Read Komrem A’NPHUTNA 1 Bible Online

A’NPHUTNA 1 - Komrem bible

A’NPHUTNA 1

¹A’nphutbia Pathen in marvânhei leh ralei asyem pha a khan,

²raleichung hi ahme-alim leiom mak, tui-ôngpui in-nông inhnak khan heirakip akavursi tlit a, inthim in aleimakhu pak, khana Pathen Rathla kha tui chunga khan leikalôn lelea kae.

³Khava pha Pathen in ṭong apek a, “Vâr om rasoh,” atia, vâr hong kasōk jo.

⁴Pathen in kha aleihmua amalung leikatlâi. Ama’n vâr kha khō inthima inphut aṭhensōt jo.

⁵Khana ama’n vâr kha, “Sûn” atia; khana inthim kha “Jân” tia aphō jo. Khōhlei kathlenga jîngkâr kahong jo; khavakha hma inkeipen kani kachang jo.

⁶Khava sōa Pathen in ṭong aleipek a, “Tui leh tui insemṭhen sona, ankâra bōirōk inkârjap inkhat in hmun hnia ṭhen hei rasoh,” ati. Khanga kachang jo. Khang’khan Pathen in bōirōk inkârjap inkhat asyema chunga tui leh thōia tui aṭhen jo.

⁸Ama’n bōirōk kha “Chungvân” tia aphō jo. Khōhlei kathleng joa jîngkâr kahong jo, khavakha ni 2 tluk ning kachang jo.

⁹Khava sōa Pathen in ṭong apek a, “Ralei ram kachâr a’nlâr theina sik chungvân thōia tui kha hmun khat a inpunkhôm rasoh,” atia khanga leikachang jo.

¹⁰Ama’n ralei ram kachâr kha “Ralei,” tui intlingna kha, “Tuipui” tia aphō jo hei. Pathen in khahei kha ahmu pha amalung leikatlâi.

¹¹Khava sōa ama’n ṭong apek a, “Ralei in hmuchi-bechi leh kara kanei thing leh rō ajât kakip a majōr rasoh,” atia khanga hongkachang jo.

¹²Khang’khan ralei in thing leh rō jât rakip amajōr jo, khana Pathen in aleihmu hei chunga khan amalung leikatlâi.

¹³Khōhlei kathlenga jîngkâr kahong jo. Khavakha ni 3 tluk ning kachang jo.

¹⁴Khava sōa Pathen in ṭong apek a, “Sûn leh jân kaṭhen sik leh raleichunga kani, kum, beklanga revei phutna pha leh châng malârna sik a chungvâna vâr sōk hei rasoh;

¹⁵khahei khan raleia vâr pekna sik a chungvâna vâr hei rasoh,” atia khanga leikachang jo.

¹⁶Khava jâra Pathen in vâr kalen chet 2, sûna vai karôn sik a kani leh jân a vai karôn sik a thla aleisyem hei, khana ârsi he’m aleisyem hei.

¹⁷Ama’n ralei kasat invâr sik vâr kha chungvâna ada hei,

¹⁸khahei kha sûn leh jân a vai karôn sik, vâr leh inthim kaṭhen sik hei kae. Khana Pathen in khahei kha ahmu pha amalung leikatlâi.

¹⁹Khōhlei kathleng joa jîngkâr kahong jo. Khavakha ni 4 tluk ning kachang jo.

²⁰Khana Pathen in ṭong apek a, “Ranhring jât katamtak in tui shunga siptak hei rasoh, khana va katamtak in chunga siptak hei rasoh” ati.

²¹Khang’khan Pathen in, tuipuia ranhring kalen, tui shunga ranhring leh va jât rakip asyem jo hei. Khana Pathen in khahei kha ahmu pha amalung katlâi jo.

²²Ama’n ankhenga vâng apek hei, tui shunga ka-om ranhring rakip anpungna sik leh tuipui ansipna sik khana vahei khan anja anhong tamna sik ṭong aleipek hei.

²³Khōhlei kathlenga jîngkâr kahong jo; khavakha ni 5 tluk ning kachang jo.

²⁴Khana Pathen in ṭong apek a, “Ralei in ranhring jât rakip ramsha, innsha akalen, akasin akhenga majōr rasoh,” atia khanga kachang jo.

²⁵Khang’khan Pathen in ankhenga asyem jo hei, ama’n khahei kha ahmu pha amalung katlâi jo.

²⁶Khava sōa Pathen in ahri, “Tûn eini’n mihring nisyem sik hei kae; anmani’n eini anpō sik me, einizek aka-ang sik hei kae. Anmani’n, ngahei leh vahei, ranhring rakip, inna leh ram a shahei, akasin leh akalenhei chunga ratha antanei sik kae.”

²⁷Khava sōa Pathen in mihring asyem jo hei, ama kapōhrep a aleisyem hei. Ama’n nuhmei leh pase aleisyem hei,

²⁸khana ama’n vâng apek hei, “Sa katamtak nei-una, nansōn nanpâr he’n raleichung rakip hlōsō hei sona, anvai rônna thōia da hei rasoh. Ke’n, nangni nga leh va, ramsha, ranhring rakip hei chunga ratha kanei sik a kanganse jo chei kae.

²⁹Ke’n nantasâk sik hmuchi-sachi leh theikara rakip kapek jo chei;

³⁰tâk ramsha rakip leh va rakip sik a thingbō, phōi kahar kamantluk pek jo hei,” atia khanga kachang jo.

³¹Pathen in asyem rakip a-ena amalung katlâi hêr jo. Khōhlei kathlenga jîngkâr kahong jo, khava kani kha ni 6 tluk ning kachang jo.