Read Komrem A’NPHUTNA 18 Bible Online

A’NPHUTNA 18 - Komrem bible

A’NPHUTNA 18

¹Mamre a a’ntheng thingkunghei kâra Abraham hneng RŌNGPU le’nlâr. Sûn kani lumlaitak Abraham in kot kunga in-onga aleiomlai

²khō ahongthlir pha pase 3 aleikangir aleihmu hei. Anmani ahmulim hei leh an-intō sik a heikatlânsōt. Kakhup a ahmai in ralei amantôna,

³ati, “Kapuhei, châm inhngat loa chu ka-inn hi adahlon pek mak ruh; nangni inzen sik a hiva hmun a kei ka-om eng.

⁴Nanke sôpna sik a tui heichoi pek chei rong; hiva thingkung hnōia nangni châm a’nhnga pek ruh.

⁵Sâk sik um ajing heichoi rong; hivahin nanhlam hrona ratha apek sik chei. Nangni’n ka-inna nankahong hi kei kajana nantapek eng kae, hiva jâra ke’n nangni razen chei rong.” Anmani’n anmasôn, “Inpâk ka-om, kahnōm ung.”

⁶Abraham inrangtak a khōilu Pōn-inna katlâna Sarah hneng avahri, “Inrang roh, najâmdi kaṭhapen bora inkhat he’nlo roh, khana buhlom heisyem roh.”

⁷Khava sō leh ama aserup ting katlâna sehrat ate akathai inkhat akadeisōt a asōkpa apek a ama’n inrangtak a asyem jo.

⁸Ama’n sene thai ajing, sene ajing, hme leh aloa khana mihei hmaikunga sâk sik adônpek hei. Thingkung thōia khan atak-khet in arazen heia anmani’n anleisâk.

⁹Khava sōa anmani’n “Nanuhmei Sarah khon mo aka-om?” tia anleider. Ama’n amasôn hei, “Ama chu khōilu pōn-inn shunga ka-om.”

¹⁰Anmani kâra inkhat in, “Tûna inphut thlakō atluk pha kei kahong nôk sik eng, khava pha nanuhmei Sarah’n sapa inkhat anei sik kae,” ati. Ama kahnunga khan Sarah kha kot kunga kangira an-inbek aleirangei hei.

¹¹Abraham leh Sarah kha upa leikachang jo hei, khana Sarah’n thlatina apōn hmu kha leihmu mak jo.

¹²Khava jâra Sarah’n abinga aleimanuia, “Tûnchu kei kater jo eng, tûn katlunga nuhmei-pase inchunna kalaneitor sik mo? Khana kapuise’m kater joa kae,” ati.

¹³Khava sōa RŌNGPU’n Abraham hneng, “Heisik a mo Sarah’n amanuia ‘Kei hingtuk kater jo enga sa kalaneitor sik mo?’ ati.

¹⁴RŌNGPU sik a a’ntak heimo aka-om? Ke’n kahri kapōa khan tuna inphut thla 9 tlukna kei hong inle sik eng khana Sarah’n sapase inkhat amatet sik kae,” ati.

¹⁵Sarah khan aṭit jâra, “Manui mak eng,” aleiti. Mipa khan, “Kadik, namanui” ati-pek. “Namanuia kae,” ati.

¹⁶Khava sōa mihei khan khava hmun andahlona Sodom hmutheina sik hmun khat a leikase hei. Abraham khan anmani kathaksōt sik a leikase sap hei.

¹⁷Khana RŌNGPU’n abinga ati, “Ke’n katlo sik hi Abraham hnenga thup mak ning.

¹⁸Ama sōn leh pârhei kha akalen leh akahrat jât hongkachang sik hei, khana ama inphut ke’n jât rakip vâng kapek sik hei kae.

¹⁹Asahei leh asōn apâr he’n kaṭong anjuina sik, akadik leh akaṭha antlona sik, amansena sik hei tia ama hi kakadeisōt jo kae. Anmani’n khanga antlo’nchu ke’n ahnenga kalei intepna hei seng kha ama sik a katlo pek sik.”

²⁰Khava sōa RŌNGPU’n Abraham hneng, “Sodom leh Gomorrah chunga ṭit ka-om tak masetna ka-om jo khana ansetna kalen hêr jo.

²¹Ke’n kathei jo masetna hei hi akadik leh akadik mak jongsōtna sik akasesuk sik eng kae,” ati.

²²Khava sōa pase 2 hei kha Sodom kajōna kase jo hei, tâk RŌNGPU chu Abraham leh leika-om hei.

²³Abraham in RŌNGPU hneng asora aleider, “Kadiktak a nang in ṭhenakase hei leh akaṭhe hei kha nasuk manhmang sap sik jo hei mo?

²⁴Khōpuia ṭhenakase mi 50 an-om inchu khōpui pumpui nasuk manhmang sik mo? Mi 50 hei hukna sik a nang in ṭhenmak tin che mo?

²⁵Akaṭhemak hei kha ṭhena kaneihei leh inṭhōia that mak hei tin chea kae. Khachu akae theimak kae. Khachu tlothei mak tin che. Khanga natlo’nchu ṭhena kaneimak hei kha ṭhena kaneihei leh inṭhōia karâkna pek sōmna kae sik jo. Khachu akae theimak kae. Raleichung pumpuia ṭong katanpa khan kadiktak a ṭōn atlo sik kasōk.”

²⁶RŌNGPU’n, “Sodoma ṭhenakase mi 50 kahmu’nchu, anmani jâra khōpui pumpui kaṭhensōt sik,” tia amasôn.

²⁷Abraham in vōi khat ahri nôk, “RŌNGPU nahnenga kangamtak a ṭonghri manjōmna kanei jâra arangei mandam roh. Kei hi mihring inkhat hnâm eng kae, khana heikhat hrina sik um ratha neimak eng.

²⁸Tâk-kha ṭhenakase 50 changloa mi 45 leika-om khakhat thei. Khōpui pumpuia khan 5 vât jâra khan nasuk manhmang sik mo?” RŌNGPU’n amasôn, “Khōpuia khan ṭhenakase mi 45 kahmu’nchu ke’n khōpui suk manhmang mak ning.”

²⁹Abraham in ahri nôk a, “Khōpuia khan ṭhenakase mi 40 rōk ka-om thei hei.” RŌNGPU’n amasôn, “Ṭhenakase mi 40 an-om innum ke’n suk manhmang mak ning.”

³⁰Abraham in, “RŌNGPU, lungsettak a ahrângpek mak roh, kahri nôk sik kae. Mi 30 rōk an-om inne heikhong sik?” ati. Ama’n, “Ke’n mi 30 lim kahmu’nchu tlomak ning,” ati.

³¹Abraham in, “RŌNGPU, na-hnenga inngamtak a ṭong kahri manjōm jâra arangei mandam roh. Mi 20 kapō rōk an-om ine heikhong sik?” ati. Ama’n, “Mi 20 kahmu’nchu khōpui hi suk manhmang mak ning,” ati.

³²Abraham in, “Lungsettak a na-hnuk amannat pek mak roh, RŌNGPU, vōi khat kahri nôk sik jo kae. Mi 10 lim an-om ine heikhonga sik? ati.” Ama’n, “Mi 10 lim an-om innum khavakha suk manhmang mak ning,” ati.

³³Abraham leh an-inbeksō kahnunga RŌNGPU kha kasesōt jo, khana Abraham um a-inna inle jo.