Read Komrem A’NPHUTNA 44 Bible Online

A’NPHUTNA 44 - Komrem bible

A’NPHUTNA 44

¹Joseph in a-innshung katintapa hneng, “An tinbua antarôn tor sik sâng thōn mansip pek heiroh, ansêr sûn-et um antinbu chunga thōnpek heiroh.

²Kei dangka kōklei kha anmathlum penpa tinbua asâng man asêr kha leh thōnsa roh,” ati. Ama’n ahri kapōa atlo jo.

³Jîngkâr hmatak anmani anshakorhei leh anmanse jo hei.

⁴Anmani’n khōpuia inphut ajinglim ansesōt pha, Joseph in a-innshung katintapa hneng, “Inrangtak a sova mihei so vahnong heiroh. Naphâk hei pha, ‘Heisa mo ṭōn kaṭha kha ṭōnse vâng nanta male?’ tia der heiroh.

⁵Kakapu dangka kōklei heisa mo nanta marûk? Khan vâng khan tui a-in kae, khana tlâ asânna kae. Nangni’n ṭhena inhnaktak nantlo jo,’ ti heiroh,” ati.

⁶Khana sōk khan anmani aphâk hei pha, hiva ṭong hi ahri pek jo hei.

⁷Anmani’n, “Apu, hinga nahri hi heimo natina? Keini’n khang khava omchen heite tlomak ung tia intep ung.

⁸Nang in namanhret ti chu Canaan ram a inphut kantinbu chunga sêr aleika-om hei kha kantaheirôn male kae. Kha achang inchu heisik a mo nakapu inna inphut sana, dangka kanta marûk sik?

⁹Apu, tu achang inum khava kōklei omna mi nahmu sōt inchu, ama kha that sik kae, khana keini seng nasōk inchang rung,” anti.

¹⁰Ama’n, “Kei kahnōm eng; tâk kōklei kalo mi rōk kha kasōk kachang sik, nangni alakseng chu kasethei sik chei,” ati.

¹¹Khava jâra antinbu hei kha inranga raleia anmaṭhum heia, inkhat et in antinbu hmor anmazera kae.

¹²Joseph sōkpa khan kaṭhadek a ajong jo, upa pena aphut a mathlum pen katlung ahei-en pha, kōklei kha Benjamin tinbua ahmu jo.

¹³A-uhei kha anmalung inrima anpōn ankeihler jo, anshakōrtung hei kha phur anmanrôn nôk heia, khōpuiting inle jo hei.

¹⁴Judah leh asōpuihei seng Joseph inna anheitlung pha, Joseph um leika-om ṭhak hia kae. Anmani Joseph ângshunga lei inkun heia,

¹⁵khana Joseph in, “Heimo nantatlo jo? Kei kapō ṭōnhmun karôn mi inkhat in tlâ sânna vânga asur tor sik chei ti hi manhret mak chei mo?” ati.

¹⁶Judah’n, “Apu, nahnenga heimo kantahri tor sik joa? Heikhong mo kanta makhe tor sik chea? Heikhong mo kanbinga kantahri mantheng tor sik jo? Pathen in kanṭhena hei ahliksōt jo kae. Kōklei omnapa rōk changloa, tûnchu keini kankhenga nasōk jo ung kae,” ati.

¹⁷Joseph in, “O, changmak! Khang’khan ke’n tlohêr mak ning! Kōklei omna mi rōk kha kasōk akachang sik kae. Alakseng chu nanpa hneng kadam senga kasethei jo chei,” ati.

¹⁸Judah kha Joseph hneng kasea, “Apu, lungsettak a nahnenga ṭong hrina sik ahnōmpek roh! Kachunga nahnuk mannat mak roh; nang chu rengpa khet kapō che kae.

¹⁹Apu, nang in, ‘Nanpa aka-om mo, sōpui alak nanlanei mo?’ tia nalei der ung.

²⁰Kanmasôn chea, ‘Kanpa kater inkhat ka-om khana atersōa amatet naipa inkhat kannei. Ama sōpui chu kathi jo, anu tanei alakahring chu ama rōk jo kae; apa’n alungset hranghra,’ kanleiti.

²¹Apu, nang in ama kha na’nhmupui theina sik a hin heiṭhōi ruh nati ung,

²²khana keini’n kanti naipangpa khan apa dahlon theimak, adahlon inchu apa kha akathi sik kae.

²³Khava pha nang in, ‘Nannai mathlum kha nanheiṭhōi mak inchu kahnenga manhlut mak chei ning’ naleiti.

²⁴Keini kanpa hneng kan inle pha, naleihri seng kha kanmanthei.

²⁵Khava sōa ama’n kanhong inle nôkna sik leh sâng ajing kanva rachôkna sik amanthei ung.

²⁶Keini’n, ‘Setor mak ning, kannai mathlum kan-inṭhōi mak inchu ahnenga amanhlut mak ning. Kannai mathlum kanṭhōi leh rōk khan keini kasethei sik ung,’ kanti.

²⁷Kanpa khan kanhnenga, ‘Kalômnu Rachel in sapa 2 rōk anei ti hi nanmanhret.

²⁸Inkhatpa khan adahlon jo eng. Ama kha ramsha he’n antakeihler jo kachang nger sik, adahlon enga inphut hmu nôk mak jo eng.

²⁹Tûn hiva inkhat hi keia inphut nanṭhōisōt a achunga heikhat asōk inchu, kei katerna chunga malung inrengna nantamasō pek eng khan athat hnâm sik jo eng kae,’ ati.”

³⁰Judah khan ahrisa a, “Khana tûn hi, apu, naipangpa inveiloa kapa hneng kan-inle’nchu, kei leh naipangpa kan-inṭhōi mak kha amanhret lim leh ama chu kathi sik jo. Kapa hringkhō hi naipangpa chunga aka-om kae, ama kater hêr jo khana achunga Inrengna kantamasō pek hin athat hnâm sik jo kae.

³²Khava kakhea, ke’n kahringkhō hi naipangpa sik a ale’nkhang eng kae. Naipangpa hi ke’n kaheiṭhōi male mak inchu khava mô rakip kha kahringkhōa karôn sik kalei ti kae.

³³Khava jâra tûnchu, apu, naipangpa kathlenga kei nasōk a hin ka-om sik eng; ama chu a-uhei leh inle jo rasoh.

³⁴Naipangpa hi kaṭhōi male mak inchu kei kapa hneng heikhong mo akase tor sik eng? Ke’n kapa chunga inrimna akatlung sik kha enngam mak ning,” ati.