Read Komrem A’NPHUTNA 40 Bible Online

A’NPHUTNA 40 - Komrem bible

A’NPHUTNA 40

¹Pha khat sōa, Egypt rengpa ju katintapa leh buhlom kasyempa’n rengpa malung anlei sukkhōia kae.

²Rengpa kha hiva ṭōnkarôn 2 hei chunga ahnuk leikana,

³khana Joseph omna Captainpa inn mama khan anmani aleikhum jo hei.

⁴Kurkhum a khan pha kasôttak leika-om jo hei, khana Captain khan Joseph kha anmani inzen sik a ṭōn aleipek.

⁵Jân khat chu, kurkhum a khan ju katintapa leh buhlom kasyempa’n rahmang inkhat et anleinei, rahmanghei kha ajâr hlop-hlop hei kae.

⁶Jîngkâra Joseph anhnenga ahong pha, anmalung inrimtak a ahmu hei.

⁷Ama’n anhnenga, “Heisa mo tuning hinghrep a nanmalung inrima kahmu chei?” tia ader hei.

⁸Anmani’n, “Keini inkhat et in rahmang inkha-khat kannei, kanrahmang inlesōt thei mi tûte hinahin om mak hei,” anti. Joseph in, “Rahmanghei male torna ratha kapek kha Pathen kae. Nan rahmang kha ahei manthei ruh,” ati hei.

⁹Ju katintapa khan, “Karahmanga kahmatak a vomhrui inkhat leika-om

¹⁰abâk 3 anei. Abō ahon’bō lim leh hong kapâr, khana akara kha kahmin bât jo.

¹¹Ke’n rengpa kōklei kaleichoi; vomhrui kara kha kaṭhet a kōklei shunga atui kasôma, rengpa kaleipek a kae,” ati.

¹²Joseph in, “Khava tina khachu: bâk thum kha, ni 3 tina kae.

¹³Nang ni 3 shunga rengpa’n amasō sik che, naṭōn hmun a amale nôk sik che. Rengpa ju katinta nalei chang laia kapōa akōklei vâng ju nalapek sik kae.

¹⁴Khana nang sik a heirakip ahong injen pha lungsettak a ahei mandonsōt roh, khana lungsettak a rengpa hneng kei rahming amandonsōt pek roh khana kurkhum a inphut kasōk theina sik a’nthōpui roh.

¹⁵Ajârchu kei hi Hebrew ram a inphut anta heimarûk eng kae, khana hiva Egypt ram a hinum kurkhum a omna sik ṭōnse katlona heite om mak,” ati.

¹⁶Ju katintapa rahmang kha madu omna tinga amale pek kha Buhlom katintapa khan athei pha, ama’n Joseph hneng, “Ke’num rahmang inkhat kanei; buhlom hrai 3 kaluchunga kaleitang.

¹⁷Hrai chung katōngpen shunga khan rengpa sik a buhlom ajât rakip ka-om, khahei kha vahe’n anleisâk a leika-om hei,” ati.

¹⁸Joseph in, “Khava tina chu: Hrai 3 kha ni 3 kae.

¹⁹Ni 3 shunga rengpa’n akeisōt sik che khana nalu atan sik! Khana nakalōng kha thing kacho inkhat chunga amakhei sik, khana chunga vahe’n naravōi kha ansâk sik,” atipek.

²⁰Ni 3 sōa rengpa intet ning kachanga, aṭōn katlo rakip sik a revei sâktlâng aleitloa kae; aju katintapa leh abuhlom kasyempa kha akeisōt heia ṭōn katlohei hmaikunga anheiṭhōi hei.

²¹Ju katintapa khachu hma aleitlo aṭōn hmun a amantlo nôk jo,

²²tâk buhlom kasyempa khachu aleithat jo. Joseph in alei male pek hei kapōtak a kasōk pet jo.

²³Achang ravâng, ju katintapa khan Joseph chu leimandon phâkmak jo, amahngi cher jo.