Read Komrem A’NPHUTNA 25 Bible Online

A’NPHUTNA 25 - Komrem bible

A’NPHUTNA 25

¹Abraham in nuhmei hlop Keturah intinu anei nôk.

²Amanu’n Zimran, Jokshan, Medan, Midian, Ishbak, leh Shuah aneipek.

³Jokshan hi Sheba leh Dedan hei pa kae. Dedan sōn leh pârhei kha Asshurim, Letushim leh Leummim hei kae.

⁴Midian sapahei kha Ephah, Epher, Hanoch, Abida leh Elda hei kae. Hihei hi Keturah sōn leh pârhei kae.

⁵Abraham in anei rakip Isaac hneng aleidahlon pek;

⁶tâk ama alei hring lai seng anuhmei hlop-hlop sahei hneng chu kutchoi aleipek hei. Khana hiva sapahei hi Nisōtinga ramheia asapa Isaac a inphut inkâra atirsōt hei.

⁷Abraham akum 175 katluk a katerbera kathi.

⁹Asapa Isaac leh Ishmael in Mamre nisōtinga ka-om Hit mi Zohar sapa Ephron intipa hleia Machpelah Hlungkhura khan anleihre jo.

¹⁰Hiva hlei hi Abraham in Hit-heia inphut aleirachôk kae. Khava hmun a khan Abraham leh anuhmei Sarah anleivûm hei.

¹¹“Kei Ani kahmu Akahring Inkhat Tuikhur” inti hnenga aleika-om Isaac kha Abraham thisōa Pathen in mahâmṭhat aleipek.

¹²Sarah sōknu Egypt jōrnu Hagar in Abraham sa aleinei Ishmael khan

¹³hiva sōn leh pârhei, an-intetna dungjuia abân bâna inpek hei: Nebaioth, Cedar, Adbeel, Mibsam,

¹⁴Mishma, Dumah, Massa.

¹⁵Hadad, Temah, Jetur, Naphish leh Kadema hei hi kae.

¹⁶Anmani hi phung 12 hei anpu sōnhei kae; khana hiva rahminghei hi ankhō tlâkna leh anrephōr matungna hmunhei kha anleimanrôna anleiphō hei.

¹⁷Ishmael kha athi pha akum 137 katluk jo.

¹⁸Ishmael sōn leh pârhei khan Assyria hrona Egypt nisōtinga Havilah leh Shur kâra khō anleisât hei. Abraham sōn leh pâr heia inphut ahlop a leika-om hei.

¹⁹Abraham sapa Isaac thuhming kha hi kae. Isaac apa chu Abraham kae.

²⁰Laban unu khana Bethuel (Mesopotamia inphut Aram jât) sanu Rebecca kha anuhmei sik a a-ompui pha Isaac akum 40 leikatluk jo.

²¹Rebecca kha sa aneimak jâra Isaac in RŌNGPU hnenga nuhmei sik a aleider. RŌNGPU’n amasôn pek a Rebecca kha achung hong kahrik jo.

²²Nai a’nphir hei amatet sik leikasōk, khana an-intet mak hma von shunga anmani kha inre ṭhak hei. Khava jâra ama’n, “Heisik a mo kachunga hing’hin kachang jo?” ati. Khava jâra RŌNGPU hneng ṭong masônna inkhat kader sik a leikase.

²³RŌNGPU’n amanu hneng ahri pek, “Navon shunga jât 2 ka-om hei; Nang in inre-indōia ka-om jât 2 namatet sik hei. Inkhat in inkhat kanek a kahrat chet sik. Upa khan anaipa arazen sik kae.”

²⁴Amanu saneina sik pha kha ahong tlung jo pha, khana ama’n sapa a’npher 2 aleinei hei.

²⁵Ahma kakei kha kasenthim, khana avun kha ahme kakai pōn apō, khava jâra arahming Esau tia anphō.

²⁶Inhni tlukna khan Esau kerahmit amatutlit a hong inte, khava jâra arahming Jacob tia anphō. Anmani annei hei pha Isaac kha kum 60 katluk jo.

²⁷Naihei hong kalen jo hei, Esau shachâng kase kathem hongkachang, ramsōk-vângsōk hringkhō indu leikae, tâk Jacob chu inna sip tia om indu mi kae.

²⁸Isaac in Esau kha lum alodet, ajârchu ama’n ahei choi ramshahei aleisâk ria kae. Rebecca’n chu Jacob kha aleilungset det.

²⁹Ni khat Jacob in be kara aleibut a aleiomlai Esau shachânga inphut hong inlea kae. Avon leikaṭâm hêr

³⁰khana Jacob hneng, “Kei vonṭâm kade jo; sâk thei nasōng akasenjap kha ajing ahei pe roh,” ati. (Khava jâra arahming Edom anti).

³¹Jacob in, “Nang upa changna ratha neina kha kei napek sik eng inchu, hivahi kapek sik che,” ati.

³²Esau in, “Kaṭha jo! Kei thi rong kati jo; upa changna ratha neina khan heimo kei sik ṭhatchômna ka-om sik?” ati.

³³Jacob in, “Hmapena na-upa changna ratha neina kha kapek sik che tia intepna nei roh,” ati. Esau in intep a a-upa chang ratha neina kha Jacob apek jo.

³⁴Khava sōa Jacob in buhlom ajing leh antui ajing aleipek jo. Ama’n sâk sik, in sik asâk a-insō leh kathōia kase jo. Khavakha Esau in upa changna ratha neina heitea asakmakna kha kae jo.