Read Komrem A’NPHUTNA 12 Bible Online

A’NPHUTNA 12 - Komrem bible

A’NPHUTNA 12

¹Abram hneng ati, “Naram, na-innkōhei napa innshung dahlon roh, khana ke’n kaman hmuna sik che ram a khan se roh.

²Ke’n nasōn-napâr katamtak kapek sik che, khana anmani jât kalentak hongkachang sik hei. Nang vâng kaṭha inkhat nachenna sik ke’n nang vâng kapek sik che, narahming kaman thang sik.

³Vâng nakapek hei kha ke’n vâng kapek sik hei. Tâk-kha nakahâksêr hei kha kahâksêr sik hei, khana nanga inphut jât rakip vângṭhat kapek sik hei kae.”

⁴Abram kha kum 75 atluk pha RŌNGPU tahri pek dungjuia Harana inphut kasesōt jo; khana Lot in aleijuia kae.

⁵Abram in anuhmei Sarai leh anaipa sapa Lot, khan chu Harana alamsōt karōi seng leh asōk-hei ankhenga aṭhōi heia Canaan ram kajōn sik le’nphut jo hei. Anmani Canaan antlung pha,

⁶Abram in ram shung senga kase lelea hmun intheng Shechema sasōkung intheng kekna More katlung jo. (Khava lai khan Canaan mihei kha ram a khan leika-om hi hei).

⁷Khana khan RŌNGPU kha jōng inlâra Abram hneng, “Hiva ram hi ke’n natu-nasahei kapek sik ram kha kae,” ati. Khava pha Abram in ajōng inlâr RŌNGPU hneng maichâm inkhat asyempek joa kae.

⁸Khava sōa ama thlang ting Bethel khōpui nisō intong tlâng ting kasea nisōting Ai, tlaitlâk ting Bethel, ankârtak a apōn rabuk-inn amatung jo. Khava hmun a kha’num maichâm asyema RŌNGPU kha akamuk a kae.

⁹Khava sōa ama Canaan thlâng intongting hmun hlop-hlop a inthon joa kae.

¹⁰Tâk-kha Canaan ram a ṭâmpui katla jo. Ṭâm kha a’nhnak jo pha Egypt ram a avaka-om chot sik a Abram thlang ting leikase jo.

¹¹Khana ama’n Egypt ramri avahlut sik pha, ama’n anuhmei Sarai hneng, “Nang nuhmei hme kaṭhatak che kae.

¹²Egypt mihe’n anhmu che pha anmani’n kanuhmei nachang kha anmandon sik a kha, kei anthat sik eng, nang anmanhring sik che.

¹³Khava jâra asernu eng kae tia hri roh, khanga nahri’nchu kei athat mak hei ning, kaṭha antlo sik eng,” ati.

¹⁴Ama Egypt ram a ahlut pha, Egypt mihe’n anuhmei hmeṭhat kha anhmu takbak joa kae.

¹⁵Egypt a kalen kahrâng ṭhahrep in amanu kha anhmu jo. Rengpa hneng ahme ṭhat kha anvahri jo; khava jâra amanu kha reng-innpuia anṭhōi jo.

¹⁶Amanu jâra Rengpa’n Abram kha kaṭhadek a arazen khana kemōng, ke, sehrat, shakorhei leh sōk-hei khana sharîngsei hei apek jo.

¹⁷Tâk-kha Rengpa’n Sarai kha ale’nṭhōi jâra khan RŌNGPU’n achunga, reng-innpui shunga mihei chunga hrise inhnaktak ajōngtir joa kae.

¹⁸Khava pha reng khan Abram ava manbek heia ader, “Heimo kahnenga natlo jo hi? Heisa mo nanuhmei kae tia nahri pek mak eng?

¹⁹Heisa mo nanainu kae nati, khana kanuhmei sik a naman ṭhōi eng? Hin nanuhmei ka-om, inṭhōi ina sesōt jo roh!”

²⁰Rengpa khan, amihei hneng, Abram, anuhmei leh aneiseng kha nirama inphut thaksōt hei ruh, tia ṭong apek heia, anmani’n anthaksōt jo hei.