Read Komrem A’NPHUTNA 39 Bible Online

A’NPHUTNA 39 - Komrem bible

A’NPHUTNA 39

¹Tûn Ishmael he’n Joseph kha Egypt katlunga anṭhōia reng ṭōnpui karôn inkhat, reng inn kahngâk-hei Captain, Potiphar intipa hneng anjōr jo.

²RŌNGPU’n Joseph a’nṭhōipuia chung sōkna amannei. Ama Egypt mi, akapu inna leika-om.

³Akapu khan Joseph hi Pathen in a’nṭhōipui khana atlona rakip a chung sōkna amannei ti hi ahmu.

⁴Potiphar khan achunga amalung katlaia ama khet sōk inkhat aleimanchang; khana a-innshung leh anei rakip kaching sik amanṭang jo.

⁵Khava sōa inphut, Joseph jâra RŌNGPU’n Egypt mipa innshunghei leh innshunga anei hei seng khana ahleipuk a akakek rakip chunga vâng aleipek hei.

⁶Potiphar in anei rakip Joseph kut chunga anganse pet jo, asâk sik bu leh an tei loa heite inkhat chunga ngeitō mak jo. Joseph ahme-alim kaṭha pase inkhat leikachang,

⁷pha bongkhat sō leh akapu nuhmei khan Joseph chunga madu hmit-enna aleineia rakhum inchun puina sik a aleijôr.

⁸Leihnōm pek mak khana amanu hneng, “Enroh, kei hin ka-om jâra kakapu hi innshunga tlo sik rakip heite donmak jo. Anei rakip chunga kei amantinta jo eng.

⁹Hiva innshunga hin kakapu rathanei kapōhrep a kei um kanei, heirakip chunga ahnōmpek pet eng, nang chunga ratha nei sik rōk kha aphemak eng kae. Achang inchu heikhong mo jông leh kik setna ṭōn kha Pathen hmaikunga katlo tor sik?” ati.

¹⁰Amanu khan Joseph kha ani tina ajôr ṭhak ravâng, rakhum le’nchun puimak a kae.

¹¹Tâk-kha ni khat Joseph in aṭōn katlo sik a-innshunga leikahlut, inn-shung sōk inkhatbek khana khan leiom mak hei.

¹²Nuhmei khan Joseph pōnsi amatutlit a, “Hong roh, rakhum inchun rih,” ati. Tâk-kha ama’n apōnsi kha nuhmei kut chunga adahlona, inhlik sōt a vângting katlânsōt jo.

¹³Ama’n apōnsi adahlona inna inphut atlânsōt kha amanu’n ahmu pha,

¹⁴a-innshunga ka-om sōk-hei abek heia, “Hivahi enruh! Kapuise’n aheiṭhōi Hebrew mi inkhat hin eini hmesetna sik atlo jo. Ama ka-inn den a hongkahlut a kei setpui sik a arei eng, tâk ke’n kator chenna aka-ông eng kae,” ati.

¹⁵Kei ka-ông rasa athei pha apōnsi kahnenga adahlona innshunga inphut katlânsōt jo,” ati.

¹⁶Joseph kapu kha ahong mak hma seng pōn kha amanu’n a’nda a kae.

¹⁷Nuhmei khan apuise hneng thuhming mama kha ahria, “Nang in naheiṭhōi manhlut Hebrew mipa hin kahnenga heikahlut a inzak apek eng,” ati.

¹⁸Tâk-kha ke’n ka-ông pha apōnsi kahnenga adahlona innshunga inphut vângting katlânsōt a kae,” ati.

¹⁹Joseph kapu kha ahnuk kana hranghra jo.

²⁰Joseph kha amansur heia rengpa khum mihei dana kurkhum shunga ada jo; khan ama ka-om jo.

²¹Tâk-kha RŌNGPU’n Joseph kha lungset a arôn khana vâng apek khava jâra kurkhum katintapa khan alungset theia kae.

²²Khum mi rakip hei kachinga aleimanṭang khana kurkhum shunga ṭōn intlo rakip kha Joseph hneng aleingansea kae.

²³Joseph hnenga nganse jo ṭōn rakip chunga khan kurkhum katintapa khan heite ensui nôk mak jo, ajârchu RŌNGPU’n Joseph kha alei inṭhōipui khana atlona rakip a chung sōkna alei manneia kae.