha.

¹²Benjaminni borok khoroksa bini rí sichigwi bokhorogo ha buljak khe choba kholani khárwi phaiwi salsani bisingo’-no Silo-o sók phai kha.

¹³Bo sók phai phuru Eli lama gana-o bini achukthai-o achugwi mwrwgwi tongo, bo Kaitorni swmai bokhokni bagwi uanaui tongo. Hakhe a borok kamiyungo sók phaiwi sa phai khe kamiyungni bebak’-no kirimani bai kap lai kha.

¹⁴Eli kap laimani khna khe, “Tamni bagwi kap lai lang?” Hwnwi sẃng kha. Aphuru borok khoroksa Elini thani khá rwui phaiwi sa phai kha,

¹⁵Tabuk Elini umor nokha bisi chukuchichar wng kha tei bo mokol se nuk li ya.

¹⁶A borok Elino, “Ang’-no tini choba kholani yógwi khárwi phainai,” hwnwi sa kha. Hakhe Eli, “Ani sajlasong tamo wng bai kha?” hwnwi sẃng kha.

¹⁷A kók tubunai Elino hai hwnwi sa kha, “Israilrok Philistiasarokni bwskangni ma khár bai kha, borok kwbángma butharjak bai kha, abono karwi nini sajla khoroknwi Hopni bai Phinehasbo butharjak kha tei Kaitorni swmai bokhokbo najak kha!”

¹⁸A borok swmai bokhokni kók sa khe duglam gana-o Eli mwthalwi klai kha, bo aro’-no gwdna báiwi thwi kha, tamni hwn ba bo belai chakra wng kha tei bwsakbo hilik kha. Bo bisik brwichi jora Israilo kerongpha wng kha.

¹⁹Hakhe Elini bahamjwk Phinehasni bihik sak kupulung wngwi sak kengnani jora wngwi tong kha. Bo Kaitorni swmai bokhok segwi najak kha tei bini bwkra bai bwsaibo thwi kha hwnwi khna khe’-no bo kongwi sak keng kha. Tamni hwn khe achomsa bohok sajakma bagwi

²⁰bo thwinani nai tong khe bono chubanai bwrwi hai hwnwi sa kha, “Ta kiri di, tamni hwn ba nwng bwsa chwla man kha.” Tamo khe bo mungsa kókbo sa li ya tei khwbo khna li ya.

²¹Tei a bwrwi o chwraino “Ikhabod”[7] hwnwi mung pharwi hai hwnwi sa kha, “Kaitorni chẃngsacha Israilno yakar kha,” tamni hwn ba Kaitorni swmai bokhok tlangjak kha tei bini bwkra bai bwsaibo thwi kha.

²²Bo hai hwnwi sa kha, “Kaitorni chẃngsacha Israilno yakar kha, tamni hwn ba Kaitorni swmai bokhok segwi najak kha.”