Read Komrem A’NPHUTNA 11 Bible Online

A’NPHUTNA 11 - Komrem bible

A’NPHUTNA 11

¹Hmalai chu, raleichung pumpuia mihe’n ṭong inkhat rōk ṭongrahme in-angtling anleihmang.

²Nisōtinga inphut kahong lele heia Babylon phaicham anhong phâk, khana anmani khō leikatla jo hei.

³Anmani inkhat leh inkhat inbe heia, “Hong ruh! ṭêk syem me sona angarna sik manchâr rih,” anti. Khana khan anmani’n ṭêk a’nsyema khe vâng mansur mankopna sik antlo.

⁴Khana anmani’n, “Tûnchu chungvân katlung sik denchung inshâng khōpui sak rih, kha achang inchu nirahming um manhret a ka-om sik khana raleichung pumpuia inchek a om mak jo min,” anti.

⁵Khava sōa RŌNGPU kahonga khōpui leh inn chung inshâng antasak kha ava-en,

⁶khana ama’n, “Tûnchu anmani hei hi phung inkhat rōk leh ṭong inkhat rōk kajôm kachang jo hei; hiva hichu anṭōn tlo sik aphutnabi lakae. Antamadudu kha inranga ansyem tor sik jo.

⁷Se me sona anṭonghri hei hi inkhat leh inkhat ani’nhret thei makna sik manchôm pek hei rih,” ati.

⁸Khang’khan RŌNGPU’n raleichung hmun rakip a akathek chai jo hei, khana khōpui inn sakna kha anleibâng jo.

⁹Khōpui rahming kha Babylon anti, ajârchu RŌNGPU’n mihei ṭong kha aman chômpek hei khana khava hmun a inphut raleichung pumpuia akathek chai jo hei.

¹⁰Shem sōn leh pârhei kha hivahei hi kae. Tuishânglen kum 2 sōa Shem akum 100 ahongtluk a Arpachshad inti sapa inkhat anei.

¹¹Khava ka-hnunga kum 500 lakahring nôk a sa alak um anlamajōrsa.

¹²Arpachshad in kum 35 atluk pha Shelah inti sapa inkhat anei.

¹³Khava sōa, kum 403 lakahring nôk khana sa alak um anlamajōrsa.

¹⁴Shelah kum 30 atluk pha Eber inti sapa inkhat anei,

¹⁵khava sōa 403 lakahring khana sa alak um anlamajōrsa.

¹⁶Eber in kum 34 atluk pha Peleg inti sapa inkhat anei;

¹⁷khava sōa 430 lakahring nôk khana sa alak um anlamajōrsa.

¹⁸Peleg in kum 30 atluk pha Reu inti sapa inkhat anei;

¹⁹khava sōa kum 209 lakahring nôk khana sa alak um anlamajōrsa.

²⁰Reu’n kum 32 atluk pha, Serug inti sapa inkhat anei;

²¹khava sōa, kum 207 lakahring nôk khana sa alak um anlamajōrsa.

²²Serak in kum 30 atluk pha Nahor inti sapa inkhat anei;

²³khava sōa kum 200 lakahring nôk khana sa alak um anlamajōrsa.

²⁴Nahor in kum 29 atluk pha Terah inti sapa inkhat anei;

²⁵khava sōa, kum 119 lakahring nôk khana sa alak um anlamajōrsa.

²⁶Terah kum 70 atluksō kahnunga, Abram, Nahor khana Haran anei hei.

²⁷Abram, Nahor leh Haran hei pa, Terah sōn leh pârhei kha hihei hi kae. Haran kha Lot pa kae.

²⁸khana Haran in Babylon ram a ankhōpui Ur a leikathi, athi pha apa lakahring.

²⁹Abram in Sarai a-ompui, Nahor in Haran sanu Milcah a-ompui khana Haran kha Iska pa’m kae.

³⁰Sarai kha sa neimak, akaching kae.

³¹Terah’n asapa Abram, Haran sapa, atupa Lot khana ahmōinu Sarai leh anuhmei aṭhōi heia Babylona Ur khōpui adahlona Canaan ram a kase jo hei. Haran katlunga kase heia khava hmun a khō katla jo hei.

³²Khava hmun a Terah kha akum 205 atluk pha kathi jo.