Read Kok Borok 1 SAMUEL 9 Bible Online

1 SAMUEL 9 - Kok Borok bible

1 SAMUEL 9

¹Aro Benjamin bosongni belai rang gwnang borok khoroksa tongo, bini mung khe Kis; Kis Abielni, Abiel Serorni tei Seror Bekoratni tei Bekorat Aphiani bwsla.

²Bini bwsla khoroksa tongo, bini mung khe Sol, bo belai chwla naithok. Israilni bisingo bo wng kha buini slái kuchuk-kotor, bo hai khoroksa phano kwrwi.

³Solni bupha Kisni baksa koraichirkarok kwmaui tháng kha, Kis bini bwsla Solno hai hwnwi sa kha, “Seleng khoroksano tlangwi koraichirkarokno rutuk di;”

⁴bórok hathái kami Ephraim tei ha Salisa tẃi tháng lai kha, phiya ba bórok rutugwi man lai li ya, bórok Salim ha bwkhak tẃi tháng lai phi kha, tamo khe arobo kwrwi; hakhe bórok Benjamin ha bwkhak tẃi tháng lai kha, phiya ba bórok man li ya.

⁵Bórok Juphni amchoi-o sók phai khe, Sol bini selengno hai hwnwi sa kha, “Phai di, chwng kiphilwi tháng lai si anw, wng ya khe ani apha koraichirkarokno uansuk yaui chini bagwi se uana kuknai kha.”

⁶Tei bo bono hai hwnwi sa kha, “Nai di, o kamiyungo khoroksa Kaitorni borok tongo, bo kaham khe’-no bórom khlaijago tamni hwn ba bo samani kókrok bebak’-no nang phai-o, phai di, bini thani tháng lainai phiya ba bo chwngno buro thángnai saui mannai.”

⁷Aphuru Sol bini selengno hai hwnwi sa kha, “Chwng bini thani tháng khe, tamono chwng yapharnai? Chini sola-o chámungbo páiwi tháng kha, Kaitorni borokno yapharjaknai chini mungsa kwrwi kha. Chini tamo tong?”

⁸Seleng Solno hai hwnwi sa phi kha, “Ani thani rukphaini rang lepbrwi tongo, chini lamano chwngno sa khe Kaitorni borokno ang abono rwnai.”

⁹Swkango Israilo diyarino “Nuknai” se hwnjago, aboni bagwi khoroksa swk Kaitorno sẃngnani muchung khe, “Phai di nuknaini thani tháng lai anw,” hwn lai-o.

¹⁰Hakhe Sol bini selengno, “Kaham’-no sa kha; phai di tho tháng lainai,” hwnwi sa kha. Hakhe bórok Kaitorni borok tongmani kamiyungo tháng lai kha.

¹¹Bórok hathái kasaui kamiyung bwkhak tháng lai khe bórok twi khóknani phai bainai sikla bwrwirok bai malai kha; bórok bwrwirokno, “Nuknaisa oro de tong?” Hwnwi sẃng kha.

¹²Bórok hai hwnwi sa kha, “I’n tongo, bo norokni bwskangdrobo se. Norok dakti tháng khe malainai, bo tabuk’-no kamiyungo sók phaidrop, tamni hwn ba bororok tini hathái-o yapharmung yaphar lai-o.

¹³Kamiyungo hap khe’-no bo chánani bagwi kuchuk jidolo thángmani swkang bono nuknai, bo aro sógwi ya sak bororok chánani cheng lai glak, tamni hwn ba bo se swkang yapharmungrokno hamari rwnani nango, tabuk norok tháng khe malainai.”

¹⁴Hakhe Sol bai bini seleng kamiyungo tháng lai kha, bórok kamiyungo hap twtwi wng khe Samuel hathái-o thángnani bagwi bórokni phaising phaiwi tongma nuk kha.

¹⁵Sol phaimani sal swkang Subraiyung Samuelno hai hwnwi sa kha:

¹⁶“Ang khwna omo hai jora-o khoroksa ha Benjaminni borokno rohornai, bono nwng thok lu-ui ani Israil bororokni habugra snam di, bo se Philistiasarokni yakni ani bororokno mwthangnai, ang bórokni birmanno nuk kha tei bórokni kapma khna kha.”

¹⁷Samuel Solno nuk khe Subraiyung bono hai hwnwi sa kha, “Omo’-no ang nono samani a borok, bo’-no ani bororokni bugra wngnai.”

¹⁸Hakhe Sol duglam gana-o tongnai Samuelno, “Nuknaisa buro-o tong ano sa di?” Hwnwi sẃng kha.

¹⁹Samuel hai hwnwi sa kha, “Ang’-no nuknai, ani slái swkang hathái kuchugo tháng di, tini norok ang bai ma chá lainai, khwna phungo norok khá-o chongmarokno saui rohor anw.

²⁰Ta uana di, nokha saltham swkang norokni koraichirka kwmaui thángmani, abórok manjak kha. Israil bororok aswk naimani abo sabo? Abo nwng bai nini nwphani núkhung se.”

²¹Sol hai hwnwi sa kha, “Ang Israilni bisingo kotoi kuk Benjamin bosongni se, ani núkhung khe Benjamin bosongni bisingobo chúk ya kuk; hakhe nwng tamni bagwi abo hai kókrok saui tong?”

²²Hakhe Samuel Sol bai bini selengno nok kotoro tlangwi borok khorok thamchi ringjaknairokni slái sakani achukthai-o achuk rw kha.

²³Samuel mai-mui sóngnaino, “Ang nono khagwi ton di hwnwi rwmani muihanno tubu di,” hwnwi sa kha.

²⁴Hakhe sóngnai biyani tei aboni logini bahanno Solni bwskango rw phai kha. Samuel hai hwnwi sa kha, “Nai di, omo nini bagwi narwkjakmani, chá di, nograirok bai baksa chánani bagwi ang tisaui narwkmani.” Hakhe Sol a salo Samuel bai chá lai kha.

²⁵Bórok hathái kuchukni kamiyung bwkhak ongkhorwi phai khe bórok Solni bagwi núkhúng saka-o thuthai snam kha,[9]

²⁶bo aro’-no thu kha. Aichugo khe Samuel Solno hai hwnwi ring kha, “Bacha si di, ang nono rohor sinai.” Hakhe Sol bacha kha, bo bai Samuel laharo ongkhorwi tháng lai kha.

²⁷Bórok ongkhorwi kamiyung baichingo sók phai khe Samuel Solno, “Nini selengno chini slái swkang tháng di hwnwi sa di, bo tháng khe nwng oro srapsa bathak di, Kaitor ano tamo hwnwi sa kha ang nono saui khna rw anw,” hwnwi sa kha.