Read Komrem A’NPHUTNA 37 Bible Online

A’NPHUTNA 37 - Komrem bible

A’NPHUTNA 37

¹Jacob kha apa leiomna Canaan ram a leika-om ṭhak,

²khana hivahi Jacob innshung thuhming kae. Joseph, kum 17 rether khan a-uhei, apa nuhmei manbo Bilhah leh Zilpah sahei leh inṭhōia kemōng leh ke anleikhêm hei. Ama’n a-uhei omchen kaṭhamak chungchânga apa hneng thang aleikōia kae.

³Jacob khan upa ahongchang shunga aleinei asapa achang jâra Joseph kha asa ralak-hei kanek a amalungset det a kae. Ama’n zakkō inse bân katōm akaṭhui pek a kae.

⁴A-u he’n anmani kanek a anpa khan Joseph kha alungset det ti kha anhong manhret a annaipa kha anlei enkada a kahōi kaṭha leirakôk mak hei.

⁵Ni khat chu Joseph in rahmang inkhat aleinei, khavakha a-uhei hneng ahri pek hei pha kakhe chet a anleimater joa kae.

⁶Ama’n, “Rahmang kaleinei hi rangei ruh,” ati.

⁷Eini nikhenga hleipuk a saphe nilei khit et, khava pha kei saphe khachu intlun jen a hong kangirsōt a kae. Nangnihei tâ khan keita kimvea ankakea anleikamuk a kae.

⁸A-uhei khan, “Nang in reng ahong kachang chea kanchunga vai nalahongrôn sik tia namandon mo?” tia ander. Arahmang hei jâra leh khahei seng aleihrina jâra khan anlei en kadachet joa kae.

⁹Khava sōa Joseph khan rahmang inkhat aleinei nôk a a-uhei hneng, “Rahmang inkhat kanei nôk, khava shunga kani, thla, leh ârsi 11 he’n kahnenga anleikamuk eng,” ati.

¹⁰Ama’n apa hneng um arahmang kha aleihri pek khana apa’n aleirasei: “Khavakha heirahmang jo mo kae? Nanu leh na-uhei khana kei inveina kantakamuk sik chea mo namandon?”

¹¹Joseph uhe’n chu achunga thangsetna anleinei jo, tâk anpa khan chu hihei rakip chunga aleimandon ṭhak a kae.

¹²Ni khat Joseph uhe’n Shechema apa ranhei kakhem anleise pha,

¹³Jacob in Joseph hneng, “Na-u he’n ranhei ankhemna Shechema avakase sik chea kamadu che,” ati. Joseph in, “Kei intluk eng,” tia amasôn.

¹⁴Apa’n, “Vase’na na-uhei leh niran hei kha hei anchang va-en heiroh; hong inle inna kei ahri pek roh,” ati. Khang’khan apa khan Hebron Phaichama inphut aleitirsōt a kae. Joseph kha Shechem vakatlung jo,

¹⁵khana ram a khan alôn lelelai mi inkhat in aleihmua aleider, “Heimo najong?”

¹⁶“Ran kakhema ka-om hei ka-uhei kajōng hei kae,” tia amasôn. “An-omna namanthei sik eng mo?” tia ader.

¹⁷Mipa khan, “Anmani kase jo hei. Anmani Dothan ting kase sik ung antia kathei,” ati. Khang’khan Joseph in a-uhei sena ajuia Dothana avahmu jo hei.

¹⁸Anmani’n akahlajap a inphut ama kha anheihmu, anhneng atlung mak hma anmani’n ṭhatmak anmantluk a athatna sik ṭong anmathlâk jo.

¹⁹Anmani inkhat leh inkhat, “Rahmang kaneipa kha hin kahong jo.

²⁰Hong ruh that me sona akalōng kha tuikhur kachâr inkhat a hlon mathla jo rih. Ramsha inkhat in ama athat jo niti theia kae. Khava sōa arahmang kha heimo kachang ni-en sik jo,” anti.

²¹Reuben khan aleithei heia Joseph hukna sik a le’ntluk jo. Ama’n, “Ama that mak rih.

²²Hiva ramthip a tuikhura hin hlon mathla jo rih, ataksa chu tônmak rih,” ati. Ama’n hinga aleiti hi, ahuk theina sik leh apa hneng tir male theina sik alei intlukna kha kae.

²³Joseph khan a-uhei hneng ahong tlung jo pha, anmani’n azakkō inse abân kasei kha anhliksōt pek joa kae.

²⁴Khana ama kha ansura tuikhur kachâr shunga anhlon mathlâk jo.

²⁵Anmani’n bu anleisâklai tak a Ishmael mi rup khat hei Gilead a inphut Egypt ting akase hei anleihmu hei. Ansharîngsei hei kha maru-marâng leh thai marim katui phur anleimanrôn hei.

²⁶Judah khan asōpuihei hneng, “Ninaipa hi nithat a athina hi nithup a heimo nihnempui sik?” aleiti.

²⁷Hiva Ishmael hei hneng jōr jo rih. Kha achang inchu ataksa sukset mak jo me; hei-achang inum ama hi ninaipa kae, niravōi leh nithisen khet kae,” ati. Asōpuihei kha leikahnōm jo hei.

²⁸Khana Midi mi invei katlo ṭhahrep anhong pha khan a-uhei khan Joseph kha tuikhur shunga inphut anleikeisōt a khava Ishmael hei hneng khan dangka 20 vânga anleijōr jo.

²⁹Reuben in tuikhura khan ahong inle pha Joseph aleiom mak kha avahmu jo, malung nat a apōn leh ader aleikei hler joa kae.

³⁰Asōpuihei hneng inlea, “Naipangpa kha om mak jo! Heimo katlo sik jo?” ati.

³¹Khan chu anmani’n ke inkhat anthat a athisen shunga khan Joseph zakkō kha anphûm jo.

³²Zakkō kha an-inloa anpa hneng anchoia, “Keini’n hivahi kanhmusōt. Hivahi nasapa tanei changmak mo?” anti.

³³Ama’n khavakha amanhret a, “Ôk, ama ta kae! Ram a sha ṭhahrep in antathat jo kae. Kasapa Joseph hi ahar-ahak a antakeihler jo kae!” ati.

³⁴Jacob in malung nat a apōn akei hlera borapōn alei insi. Pha kasôttak asapa sik a ṭajai aleisuia kae.

³⁵Asapahei leh asanu rakip lungmōng kathlâk sik a kahong hei, tâk ama’n lungmōng thlâkna kha leihnōm mak a, “Kei chu kasapa ṭajai sui pum a kathiram akase sik eng kae,” ati. Khang’khan asapa jâi adeṭhak a leika-om.

³⁶Khava pha, Egypt a, Midi mihei khan Joseph kha reng ṭōnpui karôn, reng-innpui kahrunghei Captain Poti-phar hnenga anjōr jo.