Read Komrem A’NPHUTNA 4 Bible Online

A’NPHUTNA 4 - Komrem bible

A’NPHUTNA 4

¹Adam in anuhmei hmun ale’n-chun puia Eve kha achung kahrik jo. Khana sapa inkhat amatet jo. Ama’n ati, “RŌNGPU thlopna eng jâra sapa inkhat kanei jo.” Khava jâra arahming kha Cain tia aphō jo.

²Khava kahnunga Eve in sapa Abel inti inkhat amatet nôk jo. Abel kha kemōng kakhem hongkachang, khana Cain kha hlei kathlō inkhat leikachang.

³Pha bongkhat sōa, Cain in ahlei thlō kutsōk ajing ahei choia RŌNGPU hneng aleitōk a kae.

⁴Khana Abel inum kemōngte a’nte hma-inkei ahei keia athat jo. Aravōi kaṭhapen hei kha tōk sik a apek jo. RŌNGPU’n Abel leh aneinâk tōk chunga amalung katlâi jo.

⁵Tâk-kha Cain leh aneinâk tōk hei khachu rahlâng pek mak jo. Khava pha Cain ahnuk kana hêr jo, ahmaisō tlaimak jo.

⁶Khana RŌNGPU’n Cain hneng ati, “Heijâra mo nahnuk akana? Heijâra mo nahmaisō akatlaimak?

⁷Nang in akadik naleitlo’nchu nahmaisō aleikatlâi sik che kae; akaṭhamak natlo jâra setna kha nakot kunga ka-oma kae. Nachunga vai arôn hnōm, tâk nang in atorna natlo nger sik kasōk.”

⁸Cain in anaipa Abel hneng, “Hlei-puk a vase rih,” ati. Khanga anse pha Cain in anaipa kha ahnget malet phot a aleithat jo.

⁹RŌNGPU’n Cain ader, “Nanai Abel khon mo ka-om?” Ama’n amasôn, “Kei manhret mak eng, kei kanaipa kaching sik a aka-om eng mo?”

¹⁰Khava sōa RŌNGPU’n ati, “Hiva ṭit ka-om ṭōn hi heisik a mo natlo? Nang in namasō nanaipa thisen khan raleia inphut kahnenga phuhlōna sik a hong ka-ônga kae.

¹¹Nang hâksêr nachen jo kae; khana raleia hlei thlōthei mak jo tin che. Nanaipa nathat lai athisen kha ralei in abei aman-ânga amajôp jo.

¹²Nang in anse-hleina mankek sik a natlo’num kara mannei pek mak che ning; raleichunga hin inn kaneimak inkhat a kalôn lele sik jo che.”

¹³Cain in RŌNGPU hneng ati, “Hiva karâkna hi kei tathōk sik a intak rei.

¹⁴Nahmai kunga inphut khana ram hinna inphut nahnong sōt jo eng. Raleichunga inn leh hlei kaneimak kachang sik jo enga kha kalôn lele sik jo eng. Kei ani kahmu sōt mi rakip in anthat sik jo eng.”

¹⁵Tâk-kha RŌNGPU’n amasôn, “Changmak. Tu mo inkhat in anthat che’nchu naphuhlōna kha ke’n hringkhō 7 kalo sik kae.” Hing’hin RŌNGPU’n mêrchîkna inkhat Cain chunga aleidapek, khava kahmu he’n anthat makna sik a kae.

¹⁶Hivasōa RŌNGPU hmaikunga inphut Cain kha ram kahlatak a kasesōt jo. Ama’n Eden nisō intongting “Lôn lelena” inti ram a khō avasât jo.

¹⁷Cain leh anuhmei in sapa inkhat annei nôk. Arahming Enoch tia anphō. Cain in khōpui inkhat asyema asapa rahming aleimanrôn.

¹⁸Enoch sapa rahming Irad anti, Irad sapa kha Mehujael anti, Mehujael khan sapa inkhat anei, arahming Methushael anti, ama kha Lamech pa kae.

¹⁹Lamech khan nuhmei 2 aleimanbo hei, anrahming Ada leh Zillah anti hei.

²⁰Ada sapa Jabal kae, ama kha Pōn-inna aka-om hei leh ranhring kadôn inphut hei pu leh pa kae.

²¹Ama naipa kha Jubal anti. Ama sōn leh pârhei kha hlakasak leh serângdâr indei, bunglir katum hei kae.

²²Zillah hin Tubal Cain amatet, sum-êng leh thira inphut hmangchâk rakip kasyem leikachang. Tubal Cain sernu kha Naamah kae.

²³Lamech in a nuhmeihei hneng ahri, “Ada leh Zillah kaṭong rangei ruh, kei ani kavōk rether inkhat ke’n kaleithat jo.

²⁴Cain kha anthat jâra hringkhō 7 lo sik achang inchu, Mi inkhat in kei athat eng inchu hringkhō 70 leh 7 lo sik kae.”

²⁵Adam leh anuhmei in sapa inkhat anleinei nôk. Amanu’n, “Cain taleithat kasapa Abel kathleng sik a Pathen in sapa inkhat apek nôk eng,” ati. Khava jâra arahming kha Seth tia aleiphō.

²⁶Seth khan sapa inkhat aleinei, arahming Enosh tia aleiphō. Khava pha inphut khan chu mihring he’n RŌNGPU rahming intheng kapan a kamukna anleiphut jo.