Read Komrem A’NPHUTNA 16 Bible Online

A’NPHUTNA 16 - Komrem bible

A’NPHUTNA 16

¹Abram kha anuhmei Sarai in sa inkhatbek um leinei pek mak. Tâk-kha amanu’n Egypt mi inkhat arahming Hagar inti sōk nuhngâk aleinei,

²khava jâra amanu’n, Abram hneng, “RŌNGPU’n kei nai amannei mak a kae. Kasōknu Hagar hi heisa mo hmun na’nchunpui mak? Ama’n kei sik sa aneipek khakhat thei eng,” ati. Abram in Sarai ṭonghri kha kahnōm jo.

³Khava jâra amanu’n Hagar kha amanbo sik a Abram apek jo. (Hivahi Abram Canaan ram a kum 10 a-omsōa akasōk kae).

⁴Abram in Hagar hmun a’nchunpuia nai avon jo. Achunghrik kha a’nhret pha hong inlensak joa, akapunu Sarai kha ahnōise jo.

⁵Khava pha Sarai in Abram hneng ahri, “Hagar in ahnōise eng hi nang taṭhe kae. Kei khet in ama kapek che kae, achung kahrik a’nhret pha ahnōise jo eng. RŌNGPU’n tu mo akadik me ṭong tan rasoh, nangmo, kei mo!”

⁶Abram in amasôn, “Kaṭha jo, ama nasōknu kae, nang ensuina thōia aka-om kae; namadu hrep kha achunga tlo roh.” Khava pha Sarai in Hagar kha ênga atlo jo pha katlânsōt jo.

⁷RŌNGPU ngeva khan nêrdiram thōia Shur sena hlam a tuiripût hnenga Hagar kha ale’nhmupui.

⁸Khana ahri, “Sarai sōknu Hagar, khona inphut ahei kasōk chea khon mo se sik nati?” Ama’n amasôn, “Kakapunua inphut ahei katlânsōt eng kae.”

⁹Ama’n, “Ahnenga inle ina asōk vachang roh,” ati.

¹⁰Khava sōa ahri nôk a, “Ke’n, nang sōn leh pâr katamtak kapek sik che, tûte’num anmani ja kha teitor mak hei ning.

¹¹Nang in sapase inkhat nanei sik, arahming Ishmael nati sik kae, ajârchu RŌNGPU’n namalung inrenga naṭana rasa athei pek jo che.

¹²Tâk-kha nasapa kha ram shakōrtung kapōa ahringkhō ahmang sik; ama mi rakip tadōi kachang sik, mi rakip ama’n adōi sik. A-innkō heia inphut ama ahlop binga ka-om sik.”

¹³Hagar abinga indera, “Ke’n Pathen kha kahmu khet mo khana khava akahrisōt sik a alakahring eng mo?” ati. Ama’n a’nbekpui RŌNGPU kha, “Akahmu sōt Pathen,” atia kae.

¹⁴Khava jâra khan mihe’n khava tuikhur Kadesh leh Bered kâra ka-om kha, “Ani kahmu Akahring Inkhat Tuikhur,” tia anphōa kae.

¹⁵Hagar in Abram sapase inkhat amatet pek a, ama’n arahming “Ishmael” aphō pek.

¹⁶Khava pha Abram kha kum 86 katluk jo.