Read Komrem A’NPHUTNA 15 Bible Online

A’NPHUTNA 15 - Komrem bible

A’NPHUTNA 15

¹Khava sōa Abram in hmangtalâr inkhat aneia RŌNGPU’n hinga ahri kha athei, “Ṭitmak roh, Abram, ke’n nang thina sik a inphut napho kachang sik eng, khana inpâkman kalentak kapek sik che.”

²Tâk-kha Abram in amasôn, “RŌNGPU Chunghnung, heimo akaṭha inpâkman napek sik eng, ke’n sa leh kha neimak enga? Kakarōi kahlō sik inkhat rōk kha Damascus Eliezer kha kae.

³Nang in sa leh kha apek mak chea, kasōk inkhat in kakarōi ahlō sik jo kae.”

⁴Khava pha RŌNGPU’n ahnenga ave nôk a ahri kha athei, “Hiva sōk Eliezer hin nakarōi hlōmak ning; nang sapa khet in nakarōi ahlō sik kae.”

⁵RŌNGPU’n vânga ama aṭhōisōt a, “Chungvân so enroh; ârsi heiso tei hei roh; sova jahrep sōn leh pâr nanei sik kae,” atipek.

⁶Abram in RŌNGPU chunga ataksen, khava jâra RŌNGPU’n achunga amalung katlâia, ama arahlânga kae.

⁷Khava pha RŌNGPU’n ahnenga, “Hiva ram hi pekna sik chea, Babylon ram a Ur a inphut nahei kaṭhōisōt RŌNGPU kha kei eng kae,” ati.

⁸Tâk-kha Abram in ader, “RŌNGPU Chunghnung, hiva ram hi keita achang sik kha heikhong mo kamanhret sik?”

⁹Ama’n amasôn, “Kum 3 akatluk et jo hei sehrat inkhat, ke inkhat, kemōng inkhat khana pherva inkhat leh vaṭhu inkhat kahnenga heichoi heiroh.”

¹⁰Abram in ranhei kha Pathen hneng aheiṭhōi heia, athat heia ṭhen hnia a-ât khōi et a, inhngettō et a, gôr hnia ada hei; tâk vahei khachu tuk rachen mak heia kae.

¹¹Hmeravōi chunga hmuthong jōng kachu hei, tâk Abram in ahnong sōt heia kae.

¹²Kani ahlutsō jo pha, Abram kaje hnger jo. Ṭit ka-om tak leh inpirna’n achunga jōng katlung jo.

¹³RŌNGPU’n ahnenga, “Natu nasa, nasōnhei kha miram a khōhmea vaka-om sik hei; anmani kha sōk vakachang sik hei, mi’n êng kasetak a kum 400 khōdeng antamanthei sik hei kae.

¹⁴Tâk-kha ke’n anmani sōk a akahmang jât-hei kha karâkna kapek sik hei, khana anmani’n khava miram kha anhei dahlon pha, nei hingja anta’nrôn sōt sik kae.

¹⁵Nang mông chu kum kasôtjap kahring sik che, malung kahōia kathi sik chea kha anhre sik che.

¹⁶Hiva hmun a hin natu-nasahei anhe’nle mak hma khang 4 chu kathleng sik jo; ajârchu Amorhei kha anṭhatmakna pui atluk a karâkna pha atluk mak kârseng ke’n hnongsōt mak hei ning,” ati.

¹⁷Kani ahlut sōa ahong inthim pha, hmeikhu kakhû bephu inkhat leh hmeiser kavârtak inkhat manhret manloa heikasōk a hmeravōihei kâra heikavârsōt.

¹⁸Khava sōa khava hmun a khan RŌNGPU’n, Abram leh intepna inkhat asyema, “Ke’n hiva ram Egypt a inphut Euphrates ramri katlung ram rakip hi nasōn-napâr hei hneng pek sik a intep eng;

¹⁹khana Kenhei, Keniz hei leh Kadmon hei ram a,

²⁰Hit-hei, Periz leh Rephaim hei ram a,

²¹Amorhei, Canaanhei, Girgash hei leh Jebush-hei ram, akhenga a’nveisa sik kae,” ati.