Read Komrem A’NPHUTNA 29 Bible Online

A’NPHUTNA 29 - Komrem bible

A’NPHUTNA 29

¹Jacob kha khang’khan nisō ramting leikase.

²Manhret phâkloa khava hlei razeia tuikhur inkhat akimvea kemōng rup thum inbok hret-hrōt avaratō jo. Tuikhura inphut kemōng rup-hei kha tui antaman-in ri hei kae. Tuikhur kha asingna hlungpek kalentak leika-om.

³Kemōng rup rakip anhong inchun pha leh ankakhemhei khan hlung kha antamaliksōt a tui kha antaman-in hei kae, khava sō leh hlung vâng khan antasing male nôk kae.

⁴Jacob in kemōng kakhemhei hneng, “Nangni khontinga mi chei mo?” tia ader hei. Anmani’n anmasôn, “Haran khōa mi ung kae.”

⁵Ama’n, “Nahor tupa, Laban nanmanhret mo?” ati hei. Anmani’n, “Kanmanhret,” anti.

⁶“Ama kadam mo?” tia ader hei. Anmani’n, “Ama kadam. Enroh, asanu Rachel kemōng rup aheihe heia akahong so” anti.

⁷Jacob in, “Kani la’nshânga, innting sena sik pha’m lachang mak a, heisa mo tui nanman in sō hei leh avea phi nanta mansâk mak hei?” ati.

⁸Anmani’n anmasôna, “Kemōng rup rakip hin anho’ntûp sō leh hlung hi kanmaletsōt mak hma seng chu khanga tlomak ung, khava sō rōk khan kemōng rup-hei hi tui kantapek sik hei kae,” anti.

⁹Jacob in anmani khang’khan a’nbekpuilai hei, Rachel kha akemōnghei leh heikatlung jo.

¹⁰Jacob in Rachel kha apu Laban kemōng rup leh aheihmu pha, kasea hlung kha’m amalik sōt pek a, kemōnghei kha tui aman in jo hei.

¹¹Khava sōa ama’n Rachel kha amajôp a, inpâk reia kaṭapsōt a kae.

¹²Jacob in, “Kei napa sernu, Rebecca sapa eng kae,” tia ahri pek. Amanu katlâna apa ava manthei;

¹³khana apa’n atupa Jacob ahongna ṭong kha athei pha, inhmupui sik a heikatlân, akakōa amajôp a, inna aheiṭhōi manhlut. Jacob in omchen kasōk rakip Laban hneng ahri pha,

¹⁴Laban in, “Kadik, nang kei thisen karavōi khet che kae,” ati. Jacob khana khan thla khat katlung bit leika-om.

¹⁵Jacob hneng Laban in “Katupa nachang jâra mankasea kaṭōn natlo sik changmak. Hlōman heija mo kapek sik che?” tia ader.

¹⁶Laban in sanu 2 anei hei; upanu rahming Leah, naipangnu rahming Rachel inti hei.

¹⁷Leah in ahmit a lâr asō, tâk Rachel arōng enhnōm kakai khana ahme kaṭha.

¹⁸Jacob leh Rachel kha le’nlungset hei, khava jâra ama’n, “Rachel leh naman om sik ung achang inchu nang sik kum 7 ṭōn katlo sik,” ati.

¹⁹Laban in amasôna, “Milak kapek sik kanek a nang kapek sik che; kei leh hin om rih,” ati.

²⁰Jacob in Rachel kha chenna sik kum 7 ṭōn aleitlo, Rachel kha amadu jâra apha kha bongkhat rōk kapōa aleithei.

²¹Khava pha, Jacob in Laban hneng, “Pha kha katluk jo, nasanu ompui jo rong,” ati.

²²Khava jâra Laban in, hmōiṭhōi revei inkhat atloa mi rakip abek hei.

²³Tâk-kha khava jâna khan, Laban in Rachel kahlânga Leah jôk Jacob hneng aleiṭhōi pek, Jacob in ale’nchunpui jo.

²⁴(Laban in asōknu Zilpah kha asanu Leah inzen sik a aleipek.)

²⁵Jacob in khōvâr mak hma seng, ajepuinu kha Leah achang leimanhret mak. Laban hneng kasea, “Heisa mo hinga kahnenga natlo? Ke’n Rachel hlona ṭōn katlo kae. Heisa mo nahōn eng?” ati.

²⁶Laban in amasôn, “Sanuhngâk upanu mak hma, anainu’n puise anei sik hi hiva ram ngai changmak.

²⁷Inn-nei rehōi kani vekhat hi a’nchai sik hngâk hi roh, nang in kum 7 ṭōn nalatlo pek sik eng inchu, ke’n Rachel kapek sik che.”

²⁸Jacob kahnōm jo, khana luhông rōi Kanive kha athlengsō pha, Laban in asanu Rachel kha anuhmei sik a apek jo.

²⁹(Laban in asōk nuhngâk Bilhah kha asanu Rachel inzen sik a aleipek).

³⁰Jacob in Rachel kha’m ale’nchunpui jo, khana Leah kanek a amalungset chet a kae. Khana ama’n Laban sik a kum 7 ṭōn aleitlo nôk a kae.

³¹RŌNGPU’n Leah kha Rachel kanek a apuise lungsetna katlôm ti amanhret a asaneina sik a asyempek, tâk Rachel chu kachinga leika-om.

³²Leah in nai ahong vona sapa inkhat amatet. Ama’n, “RŌNGPU’n ka’nrengna ahmupek jo eng, tûnchu kapuise’n alungset sik jo eng,” atia, ama’n arahming Reuben tia aleiphō.

³³Ama nai avon nôk a, sapa inkhat amatet nôk. Ama’n, RŌNGPU’n hiva sapa hi’m apek nôk eng; ajârchu kei hi kapuise’n alungset mak ti hi ama’n atheia kae; khava jâra ama’n arahming Simeon tia aphō.

³⁴Vōi khat nôk nai avon nôk a pasenai ather inkhat amatet nôk. Ama’n, “Tûnchu kapuise’n alungsetna eng kahnet tlit sik jo, ajârchu sapase 3 tak kanei pek jo,” ati; khava jâra arahming Levi tia aphō.

³⁵Khava sōa nai avon nôk a athera pasenai inkhat amatet nôk. Ama’n, “Tûn pha hinchu ke’n RŌNGPU kha kachoi ka-ân sik,” ati. Khava jâra arahming Judah tia aleiphō. Khava sōa chu avonchoi kabâng jo.