Read Komrem A’NPHUTNA 28 Bible Online

A’NPHUTNA 28 - Komrem bible

A’NPHUTNA 28

¹Isaac in Jacob abek a alei-rahlâng khana ahnenga, “Nang Canaan jōr ompui mak roh.

²Khava kanek a Mesopotamia ram a napu Bethuel khōa se roh. Nanu ṭapa napu Laban sanu nuhngâk-hei kâra inkhat va-ompui roh.

³Nang hi phung katamtak hei pa nachang theina sik, Akahratpen Pathen in na-inn nei sik hi vâng pek che rasoh khana sa leh te katamtak pek che rasoh!

⁴Ama’n Abraham hneng vâng aleipek kapōa nang leh nasōnhei chunga vâng pek chei rasoh; Pathen in Abraham aleipek jo, nava omna ram kha nang chen chang jo rasoh,” ati.

⁵Khang’khan Isaac in Jacob kha Mesopotamia ram a Aram jât, Bethuel sapa khana Jacob leh Esau hei nu Rebecca ṭapa Laban apu hnenga atir jo.

⁶Isaac in Jacob vâng apek a Mesopotamia ram a nuhmei kajong sik atir jo ti hi Esau in amanhret jo. Khana Isaac in vâng apek lai khan Canaan nuhmei a-ompui makna sik a ṭong apek ti hi’m aleimanhret jo.

⁷Jacob in anu-apa ṭong ajuia Mesopotamia ram a kase jo ti aleimanhret jo.

⁸Khan nôk chu apa Isaac in Canaan jōr ompui sik hichu hnōm mak ti hi Esau in amanhret a kae.

⁹Khava ênga Esau in Abraham sapa Ishmael hneng kasea asanu Malahath, Nebaioth sernu kha ava ompui jo.

¹⁰Jacob in Beersheba adahlona Haran ting leikase jo.

¹¹Kani atlâk jo pha ama hmun intheng inkhat a kahonga khana khan karek jo. Hlung inkhat lukhama aneia leikaje.

¹²Arahmanga raleia inphut marvân katlung keirâk inkhat intung khava chunga ngevahei akaketou leh akaṭumsuk aleihmu hei.

¹³Khana khan RŌNGPU’n ahnenga leikangira kae. Ama’n, “Kei Abraham leh Isaac Pathen RŌNGPU eng kha kae. Nang in najena ram hi nang leh nasōn-napâr hei kapek sik chei kae.

¹⁴Nasōn-napâr hei kha raleichunga vaiphin kapōhrep a anja katam sik hei. Anmani’n ramkei rakip a anramri anmanlensa sik, khana nang leh nasōnheia inphut jât rakip vâng kapek sik hei.

¹⁵Mandon sōt roh, nasena rakip a ka’nṭhōipui sik che khana kahrung sik che, khana hiva ram hin kaheiṭhōi male sik che, nahnenga kalei intepna rakip hui atlungmak kârseng ke’n nang masō mak che ning,” ati.

¹⁶Jacob in ajea inphut hongkathōia ati, “Hinahin RŌNGPU ka-om! Ama hiva hmun a hin ka-om, kei leimanhret mak eng!”

¹⁷Ama kha kaṭi joa, “Hivahi heituk a ṭit ka-om hmun jo mo! Hivahi Pathen inn kachang nger sik; marvân kot inhlang kachang nger sik,” ati.

¹⁸Jacob in jîngkâr hma kathōia alukhamna hlung kha aloa mandonsōtna inkhat a aphun jo. Khava chunga olive thai abun thlōna Pathen hneng aleitōk jo.

¹⁹Ama’n ahmun kha Bethel tia aleiphō. (Hmalai khan chu Luz tia alei inhret khōpui kae.)

²⁰Khava sōa Jacob in Pathen hneng ṭong intep a ahri, “Kei kahlam hrona hin na’nṭhōipui enga khana nahrung enga, sâk leh in, si leh kei napek eng inchu,

²¹khana kapa inna kamōng tak a kahong inle’nchu, nang ka-Pathen kachang sik che.

²²Khana tuninga mandonsōtna hlung kaphuna hmun hi nang kamukna inn kachang sik khana napek sik eng neinâk rakip a sôma inkha-khat kapek sik che.”