Read Komrem A’NPHUTNA 3 Bible Online

A’NPHUTNA 3 - Komrem bible

A’NPHUTNA 3

¹Tûnchu, RŌNGPU Pathen kutsyem kâra mari inti hi lungthim kaṭhamak pen kae. Mari khan nuhmeinu ader, “Rahōna kakek theikarahei sathei hêrmak tin chei, tia Pathen in ati chei mo?”

²Nuhmeinu khan amasôn, “Rahōn shunga thingkung kara rakip kansâk thei,

³rahōnlaia kakek thing kara tei loa. Pathen in khava thing kara kha sâk mak ruh khana atônbek um tônmak ruh khana khavakha kantlo’nchu akathi sik ung kae ati.”

⁴Mari khan amasôn, “Khavakha dikmak. Nangni thimak tin chei.

⁵Nangni’n theikara kha nansâk pha leh nanhmit amanvâr sik a kha, akaṭha leh akase nanmanhret sik a kha Pathen leh in-ang sik chei ti hi amanhret a, kha ati kae.”

⁶Nuhmei khan thingkung kha heituk a enkahōi mo, khana akara kha sâk a heituk a akatui sik mo khana singna chen sik kha’m heituk a a’nlak sik mo tia aleihmu jo. Khava jâra nuhmeinu khan ajing aṭhōt a asâk jo. Apuise’m ajing apek a asâk jo.

⁷Khava sōa anhmit heikavâr joa pōn leh derkei loa ka-om ung ti inhret jo hei. Khava jâra theichangbō ankaṭhui manchuna antaksa inkhuna jo hei.

⁸Khava khōhlei ning RŌNGPU Pathen rahōna ahong kha anleithei jo, khana anmani’n thingkung kâr heia le’nthup jo hei.

⁹Tâk-kha RŌNGPU Pathen in pasepa abek a, “Nang khon mo aka-om che?” ati.

¹⁰Khava pha pasepa khan amasôn, “Rahōnna Narasa kathei, pōnbōia ka-om jâra kaṭit chea a’nthup eng kae.”

¹¹Pathen in, “Tu’n mo nang pōnbōia ka-om che ati? Samak ruh tia ṭong kapek chei theikara kha nantasâk jo mo?” tia ader.

¹²Pasepa khan amasôn, “Hinahin naman ompui eng nuhmeinu hin theikara kha apek enga, ke’n khavakha kaleisâk jo.”

¹³RŌNGPU Pathen in nuhmeinu ader, “Heijâra mo hivahi naleitlo?” Nuhmeinu khan amasôn, “Mari khan khava sâkna sik ahōn mathlâk enga kae.”

¹⁴Khava sōa RŌNGPU Pathen in mari hneng khan, “Hivahi natlo jâra karâkna nachen sik jo kae; ranhring rakip kâra nang rōk in hiva hâksêrna hi naratō sik kae: tuna inphut nabok a a’nsôn sik che kae. Nahring lai seng vaiphin nasâk a aka-om sik che kae.

¹⁵Nang leh nuhmeinu kâra in-enkadana kaman om sik jo; nuhmeinu sōn in nalu asukkhōi sik khana nang in asōn apâr kerahmit namachuk pek sik kae,” ati.

¹⁶Khana ama’n nuhmei hneng khan, “Nachung hriklai leh nasa neilai nanat kamanhnak sik, khōdeng kamanthei sik che. Kha’num napuise madu rangeina chu naneiṭhak sik, kachanga napuise thōia aka-om sik che kae,” ati.

¹⁷Khana ama’n mipa hneng khan ahri, “Nanuhmei ṭong narangeia ke’n sathei mak tin kalei ti theikara kha nasâk jo. Naṭōntlo jâra ralei in hâksêr achen jo. Nahringkhō shung senga sâk leh in hmuna sik a ṭōn rahnak a natlo sik kae.

¹⁸Ralei hin phi leh rahling hingja amankek sik, khana nang in ram a thingbō rōbōhei nasâk sik kae.

¹⁹Ṭōn rahnak a natloa raleia heikhat mankekna sik natlo sik kae; nataksa inphut ahong kasōk narathlen man na’nsâk sik kae. Nang raleia inphut ansyem che kae khana raleia na’nle mak kârseng hinga natlo sik jo kae.”

²⁰Adam khan anuhmei kha Eve tia aphō jo, ajârchu amanu khan raleichunga mihring rakip nu kachang jo.

²¹Khana RŌNGPU Pathen in shavun heia pōn asyema Adam leh Eve kha amansi jo hei.

²²Khava sōa RŌNGPU Pathen in, “Tûnchu mihring in akaṭha heimo khana akase heimo manhretna anneia eini kapō kachang jo hei. Anmani hi kumsôt anhring makna sik hringna akapek thing kara hi mansâk mak sik jo hei kae,” ati.

²³Khava jâra RŌNGPU Pathen in anmani kha Eden rahōna inphut ahnong sōt jo hei. Khana anmani insyemsōtna raleia khan hlei amanthlō jo hei.

²⁴Khava sōa Eden rahōn nisō intongting ama’n ranhringhei leh akimvea a’nlek lele hmeimale Chemjâm inkhat ada jo. Hivahi hringna thingkung kha mihe’n anhei hnaithei makna sik a kae.