Read Komrem A’NPHUTNA 20 Bible Online

A’NPHUTNA 20 - Komrem bible

A’NPHUTNA 20

¹Abraham in Mamre adahlona Canaan thlâng ting kasea Kadesh leh Shur kâra khō asât a leika-om. Hnunga Gerara a-omlai,

²ama’n anuhmei Sarah kha asernu kae tia aleihri, khava jâra Gerar rengpa Abimelech in mi atira ahnenga Sarah kha ahong manṭhōi hei.

³Ni khat jân a arahmanga Pathen le’nlâra hing’hin aleihri, “Enroh, hiva nuhmei hi nahong ṭhōi jâra nang akathi sik jo che kae, ajârchu ama chu inn aneisa jo kae.”

⁴Tâk-kha Abimelech khan amanu kha leihnai mak hi, khana ama’n ati, “RŌNGPU kei ṭhena neimak eng. Nang in kei leh kamihei nasuk manhmang sik ung mo?

⁵Abraham atak-khet in amanu hi kasernu ati kae khana amanu’num khanga aleiti tlit kae. Hivahi ke’n malung inthengtak a kaleitlo kae, kei ṭhena heite neimak eng.”

⁶Pathen in arahmanga amasôn, “Kadik, nang in malung inthengtak a natlo kha kamanhret; khava jâra kahnenga setna natlâk makna sik amanu kha kamantôn mak che kae.

⁷Tâk-kha tûnchu nuhmeinu kha apuise hneng pek male nôk jo roh. Ama kha sânkathem kae. Nathi makna sik a ama’n Pathen hneng aderpek sik che. Nang in napek male mak inchu, nang akathi sik che kae, nang leh namihei nankhenga.”

⁸Abâna jîngkâr hmatak a Abi-melech in aṭōnpui karônhei kha abek heia aleikasōk omchen kha ahri pek jo hei, anmani kaṭihêr jo hei.

⁹Khava sōa Abimelech in Abraham kha abek a ṭong ader, “Nang in kanhnenga heimo natlo jo? Ke’n nahnenga heimo kaṭhe joa kei leh karengram chunga hiva inreng khōdeng theina nahei mansōk hi? Tûte’num natlo kapōa kachunga atlo mak hei ning.

¹⁰Heijâra mo hivahi natlo?”

¹¹Abraham in amasôn, “Hivahin Pathen kaṭit tûte om mak hei ninga kha kanuhmei ompuina sik a kei anithat sik eng tia kaleimandon.

¹²Kadiktak a ama hi kasernu kae. Ama hi kapa sanu kae, kannu chu inchun mak, ke’n ka-ompui jo kae.

¹³Khana Pathen in kapa inna inphut ram hlop a aheiṭhōisōt ting eng khan, ke’n ahnenga, ‘Nang in kei hi mi rakip hneng nasōpui eng tia nahri sōtna vâng khan nang in kei ṭong heituk a najui mo ti kha namalâr sik kae,’ kalei ti.”

¹⁴Khava sōa Abimelech in Sarah kha Abraham hneng apek male jo, kha leh inṭhōia Abraham kha ke, kemōng, se khana sōk-hei aleipeksa a kae.

¹⁵Ama’n Abraham hneng, “Hinahin karam seng kha ka-om; nang in namaduna hmun a om roh,” ati.

¹⁶Ama’n Sarah hneng, “Nang heite ṭhena neimak che ti manhretna dangka lishing inkhat hi nanta-ompui rakip hei hmaikunga nasōpuipa hnenga ke’n kapek kae; mi rakip in nang ṭhena neimak che ti anmanhret sik a kae,” ati.

¹⁷Abraham nuhmei Sarah chunga omchen kha aleisōk jâra khan RŌNGPU’n Abimelech reng-innpuia ka-om nuhmei rakip in sa anneithei makna sik atlopek jo hei. Khava jâra Abraham in Abimelech sik a aleider pek a Pathen in amandam jo. Ama’n anuhmei leh asōk nuhmei he’m nai anhōrna sik aleimandam heia kae.