Read Komrem A’NPHUTNA 21 Bible Online

A’NPHUTNA 21 - Komrem bible

A’NPHUTNA 21

¹RŌNGPU’n aṭong leitep dungjuia Sarah vâng aleipek jo,

²khana Abraham in upa ahongchang jo pha anuhmei kha achung kahrik joa Abraham sapa inkhat amatet pek jo. Pathen in nai anei sik ati phatak a khan sapa kha aleimatet jo.

³Abraham in Isaac tia arahming aphō jo,

⁴khana Isaac khan ni 8 atluk jo pha Pathen mansena dungjuia Abraham in asapa vun aleitanpek.

⁵Isaac a’ntet pha Abraham akum 100 katluk jo.

⁶Sarah’n, “Pathen in inpâkna leh manuina ahei rôn pek jo eng. Hiva ṭong kathei rakip in inpâk a anmanui pui sik eng,” ati.

⁷Khava sōa amanu’n ahrisa, “Sarah’n nai amatet a netui aman in sik ti hi Abraham hneng tu’n mo aleihri pek sik? Achang inum upa achang shunga ke’n sapase inkhat kanei pek jo.”

⁸Naipang kha hong kakhang jo, anetui in abâng ning khan, Abraham in sâktlâng kalentak aleitlo.

⁹Egypt jōrnu Hagar tamatet Ish-mael leh Sarah sapa Isaac le’ndei hei, sem leh sôk anleitlo.

¹⁰Sarah’n ahmu heia Abraham hneng ahri, “Sōknu leh asapa hi hnongsōt heiroh. Kasapa Isaac in nakarōi achen sik kha hivanu sapa hin insempui thei hêrmak ning.”

¹¹Hivahin Abraham malung aleitôn hêr; ajârchu Ishmael kha’m asapa kae.

¹²Tâk-kha Pathen in Abraham hneng, “Pasenai leh nasōknu sik a malung hōimak tlomak roh. Sarah’n tlo roh ati rakip kha tlo roh. Ajârchu kalei intepna nasōn-napâr hei kha Isaac hruia inphut nanei sik hei kae.

¹³Sōknu sapa kha’m sa leh nai katamtak kapek sik, jât inkhat hongkachang sik hei,” ati.

¹⁴Abraham in ajînga jîngkâr hmatak kathōia buhlom leh shavun penga tui kha Hagar aleipek. Naipang kha amanu amanpōk a aleitirsōt jo. Amanu’n Abraham leh an-inṭhen kahnunga Beersheba ramhâng rajeia kalôn lelea ka-om jo.

¹⁵Shavun penga tui kha atlang jo pha, asa kha hnômbia amanjea adahlona

¹⁶metre 100 inkâr hmun a in-onga leika-om. Amanu abinga inbek a, “Kasapa kathi kahmu sik hi ke’n detor mak ning,” ati. Amanu’n khava hmun a ale’n ong pha amanu leikaṭap joa kae.

¹⁷Naipang kaṭap kha Pathen in aleithei, marvâna inphut Pathen ngeva he’n Hagar hneng, “Nachâmna heimo ka-om, Hagar? Ṭitmak roh. Naipangpa ṭap rasa Pathen in athei jo.

¹⁸Thōi roh, se’na ama so vapom roh khana vamathlem roh. Ama sōn leh pâr a inphut ke’n jât kalentak inkhat kasyem sik kae,” ati.

¹⁹Khava sōa Pathen in ahmit amahlâng pek a tuikhur inkhat amanhmu. Ama kasea shavun penga tui avathea asapa’m ajing aman in jo.

²⁰Pathen in naipangpa kha ahong khang leh inṭhōia a-ompui. Ama Paran ramthip a ka-oma shahnong kathem hongkachang jo.

²¹Anu’n ama nuhmei sik Egypt a inphut aleijong pek.

²²Khava pha Abimelech in re-hlam kakei Phicol leh inṭhōia kasea Abraham hneng ahri, “Nang in natlona rakip a Pathen in a-ompui che.

²³Khava jâra tûntak hin Pathen rahminga nang in kei leh kasahei hneng, a-emak leh kasōn kapâr hei hneng ahōn mak ning tia intepna nei roh. Ke’n nahnenga kaṭha nenga katlo che kapōa nang innum kei hneng leh na-omna ram a hin kaṭha natlo sik eng tia intepna nei roh.”

²⁴Abraham in, “Kei intep eng,” ati.

²⁵Abimelech sōk he’n rumhrat a anta leilo tuikhur jâra Abraham in inphinna aleinei.

²⁶Abimelech in ahri, “Khavakha tu’n mo aleitlo manhret mak eng. Nang innum hiva ṭong hi kahnenga leihri mak che, khana hivahi ahma inkeipen katheina kha kae.”

²⁷Khava sōa Abraham in kemōng leh se ṭhahrep Abimelech hneng aleipek khana an-inhnia inhnōmna inkhat anleinei.

²⁸Abraham in kemōng rup a inphut kemōngte 7 aleiṭhensōt hei.

²⁹Abimelech in Abraham hneng, “Heisa mo khavakha natlo?” ati.

³⁰Abraham in amasôn, “Hiva kemōng 7 hei hi inlo roh. Hiva tlona hin ke’n tuikhur hi kaleicho kae ti hi nang in nahnōmna kae.”

³¹Khava jâra ahmun kha Beersheba tia anphō jo, ajârchu khava hmun khan anmani 2 ṭong le’ntep heia kae.

³²Khang’khan anmani’n Beersheba a ṭong intepna inkhat anleinei sōa Abimelech leh Phicol kha Philisti ting inle jo hei.

³³Abraham in Beersheba a hmeila kapō thingkung inkhat alinga, akahring ṭhak RŌNGPU Pathen kha akamuk a kae.

³⁴Philisti ram a pha kasôttak aleibera Abraham leika-om.