Read Kok Borok 1 SAMUEL 8 Bible Online

1 SAMUEL 8 - Kok Borok bible

1 SAMUEL 8

¹Samuel chakra wng khe bini bwslasongno Israilni buj thumnairok snam kha.

²Bini bwsla okrani mung khe Joel, kusuni mung khe Abia, bórok Birseba-o buj thumo.

³Phiya ba bórok bupha hai wng lai ya, bórok rangno se hamjak kuk lai-o, bórok rang chá laiwi sói bujni samung tang li ya.

⁴Hakhe bebak Israilni okra chakrarok thum laiwi Rama-o Samuelni thani phai laiwi

⁵bono hai hwnwi sa lai kha, “Nai di, nwng chakra wng kha, nini nwslasong nwng himmani lama-o him ya, tabuk buini dopharok hai khe chwngnobo khoroksa habugra chongwi rw di.”

⁶Tamo khe Samuel bórok habugra sanmano chajak li ya, hakhe Samuel Subraiyungni thani suri san kha.

⁷Hakhe Subraiyung Samuelno hai hwnwi sa kha, “Bororok nono bebak samani kókno khna di, bórok nono norma klai ya, bórokni bugra ta wng thung hwnwi ano se bórok norma klai-o.

⁸Ang bórokno ha Ijipni tubu phuruni simi bórok ano yakarwi kubunni mwtairokno khulum kha, tabuk bórok ano khlaimani hai’-no nonobo khlai-o.

⁹Hakhe tabuk bórokni kókno khna di tei bórokno jai khe’-no khorai di, habugrarok bórokno bahai tamo khlaino saui khna rw di.”

¹⁰Hakhe Samuel bini thani habugra sannai bororokni thani Subraiyung samani kókrokno bebak saui khna rw kha.

¹¹Bo hai hwnwi sa kha, “Norokni habugra norokno omo hai khlai anw: Bo norokni bwsarokno sengkrak snam anw, baksa borokno chobani korai malkhungni sengkrak chong anw, baksano bo bini korai malkhungni swkang khachikna bagwi chong anw.

¹²Bo bini bagwi baksa borokno khorok saisani bokhorok tei baksano khorok bachini bokhorok chong anw, norokni bwsarok bini panthoro al ma chuai anw tei bini mai kumun ma ra anw tei baksa chobani sengrok tei malkhungni bagwi manwirok ma snam anw.

¹³Phiya bo norokni sajwksongno tlangwi thok motom snamnai, mai-mui sóngnai tei auan snamnai chong anw.

¹⁴Bo norokni kaham kuk panthor, angur bari, olib buphangrokno na baiwi bini selengrokno rw anw.

¹⁵Bo norokni mai tei angurrokno chi-o kaisa naui bini tangphangrok bai selengrokno rw anw.

¹⁶Bo norokni seleng tei selengjwkrok, kaham kuk mal-matarok,[8] koraichirkarok, tlangwi samung tang rw anw.

¹⁷Bo norokni chi-o kaisa merarokno naui noroknobo seleng snamnai.

¹⁸A jora khe norok chongwi namani habugrano tẃiwi chirigwi kap lainai, phiya ba Subraiyung norokni kapma khna glak.”

¹⁹Hai phano bororok Samuelni kókno khna lai li ya tei bórok hai hwnwi sa lai kha, “I’nhi” chwng habugra se nai-o!

²⁰“Hakhe chwngbo kubunni dopharok hai khe chini habugra chwngno tẃidulnai tei bwskango tongwi chobarogo nang lai mannai.”

²¹Samuel bororokni bebak kókrokno khna bai khe Subraiyungno saui phi kha.

²²Hakhe Subraiyung Samuelno, “Bórokni kók khna di tei habugra chong si di,” hwnwi sa kha. Hakhe Samuel, “Israil bororokno nogo tháng bai si di,” hwnwi sa kha.