Read Komrem A’NPHUTNA 32 Bible Online

A’NPHUTNA 32 - Komrem bible

A’NPHUTNA 32

¹Jacob in khanga thlang ting asena Pathen ngeva ṭhahrep leh intō hei.

²Jacob in anmani ahmu hei pha, “Hiva hmun hichu Pathen rephōr kae,” ati. Khava jâra ama’n khava hmun kha ‘Mahanaim’ tia aphō.

³Edom ram a a-upa Esau hneng hmadet a ṭong kapek sik a mihei Jacob in aleitir hei.

⁴Ama’n anhnenga antavahri sik kha amanthei hei, “Nasōk ṭong kajuipa Jacob in hing’hin ahei hri, kei Laban hneng kaleiom jâra kahong inle hi akasôt jo eng kae.

⁵Ke’n sehrat hei, shakōrtung hei, kemōng, ke leh sōk kaneihei. Ke’n, nang lungsetna kachen theina sik a tia ka-u nahnenga mi kahei tira ṭong kahei manrôn che kae,” ati.

⁶Ṭongkarônhei kha anhong inle pha Jacob hneng anhri, “Na-u Esau hneng keini vakase jo ung, khana ama chu nang intōpui sik hong aphut jo. Ama leh pase 400 aheiṭhōi hei.”

⁷Jacob kha kaṭi jo khana amalung kadong jo. Khava jâra aheiṭhōi hei kha rup hnia aṭhen jo hei. Hi leh inṭhōia kemōng, ke, sehrat leh sharîngsei hei kha aṭhen jo hei.

⁸Ama’n, “Esau in ahonga hma-inkeihei kha abuhlu hei inum, rup khat chu inhuktor sik ung,” tia amandon.

⁹Khava sōa Jacob in derna anei, “Kapu Abraham Pathen leh kapa Isaac Pathen, arangei pek roh! RŌNGPU nang in karam ka-innkōhei hnenga ka’nlena sik a naleihri pek eng khana heirakip injenpet sik naleiti.

¹⁰Nasōk kei hneng khava lungsetna leh taksen theina kachunga nanei eng kha karahōi changmak tia inhret eng. Ke’n Jordan karakanlai khōnghre inkhat rōk leh leikase eng, khana tûnchu hiva rup-hei hi leh hong inle jo eng.

¹¹Kader che kae, ka-u Esaua inphut ahuk roh. Kei kaṭi eng, kaṭitna khachu nuhmei naipang ṭhenloa kankabuhlu sik leh kankhenga suk manhmangna sik a ama kahong joa kae.

¹²Nang in kahnenga ṭong natep a heirakip kei sik a injenpet sik, mihei tatei tor mak sōn leh pâr tui-ôngpui panga nêrdi kapōhrep kapek sik che naleiti kha amandonsōt pek roh.”

¹³Jân kha khana khan arek sōa, aranhei kâra a-upa pek sik kutchoi aleikadei jo hei: kepui 200 leh keche 20, kemōngpui 200 leh ache 20, sene kasōk sharîngsei 30 leh ante hei, sehrat pui 40 leh sehratche 10, shakōrtung apui 20 leh ache 10 aleimantluk.

¹⁶Khahei kha arup arup a aṭhen heia asōk-hei amanching et hei. Ama’n anhnenga, “Kahma serup-hei heruh, khana rup hmakakei leh hnung kakhôr kha inkâr ruh,” tia ṭong apek hei.

¹⁷Hmakakei pena akase asōk hneng, “Ka-upa Esau in a’ntōpui che pha nahnenga, ‘Tu mo nakapu? Khon mo akase sik che? Nahma ranhei hi tuta hei mo?’ ati pha,

¹⁸Hing’hin namasôn sik kae, “Hihei hi nasōk Jacob tahei kae. Ama’n akapu Esau hnenga kutchoi ahei tir hei kae. Jacob ama khet kankahnunga kahong’ ti roh.”

¹⁹Kha leh in-angtlinga 2 tlukna leh 3 tluknapa khana serup kahe rakip hei hneng amanthei jo hei: “Hivahi Esau nan-intōpui pha nanta hri nger sik kae.

²⁰Nanta hri nger sik kha, ‘Kadik, nasōk Jacob kha kankahnunga kahong’ nantati sik kae.” Jacob in, “Ke’n kutchoi vâng hei hin amalung kamantlai tor sik, khana ka’nhmupui pha leh, arangei mandam khet sik eng,” tia aleimandon.

²¹Kutchoihei kha ahmating atirsōt hei khana ama chu rephōra jân karek jo.

²²Khava jâna khan Jacob kathōia anuhmei 2, anuhmei manbo 2 leh asa sôm leh inkhat hei aṭhōi heia Jabbok tuidung arakan jo.

²³Anmani kha tuire amankesō hei leh ama’n anei rakip um alei manrônsō pet hei,

²⁴tâk ama chu abinga hnung kakhôrpena leika-om. Khava sōa pase inkhat kahonga jân kathang khōvâr hmadet katlunga le’nbōn hei.

²⁵Pase khan inbōn kha tor mak jo eng tia a’nhret pha, Jacob rakōbura avōk pek a, inthlōt pek joa kae.

²⁶Pase khan, “Khō kavâr jo se jo rong,” ati. Jacob in, “Vâng napek mak kârseng eng masō mak che ning,” tia amasôn.

²⁷Pase khan, “Narahming heimo?” tia ader. “Jacob” tia amasôn.

²⁸Pase khan, “Narahming Jacob inti mak jo ning. Israel inti sik jo, ajârchu nang in mihring leh Pathen na’nrepui jo hei, khana nang in nator jo hei; khava jâra narahming hi Israel a’nti sik jo kae,” ati.

²⁹Jacob in, “Tûnchu narahming amanthei roh,” ati. Tâk ama’n amasôna, “Karahming heijâra mo namanhret hnōm.” Khava sōa Jacob kha vâng apek jo.

³⁰Jacob in, “Ke’n Pathen kha hmai leh hmai intōa ka’nhmupui jo, kha’num lakahring ṭhak eng,” ati; khava jâra ahmun kha Peniel aphō jo.

³¹Jacob in Peniel aheidahlon pha khan kani heikasōk jo, arakōbur a’nthlōt jo jâra inkhôi dot-dot a leikase.

³²Khava jâra tûn katlunga Israel sōn leh pâr he’n rakōbura hmeravōi saphung mak hei, ajârchu Jacob aleivōk kha hiva rakōbur ravōi chunga kae.