Read Komrem A’NPHUTNA 41 Bible Online

A’NPHUTNA 41 - Komrem bible

A’NPHUTNA 41

¹Kum 2 athlengsō pha, Egypt rengpa rahmanga Nile tuidung panga kangira leika-om,

²khava pha, Nile tuidunga inphut a’nnejet leh akatur sehrat pui 7 hong kasōk hei. Anmani’n phidông anleisâk.

³Khava sōa akakong leh rukasai sehrat 7 kahong hei. Anmani kha kahong heia tuidung panga sehrat hlopkhat hei hneng kangira ka-om hei,

⁴khana akakong sehrat pui hei khan akatur sehrat pui hei kha ansâk a anmade jo hei. Hiva pha rengpa kha hong inṭhang jo.

⁵Ama vōi khat kaje nôk jo khana rahmang inkhat anei nôk. Sabor pui katluk akahmin 7 hei ankung inkhat rōk a kapâr hei.

⁶Khana savui ahlop 7, arasi khana nêrdi thli takahnur cher jo hei hong kasōk hei,

⁷khana savui arasi 7 hei khan pui katluk savui 7 hei kha anlei made sōpet jo hei. Rengpa kha hong inṭhang jo, arahmang kae ti amanhret jo.

⁸Jîngkâra chu amalung le’nrim jo, khava jâra Egypt a ka-om hmitphedôi kathemhei leh akathem akasinghei abek jo hei. Anhnenga arahmang ahri pek hei tâk tûte inkhat in arahmang kha malesōt pek tor mak hei.

⁹Khava pha khan ju katintapa khan rengpa hneng, “Tuning chu kaṭhena hi ke’n hrisōt jo rong.

¹⁰Nang in kei leh buhlom katintapa chunga nahnuk leikana, keini kha reng-innpui kahrunghei Captainpa inna kurkhum a naleida ung.

¹¹Ni khat chu kan-inhnia rahmang kanleinei et, rahmanghei kha ajâr ahlop-hlop et hei kae.

¹²Kankâra innpui kahrunghei Captain sōkpa, Hebrew mi inkhat leika-om. Kanrahmang kha ahnenga kanleihri, ama’n amalesōt pek unga kae.

¹³Ama tamalesōt dungjuia hongkadik hei: Ke’n kaṭōn hmun a namale nôk eng, tâk buhlom kasyempa khachu namakhei hlon jo.

¹⁴Rengpa khan Joseph kha ava manbek hei, ama kha inranga kurkhum a inphut anhei ṭhōisōt. Asam avoa, ahnerhme avoa, apōn ader a’nthleng sōa reng hmaikunga kahong jo.

¹⁵Reng in ahnenga, “Rahmang inkhat kaleinei, tûte’num ahri manchên pek tor mak jo hei. Nang in rahmanghei hi nahri manchên tor tia animanthei eng,” ati.

¹⁶Joseph in, “Reng Kalûr, Ke’n kha tor mak eng, tâk Pathen in akaṭhalanga malesōtna kha ahei pek sik me,” ati.

¹⁷Rengpa khan atia, “Karahmang khachu: ke’n Nile tuidung panga kangira leika-om eng,

¹⁸Akatur ahme innejet sehrat pui 7 Nile tuidunga inphut heikasōk heia phidông ansâk a leika-om hei.

¹⁹Khava sōa akakong leh rukasai sehrat pui 7 hong kasōk hei. Khahei kha Egypt ram hmun rakip a kaleihmu sehrat hei kâra hme kasepen hei kha kae.

²⁰Akakong sehrat pui hei khan akatur sehrat pui hei kha ansâk pet jo hei,

²¹tâk ansâk hei tia tûte’num manhret mak hei, ajârchu anmani kha hma anṭhatmak kapōa ṭhamak heia kae. Khava sōa kei hong inṭhang jo eng.

²²Ke’n rahmang hlop inkhat um kanei nôk: Sakung inkhat a sabor pui katluk leh akahmin 7 inra kahmu hei.

²³Khava sōa sabor arasi khana nêrdi thli takahnur cher jo 7 hong kasōk hei,

²⁴khana sabor arasihei khan sabor pui katluk hei kha anmade pet jo hei. Rahmang hi ke’n hmitphedôi kathemhei hneng kahri pek jo hei; tâk anmani tûte’num ahri manchên pek tor mak hei,” ati.

²⁵Joseph in rengpa hneng, “Rahmang 2 hei kha antakhing thakhat kae; Pathen in atatlo sik kha aman-thei che kae.

²⁶Sehrat katur 7 hei kha kum 7 hei kae; khana sabor pui katluk 7 hei kha’m kum 7 hei kae; antakhing thakhat kae.

²⁷Hnunga heikasōk sehrat kakongber hei khana sabor arasi thli tasêm kahnur hei kha kum 7 sâk katâng sik tina kae.

²⁸Nahnenga kahri pek che kapōa, Pathen in heimo atlo sik kha nahnenga amalârpek che kae.

²⁹Egypt ram pumpuia kum 7 sâk leh in katluk a kasōk sik.

³⁰Khava sōa, kum 7 sâk katâng sik, kum kaṭha rakip kha mihe’n anmahngi pet sik jo, ajârchu sâk katâng khan ram hi asuk manrim pet sik.

³¹Sâk leh in pui tlukna pha kha mahngi pet a ka-om sik, ajârchu sâk tâng kha khangtuk hrep ṭit ka-omhêr sik.

³²Rahmang ave-avea amanhmu che khan Pathen in amantluk er jo tina kae, khavakha sôt lo hêra ahong mansōk sik jo.

³³“Tûnchu nang in akasing leh ari manhretna kanei inkhat nakadeia naram hi nanganse sik kae.

³⁴Nang in ṭōnpui karôn nakadei heia sâng leh be kaṭha asōkna kum 7 shunga khan akasōk ṭhen 5 inkhat ṭim antakhôm sik kae.

³⁵Akahong sik kum kaṭha shunga sâk leh in rakip khôm manbukna sik ṭong pek hei roh; khōpui rakip a hmuchi khôm mantûp a khavakha hrungna sik a ratha pek heiroh.

³⁶Sâng leh behei kha Egypt ram a akahong sik sâk tâng pha semna sik a khôm mantûp sik kae. Khang’khan mipui he’n vonṭâm antade mak sik kae,” ati chabi.

³⁷Ṭōn mantlukna kha rengpa leh asōk-hei khan anhnōm jo.

³⁸Asōk-hei hneng rengpa’n, “Pathen rathla’n ashunga aka-om Joseph kanek a mi akaṭhadet inkhat hmutor mak min,” ati.

³⁹Rengpa’n Joseph hneng, “Pathen in hihei rakip hi amanhmu jo che, achang jâra nang in mi rakip kanek a singna leh ari manhretna naneidet ti hi inlâr.

⁴⁰Ke’n karengram akatinta kamanṭang sik che, khana kami rakip he’n naṭongpek antajui sik kae. Nang ratha neina kha kei hneng rōk a 2 tlukna akachang sik che kae.

⁴¹Ke’n tûn nang hi Egypt ram pumpui ram vai karôna kakadei jo che kae,” atipek.

⁴²Rengpa khan akut a kutkhi reng mêrchîkna akabek kha alosōt a Joseph kut a amannei jo. Pōn-innejet amansi, khana sana maṭhi hrui ahrak a aman-ôr jo.

⁴³Ama’n reng shakor gâri 2 tlukna kha Joseph tachōng sik a aleipek, khana akajana akahrung he’n ahmating kase heia ka-ông hei, “Hlam pe ruh, hlam pe ruh!” anti. Khang’khan Joseph kha Egypt ram pumpui ram vai karôna anleikadei jo.

⁴⁴Rengpa’n ahnenga, “Kei reng eng kae, khana Egypt ram pumpuia nang hnōm pekna tei loa tûte’n akut, ake kalângthei mak ning,” ati.

⁴⁵Ama’n Joseph kha Egypt hei rahminga Zaphenath Panea tia aleiphō pek. Nuhmei inkhat Heliopolis khōpuia thempu Potiphera sanu Asenath aleipek. Egypt rengpa razenna aphut pha Joseph kha akum 30 katluk jo. Ama’n rengpa innpui adahlona Egypt ram pumpuia leikase lele.

⁴⁶

⁴⁷Sâk leh in tamna kum 7 shunga khan ram shunga sâng leh be katluk a kasōk jo.

⁴⁸Joseph in khahei rakip kha aleikhôma khōpui heia aleibuk hei. Akimvea hleipuk heia akhôm sâng leh be rakip hei kha khōpui heia ada hei.

⁴⁹Khangtuk hrep sâng kha atam jâra Joseph in aja mantei mak jo hei, tui-ôngpui nêrdi kapōhrep ka-ang jo.

⁵⁰Sâktângna sik kum ahong tlung mak hma Joseph chu sapa 2 Asenath in aleinei pek jo hei.

⁵¹Ama’n, “Pa-then in kachâmna rakip leh kapa innshung amahngi jo,” ati; khava jâra asapa upapen kha Manasseh tia aphō.

⁵²Ama’n ave nôk a, “Kachâmtak a ka-omna ram a Pathen in sa apek eng,” ati; khava jâra asapa inhnina kha Ephraim tia aphō.

⁵³Egypt ram in khopna kum 7 anlei hmangna kha hong katlang jo,

⁵⁴khana Joseph in aleihri kapōa sâk tâng kha ahei phut jo. Ram hlop rakip a sâk hong katâng jo, tâk Egypt ram a chu hmuntina sâk leika-om.

⁵⁵Egypt he’n sâk tâng anhong de manphut jo pha, rengpa hneng sasai apek roh tia leika-ông hei. Khava pha ama’n Joseph hneng ansena sik khana ama’n tlo ruh ati kha antlona sik a ṭong apek hei.

⁵⁶Sâk tâng kha kakhôk chet-chet a ram pumpui aphâk jo, khava jâra sasōr inn rakip Joseph in amahlang jo hei. Khana Egypt mihei hneng sâng kha ajōr jo.

⁵⁷Raleichung pumpuia mihe’n Joseph hneng sâng inchôk sik a Egypt a kahong hei.