Read Komrem A’NPHUTNA 19 Bible Online

A’NPHUTNA 19 - Komrem bible

A’NPHUTNA 19

¹Khava khōhlei ning marvân ngeva 2 Sodoma anhongsōk pha Lot kha khōpui sōngkunga le’n onga leika-om. Ama’n anmani ahmulim hei leh ama kathōia anmani ratō sik a leikase. Ama’n anhmai kunga le’nkuna

²khana ahri, “Kapuhei, nangni inzen sik hin kei ka-om eng. Lungsettak a ka-inna ahongpek ruh. Nanke nan-insôp a jân karekthei chei. Jîngkâr hmatak nanthōi leh kasethei sik chei.” Tâk-kha anmani’n anmasôn, “Changmak, keini khōpui shunga karek sik ung.”

³Ama’n rahnak a ahrirei jâra a-inna anmani kahong jo hei, khana Lot in asōk-hei kha buhlom leh an katui khōhmehei sik ansōngna sik ṭong apek hei. Ansōngsō pha ansâk jo.

⁴Khōhmehei khan anje mak hma Sodom mihe’n inn kha anlei kakesi jo. Khava khōpuia pase upa leh rether ankhenga le’nvei hei.

⁵Anmani’n Lot hnenga leika-ông heia anleider, “Nahnenga tuning jân akarek sik a akahong mihei kha khon mo aka-om jo hei? Kanhnenga heikeisōt heiroh!” Ajârchu Sodoma pasehei khan anmani kha anjepui hnōm heia kae.

⁶Lot kha vâng kasōk a kot alei kirsi jo hei.

⁷Ama’n anhnenga, “Ṭhōnhei hiva kapō akaṭhamak ṭōn hi tlomak ruh tia kangek chei kae!

⁸Enruh, nuhngâk intheng sanu 2 kaneihei. Nanhnenga anmani kha heiṭhōipek chei rong. Nangni’n anmani nantamanlo hnōm manlo hei ruh. Tâk-kha hiva mihei hnenga chu heite atlopek mak ruh; anmani hei hi ka-inna khōhmehei kae, ke’n anmani kahuk nger sik hei kasōk,” ati.

⁹Tâk-kha anmani’n, “Nang ram hlop a miche’n kanhlam khârmak roh! Keini tatlo sik ani inthei nang tu che mo? Sesōt roh, achangmak inchu anmani kanek a nang kha kakhôk chet a kanta manrim sik che kae,” anti. Anmani’n Lot kha annamsōt a akot vōkkhōina sik a anleitlo jo.

¹⁰Tâk-kha mi 2 hei khan anhei kabâna Lot kha innshungting anleikei manhlut a kot kha anlei khâr jo.

¹¹Khava sōa anmani’n vânga aka-om hei seng kha anvōk heia anhmit anman chopek jo hei, kot khâr leihmu tor mak jo hei.

¹²Pase 2 hei khan Lot hneng anleiti, “Hiva khōpuia hin tu mo inkhat nanei inchu — nasapa, nasanu, nakamâk hei a-emak leh aralak na-innkōhei khōpuia hin an-om sa’nchu ankhenga ṭhōisōt jo hei roh.

¹³Ajârchu hiva hmun hi kanta suk manhmang sik jo kae. RŌNGPU’n hiva mihei chunga ṭit ka-omtatak masetna hei kha athei joa Sodom kasuk inhmang sik a ahei tir ung kae.”

¹⁴Khava sōa Lot in asahei ka-ompui sik mihei hneng vakasea avahri, “Inrang ruh, hinna inphut sesōt ruh, RŌNGPU’n hiva hmun hi asuk manhmang sik jo kae.” Tâk-kha anmani’n chu, sem atlo kae tia anleimandon.

¹⁵Jîngkâr khō aheivâr jo pha ngevahei khan Lot kha a’nrangna sik anleitlo. “Inrang roh,” anleiti. “Khōpui hi kansuk manhmang pha leh nanhringkhō a’nhmang makna sik a nanuhmei leh nasanu 2 ṭhōi hei inna sesōt jo roh,” anti.

¹⁶Lot malunga inkei-chiona aleinei. Achang ravâng RŌNGPU’n ama kha lungset a aleirôn; khava jâra mihei khan ama, anuhmei leh asanuhei kha ankut a ankei heia khōpuia inphut anleiṭhōisōt hei.

¹⁷Khava sōa ngeva inkhat in, “Nanhringna sik a tlân jo ruh! Hnungting hei-en mak ruh khana phaichama inhnga mak ruh. Nanthi makna sik a hmebung heia tlân ruh,” ati.

¹⁸Tâk-kha Lot in amasôn, “Chang-mak, lungsettak a khava khachu amantlo mak ruh.

¹⁹Nangni’n lum nannilo hêr khana kahringkhō na-nihuk pek jo. Tâk-kha hmebunghei so chu kahla hêr hei; sona son katlung mak hma insuksetna’n aniphâk sik a kha kathi bei sik eng.

²⁰Sova khōpuite so nahmu mo? Sova so kahnaitek. Kei sova hmun a vase rong, hmun kasintek kae nang in nahmu, son kei inhukthei sik eng,” ati.

²¹Ama’n amasôn, “Kaṭha jo, ka-hnōm eng. Sova khōpui so ke’n suk manhmang mak ning.

²²Inrang roh! Tlân roh! Sova hmun natlung mak kârseng kei heite tlotor mak jo eng.” Lot in ahmun kha khōte aleiti jâra akhō kha Zoar tia aphō jo.

²³Zoar hmun kha Lot in aheitlung pha kani leikasōk bia kae.

²⁴Manhret lo theiloa RŌNGPU’n Sodom leh Gomorrah khōpui chunga kât hmei kakâng ajōng mansûr jo,

²⁵ram leh phaicham pumpui, khana mipui rakip leh aleikakek neinâk rakip amankâng vâmpet jo.

²⁶Tâk-kha Lot nuhmei in akahnungting alei ena, amanu kha chi chopui kachang jo.

²⁷RŌNGPU hmaikunga aleingirna hmun a khan ajîng jîngkâr hmatak a Abraham kha inhnottak a leikase.

²⁸Ama’n Sodom leh Gomorrah khana phaicham pumpui alei-en pha, ram a inphut ahei kasōk hmeikhu kha ratap kalentak inkhat a inphut ahei kasōk kapōa aleihmu.

²⁹Tâk-kha Pathen in Lot omna phaichama khōpuihei kha aleisuk manhmang pha Abraham kha amalunga aleimandon khana Lot kha insukset makna hmun a aleimansesōt a kae.

³⁰Lot in Zoar a om sik aleiṭit jâra asanu 2 hei leh hmebung leikake heia khur kōk inkhat a leika-om hei.

³¹Asanu upanu khan anainu hneng, “Nipa heikater chet-chet jo, raleichung pumpuia eini ani ka-ompui sik sa ani’nnei sik pase om mak jo hei.

³²Hong roh, nipa hi nijepui leh asa ninei theina sik ju manrui jo rih,” ati.

³³Khava jân khan anmani’n anpa kha ju anlei man-ina asanu upanu khan hmun ale’nchunpui jo. Tâk-kha ju a’nruirei jâra khava omchen kha anpa khan leimanhret mak.

³⁴Ajîng kania khan asanu upanu khan anainu hneng, “Jâning jân kei leh rakhum inchun jo ung, tuning jân um ju manrui nôk rih, khana nang ama leh jesap ruh. Khan chu nipa inphut sa inkhat ṭim ninei sik jo,” ati.

³⁵Khana khava ning jân a khan ju anmanrui jo, khana asanu naipangnu leh apa kha rakhum le’nchun jo hei. Anpa khan ju a’nruirei jâra khava omchen kha leimanhret nôk mak.

³⁶Khang’khan Lot sanu an-inhnibât a anpa chia inphut chunghrikna anleinei jo.

³⁷Asanu upanu khan sapa inkhat anei khana arahming Moab tia aleiphō. Ama kha tûnlaia Moab mihei anpa anpu kha kae.

³⁸Asanu naipangnu kha’num sapa inkhat anei, arahming Benammi tia aleiphō. Tûnlaia Ammon mihei anpa anpu kha kae.