Read Komrem A’NPHUTNA 14 Bible Online

A’NPHUTNA 14 - Komrem bible

A’NPHUTNA 14

¹Rn 4 hei, Babylona Amra-phel, Ellasara Arioch, Elama Chedorlaomer, leh Goiima Tidal, hiseng hei hin,

²reng 5 hei chunga re anleitlo khahei khachu: Sodoma Kabera, Gomorrah a Birsha, Adma a Shinab, Zeboiima Shemeber khana Bela (a-emak leh Zoar) renghei hi kae.

³Hiva reng 5 hei hi inchun heia Siddim Phaicham, tûnchu Tuipui Kathi inti joa hin anremi anmanchun et a leika-om hei.

⁴Anmani hi Chedorlaomer ensuina thōia kum 12 leika-om hei, tâk kum 13 atluk pha chu ama anleidōi jo.

⁵Khana kum 14 atluk kum a hin Chedorlaomer leh a’nṭangpui hei seng remihei leh re kakōn heia Ashteroth Karnaima Rephaim, Hem a Zuzim, Kiriathaim phaia Emim,

⁶khana Edom tlânga Hor hei hi nêrdiram a ramri Elparan inti ram katlunga anleihnong heia kae.

⁷Khava sōa anmani ho’nle heia Kadesh (Enmishpat tia khava lai khan inhret) hmun a kahong jo hei. Anmani’n Amalek ram seng leh Hazazon Tamar ram a ka-om Amorhei anleitor heia kae.

⁸Khana Sodom Gomorrah, Adma, Zeboiim khana Bela reng 5 hei hin Siddim Phaichama anremihei anleimantûp heia,

⁹Elam, Goiim Babylonhei leh Ellasar hei chunga re tlona sik a le’ntluk hei. Reng 5 he’n reng 4 dōina kha kae.

¹⁰Khava phaicham kha khe anchona khur kōk katamtak leika-om, rehmun a inphut Sodom reng leh Gomorrah reng tlânsōt sik a anrei pha khur kōk a katla inhlut jo hei; tâk alak reng 3 hei chu tlâng ting katlânsōt heia kae.

¹¹Rn 4 hei khan Sodom leh Gomorrah khōa heirakip, sâk sik inveina anchoma kase jo hei.

¹²Abram naipa sapa Lot khava lai khan Sodom khōa aleika-om kha anei rakip leh inṭhōia ansura ankeisôn jo.

¹³Rehmun a ahei katlânsōt mi inkhat in Amor mi Mamre intipa thingkung intheng hnenga aleika-om Hebrew mi Abram hnenga ṭong rakip kha avahri pek jo. Khava lai khan Mamre leh asōpuipa Eshkol leh Aner hei kha Abram leh alei inthōsap hei kae.

¹⁴Abram in asapa Lot ansura ankei jo ti ṭong athei pha, arabuk shunga amihei re katlo thei seng abek manchun heia, mi 318 katluk hei. Anmani’n reng 4 hei kha ankahnung anthlûr heia Dan katlung anleijui hei.

¹⁵Abram in amihei arup-rup a aṭhen heia, jân pha shunga re ansō heia antor jo hei. Ama’n Damascus sak tinga Hobath katlung anhnong heia kae.

¹⁶Khana anta leichom neinâk-hei seng kha ahei kasut heia kae. Asapa Lot leh aneinâk seng, nuhmeihei leh rehringa antakei hei seng aheiṭhōi male jo hei.

¹⁷Abram in, Chedorlaomer leh a’nṭangpui renghei avator sōa ahe’nle pha, Sodom rengpa’n Shave Phai-chama (Rengphai um inti) a aleiratō.

¹⁸Khana Salem reng Melchizedek, Chunghnung Pathen thempu khan buhlom leh ju achoia Abram ava-ratō.

¹⁹Vâng apek a, “Marvân leh ralei kasyem Chunghnung Pathen in Abram kha vâng pek rasoh!

²⁰Khana na’nrepui chunga torna anikapek Chunghnung Pathen kha manpâk a om rasoh,” ati. Khana Abram in Melchizedek hneng are neinâk anta heichom male seng sôma inkhat apek a kae.

²¹Sodom rengpa’n Abram hneng, “Neinâk-hei seng chu chen ina, kamihei seng chu apek roh,” ati.

²²Abram in amasôn, “Marvân leh ralei kasyem Chunghnung Pathen hmaikunga a’ntep eng kae.

²³Khachu, nanneinâk pat razang khat a-emak leh kekōk hrui kapha inda mak ning. Kha achang inchu nang in, ‘Abram kha kei tamanhao kae’ titor mak jo tin che.

²⁴Heite inkhatbek kei bing sik a lomak ning. Kamihei tahmang rōk hei khachu kalo sik jo. Tâk-kha ka’nṭangpui hei, Aner, Eshkol leh Mamre he’nchu anchen inlo hei rasoh.”