Read Komrem A’NPHUTNA 33 Bible Online

A’NPHUTNA 33 - Komrem bible

A’NPHUTNA 33

¹Esau in ami 400 hei leh ankahong kha Jacob in aleihmu hei, khava jâra asahei kha Leah, Rachel, leh anuhmei manbohei ngansena thōia aleiṭhen hei.

²Anuhmei manbohei leh asahei khan hmapena amanse hei, abânna Leah leh asahei, khana hnung kakhôrpena Rachel leh Joseph amanse hei.

³Jacob anhma akeia a-upa asorna khan vōisari raleia inkuna aleikamuk.

⁴Tâk-kha Esau khan ama intōpui sik a hong katlânsōt, akut akabâna akakōa aleimajôp a kae. An-inhnibât a leikaṭap hei.

⁵Esau khan akimvea ahei-en pha khan nuhmeihei leh sahei kha aleihmu hei, ama’n “Hiva mihei hi tuhei mo?” tia aleider. Jacob in, “A-u, hihei hi Pathen ṭhatna jâra aleipek eng sahei kha kae,” tia aleimasôn.

⁶Khava sōa anuhmei manbohei leh ansahei kha kahong heia raleia lei inkun hei;

⁷abânna Leah leh asahei kahong hei, khana hnung kakhôrpena Rachel leh Joseph kha kahong heia raleia lei inkun hei.

⁸Esau in, “Ke’n karatō rup khat heiso tuhei mo? Anmani so heitina jo hei mo?” tia aleider. Jacob in “Sova so nang lungset a ôna chentheina sik a a’ntlo kae,” tia amasôn.

⁹Tâk-kha Esau in, “Kanai, ke’m katluk a kanei, nata kha inda roh,” ati.

¹⁰Jacob in, “Changmak, lungset a na-ôna eng kha kachenthei inchu kei kutchoi hi arahlâng pek roh. Tûnchu nang hi kei hnenga kaṭha hêr jo che, nahmai kahmu hi kei sik a chu Pathen hmai kahmu leh thakhat jo kae.

¹¹Nang sik a kahei choi kutchoi hi lungset a arahlâng pek roh; Pathen in lum alo enga karangei rakip hei kha aleipek eng,” ati. Ama’n arahlâng mak kârseng Jacob khan ajôr ṭhak joa kae.

¹²Esau in, “Sena sik a intluk jo rih. Ke’n hma leikei rong,” ati.

¹³Jacob in, “Naipanghei hi ratha neimak hei ti hi nang in namanhret, khana kemōng leh sehei khana a’nte hei sik kamandon hlam kasōk. Anmani hi ni khatbek achang inum kahrat a nihe jo he’nchu ankhenga kathi sik hei.

¹⁴Hma leikei jo pa roh, ke’n jâm katia kahei jui sik che, ran leh naipanghei leh torchena inranga kahong sik unga kha Edoma kanvaphâkna sik che kanhei tlo sik,” ati.

¹⁵Esau in, “Kha achang inchu nang inṭhōipui sik a kami ṭhahrep dahlon pek hei che rong,” ati. Tâk-kha Jacob in, “Khava sik a heite rangei mak, ajârchu nalungset a na-ôna eng rōk kha chen sik a kamadu kae,” tia amasôn.

¹⁶Khava jâra khava ning khan Esau kha Edom kajōna ahlam inle jo.

¹⁷Tâk-kha Jacob chu Sukkoth a kasea ama sik a-inn inkhat leh aranhei sik in-ungna thlâm aleisak a kae. Khava jâra ahmun kha Sukkoth tia aleiphō.

¹⁸Ama’n Mesopotamia ram inphut ajōng inle pha Canaan ram Shechema kadam senga jōng katlung khana khava khōpui hnenga khan arephōr aleisyema kae.

¹⁹Khava hleipuk ṭhen kha Shechem pa Hamor sōn leh pârhei hnenga inphut dangka 100 vânga aleirachôk a kae.

²⁰Khana khan ama’n kamukna maichâm inkhat amatunga ahmun kha El tia aleiphō, Israelhei Pathen rahming kae.