Read Komrem A’NPHUTNA 38 Bible Online

A’NPHUTNA 38 - Komrem bible

A’NPHUTNA 38

¹Khava phalai khan Judah’n anaihei adahlona Adullam khōpuia inphut Hira inti mipa in-khat hneng om sik a kasesōt jo.

²Khava hmun a Judah’n Canaan ram a, apa Shuah intipa sanuhngâk inkhat a’ntōpui. Ama’n a-ompui jo.

³Amanu’n sapa inkhat amatet pek, arahming Er tia aphō.

⁴Amanu nai avon nôk asapa inkhat anei nôk, arahming Onan tia aphō.

⁵Avea sapa anei nôk a arahming Shelah tia aphō. Nai hi a’nte pha Judah’n Achzib a leika-om.

⁶Judah’n asapa hmakakei Er sik nuhmei ajongpek arahming Tamar inti.

⁷Er omchen hi ṭhamak RŌNGPU malung leitlai mak jo, khava jâra RŌNGPU’n aleithat jo.

⁸Khava sōa Judah’n Er naipa Onan hneng, “Na-upa nuhmei renghmeinu nuso inchunpui roh. Apuise naipa nachangna tlohlam kasōk kha pui mathluk roh. Khang’khan na-upa khan sōn leh pâr aneithei sik kae,” ati.

⁹Tâk-kha Onan in amannei sik sahei kha ama sa anchangmak sik kha amanhret a, ama’n a-upa nuhmei leh hmun an-inchun kataia asetui kha raleia aleimathlâk jo, hivahi a-upa sōn leh pâr asōk makna sik a aleitlo kae.

¹⁰Ama ṭōntlo kha RŌNGPU malung tlaimak jo. Khava jâra ama kha’m RŌNGPU’n athat jo.

¹¹Khava jâra Tamar hneng Judah’n, “Kasapa Shelah’n rether atluk mak hma seng napa inna renghmeinu changa va-om hi roh,” ati. Ama’n hinga aleiti kha Shelah kha a-uhei kapōa that a ka-om khâk sik ti ṭit jâra kae. Khava jâra Tamar kha apa inna inle jo.

¹²Pha ṭhahrep sōa Judah nuhmei kha leikathi jo. Ṭajai sui, ralûm de a’nchaisō pha aṭhōnpa Adullama Hira leh inṭhōia akemōng sam epna hmun Timnah a leikase hei.

¹³Tamar hneng tu mo inkhat in, aterpu kha akemōng sam epna Timnah a kahong sik, anleiti pek.

¹⁴Khava jâra ama’n renghmeinu pōnsi adahrek a, hmai pinden a’nkhua, Timnah sena hlam a khōpui, Enaim hlutna hmun a leika-om jo. Ajârchu Judah sapa matlumpen Shelah kha kalen jo, kha’num amanu ka-ompui sik a leipek mak jo ti hi kaṭhadek a aleimanhret a kae.

¹⁵Judah’n ama kha ahmu pha notinu kachang sik tia amandon, ajârchu ahmai aleimakhu tlit a kae.

¹⁶Hlamlen panga ka-om amanu hneng kahlut a, “Kaṭha jo, heija sâm mo nati?” tia ader. (Ama’n amanu kha ahmōinu kae ti leimanhret mak.) Amanu’n, “Nang in heimo napek sik eng?” ati.

¹⁷Ama’n, “Ke’n ke rup a inphut arala inkhat kahei tir pek sik che,” ati. Amanu’n, “Kaṭha jo, nang in khavakha nahei tir mak hma seng naṭong tepna heimo nadahlon sik?” ati.

¹⁸Ama’n, “Nahnenga intepna kha heimo kadahlon sik?” tia ader. Ama’n, “Nakutkhi leh ahrui khana nakhōnghre kha naṭongtep manhretna dahlon roh,” ati. Neinâk-hei hi Tamar hneng apek jo. Khava sōa anmani hmun inchun jo hei, khana amanu khan nai avon jo.

¹⁹Khava sōa Tamar kha kasea a-inna ahmai makhuna pōn kha ahliksōt a reng-hmeinu von kha a’nvon nôk jo.

²⁰Judah’n aṭhōnpa Hira kut a kete kha amanṭhōia nuhmeinu hnenga intepna neinâk-hei kha vamanlona sik a atir pha nuhmeinu kha hmutor mak jo.

²¹Ama’n Enaim a mi ṭhahrep hneng, “Hlampanga ka-om notinu kha khonting mo kase jo?” ati. Anmani’n, “Hiva hmun hin notinu inkhatbek um omphung mak,” anti.

²²Khava jâra ama Judah hneng hong inlea, “Nuhmeinu kha hmutor mak jo eng. Khava hmun a mihe’n khana khan notinu omphung mak anti,” ati.

²³Judah’n, “Neinâk-hei kha inda jo parasoh. Mihei tamanuisō sik me kha madu mak me. Aman pek rong tia katlo kae, tâk nang in jongsōt tor mak jo che,” ati.

²⁴Thla 3 sō vena mi inkhat in Judah hneng, “Nahmōinu Tamar kha noti ṭōn atlo jo, tûnhin nai avona kae,” ati. Judah’n, “Ama kha ṭhōisōt inna hmeia rohlon roh,” ati.

²⁵Amanu kha anheikeisōt pha aterpu hneng ṭong aleimathlung, “Kei tavon sa hi hiva neinâk-hei kapupa sa kae. En hei ruh, tuta hei mo — kutkhi leh ahrui khana khōnghre hei hi,” ati.

²⁶Neinâk-hei kha Judah’n aleimanhret jo heia ama’n, “Ama kadik jo. Ke’n tlohlam kasōk kha leitlo mak jo eng, kasapa Shelah kha kalei man ompui sik kae,” ati. Judah’n Tamar kha ave nôk a inchunpui hêrmak jo.

²⁷Asanei pha ahong tlung jo pha avona nai 2 ka-om jo ti inhret jo.

²⁸Amanu naiha ahongphut pha nai inkhat in akut vângting ahei razitsōt a kae, sa inneinu khan naite kut a pat razang kasen aleikhit pek jo. Ama’n, “Ama hi a’nte masa kae,” ati.

²⁹Tâk-kha akut kha akei manhlut nôk a anaipa kha heikasōk masa jo. Khana nai inneinu khan, “Hing’hin nahlam nahong petan jo!” ati. Khava jâra arahming Perez anphō jo.

³⁰Khava sōa pat razang kasen inkhit a-upa kha hong inte jo. Arahming Zerah anphō jo.