Read Komrem A’NPHUTNA 13 Bible Online

A’NPHUTNA 13 - Komrem bible

A’NPHUTNA 13

¹Abram Egypt ram a inphut sak ting heikasōk a Canaan ram a thlâng intongting anuhmei leh anei rakip khana Lot leh inṭhōia kase jo hei.

²Abram kha mikahaotak kae, kemōng, ketak sehrat khana sana leh dangka katamtak anei.

³Khana ama inthon lelea hmun inkhat a inphut hmun inkhat a kaselea, Bethel aleisora kae. Bethel leh Ai kâra hmapenna arephōr matungna leh

⁴maichâm aleisyemna hmun kha katlung jo. Khana khan RŌNGPU kha akamuk jo.

⁵Khana Lot inum kemōng, ketak, sehrat khana a-innshung mi leh asōk katamtak aleinei hei.

⁶Khava jâra an-innlâk hnia omsōmna sik a ramhâng katluk a neimak jo hei, ajârchu ranhring katluk a anleinei jo heia kae.

⁷Khava jâra Abram ran kakhemhei leh Lot ran kakhemhei kha hong innâk jo heia invōk jo hei. (Khava lai khan Canaan mihei leh Periz mihei khava ram a laka-om ṭhak hei).

⁸Abram in Lot hneng, “Eini innkō me kae, nami leh kamihei innâkthei mak hei ning.

⁹Khava jâra eini inṭhen rih. Nang in namadu ramṭhen kha kadei roh. Nang in hmun khatting se roh, ke’n hmun hlopting serong,” ati.

¹⁰Lot in a-en manve bit a Jordan phai, Zoar hlam jōnna rakip khō athlira ram kha tui tamna, RŌNGPU rahōn kapō, a-emak leh Egypt ram kapō kha aleihmu jo. (Hivahi Sodom leh Gomorrah khōpuihei asuk manhmang mak hma kae).

¹¹Khava jâra Lot in Jordan phaicham rakip kha aleikadei jo. Khana nisōting aleijōn jo. Khang’khan anmani 2 kha le’nṭhen jo hei.

¹²Abram khan Canaan ram a ka-om jo, Lot khan phaicham khōpuihei kâra Sodom hnenga rephōr amatung jo.

¹³Khava ram a mihei kha mikaṭhamak, RŌNGPU kadōia ṭōnse katlohei kae.

¹⁴Lot in adahlon sōa, RŌNGPU’n Abram hneng, “Nang na-omna hmun a inphut, ram pumpui rakir 4 hi kaṭha nenga enroh.

¹⁵Na-ena nahmu phâkna ram seng hi ke’n nang leh natu-nasahei kapek sik chei kae; khana ahei tik a nangni chen akachang sik jo kae.

¹⁶Ke’n nang sōn leh pâr katamtak tei torlo hingja kapek sik che. Anmani tei sik kanek a nêrdi ja tei akabei jôk sik kae!

¹⁷Tûn se ina ram pumpui akhenga va-ensō roh, ajârchu ke’n nang hivaseng hi akhenga kapekpet sik che kae,” ati.

¹⁸Khava jâra Abram, inthon joa Hebrona Mamre thingkung intheng hnenga arephōr amatung jo khana ama’n khava hmun a khan RŌNGPU hneng maichâm aleisyema kae.