Read Komrem A’NPHUTNA 45 Bible Online

A’NPHUTNA 45 - Komrem bible

A’NPHUTNA 45

¹Joseph in asōk-hei hmaikunga amalung injôrna kha inṭîm tor mak jo, khava jâra asōk-hei seng innden shung kha andahlonna sik ṭong apek jo hei. Joseph in a-uhei hneng tu a-ena ahri pek lai hei khan mihlop tûte leiom mak hei.

²Ama’n rasa kasōktak a inhnuk a aṭap kha Egypt mihe’n anleithei jo, khana khava ṭongsōk kha rengpa hneng anmathlung jo.

³Joseph in a-uhei hneng, “Kei Joseph eng kae. Kapa kha tûn katlung alakahring mo?” ati. Tâk-kha a-u he’n khavakha anthei pha anṭit reia leimasôn tor mak hei.

⁴Khava sōa Joseph in anhnenga, “Lungsettak a ahei hnai ruh,” ati. Anmani’n anhnaidet pha ama’n, “Egypt hei hnenga nanta leijōr nannaipa Joseph kha kei eng kae.

⁵Kei hi hinahin nanlei jōr jâr enga tûnhin nanmalung hōimak tlomak ruh, nanbinga maset inpek mak ruh. Mihring hringkhō hukna sik a nanhma ani heikatir kha Pathen khet kae.

⁶Ram shunga sâk tâng honghlut hi kum 2 tlukna rōk lakae, kum 5 alavât khava shunga chu hleikhōi um om mak ning, khana sa-ât inti’m om mak ning.

⁷Nangnihei hukna sik khana nangni leh nansōn nanpâr he’n hringna anchenna sik nanhma Pathen in hlam inlaktak a ahei tir eng kae.

⁸Khava jâra hinna ani heikatir hi kadiktak a nangni changmak chei, Pathen kae. Ama’n rengpa ṭōnpui karônpen amanṭang eng kae; kei Egypt pumpui vaikarôn eng kae.

⁹“Tûn nangni inranga kapa hneng se una asapa Joseph ṭonghri hi, ‘Pathen in Egypt pumpui vaikarôn amanṭang jo eng; kahnenga inranga hong roh.

¹⁰Nang Goshen ram a kei leh inhnaitak a ka-om thei sik che — nang, nasahei, natu hei, nakehei, nakemōnghei, nasehei, khana nanei rakip hei leh nankhenga.

¹¹Goshena nang na-om inchu ke’n ka-enthei sik che. Kum 5 sâk akatâng hi sik kae; nang, na-innshung leh naranhei vonṭâma nanka-om sik madu mak eng,’ ati tia vahri pek ruh.”

¹²Joseph in amanjōm a, “Tûnchu nangni nankhenga khana Benjamin nang inum nahmit in kei Joseph khet eng kae ti nanhmu jo eng.

¹³Egypt ram hin kei heituk a ratha kanei jo, kapa hneng vahri pek ruh khana heirakip nantahmu hei chungchânga vamanthei ruh. Khana inrang ruh, hin heiṭhōi ruh,” ati.

¹⁴Akut azera anaipa Benjamin akakōa kaṭap jo. Benjamin inum ama akakōa kaṭap jo.

¹⁵Khanga aṭap pum a a-uhei inkha-khat a amajôp jo hei. Khava sōa a-u anai he’n ama anle’nbek pui jo.

¹⁶Joseph u leh naihei hong tlungna ṭongsōk hi reng-innpuia anleithei pha, rengpa leh aṭōnpui karônhei kha le’npâk hei.

¹⁷Rengpa’n Joseph hneng, “Na-u nanaihei hneng hri roh, anranhei phur rôn sik intluk hei sona Canaana inle hei rasoh.

¹⁸Anpa leh an-innshung injongsōt hei sona hin hong inle hei rasoh. Ke’n anhnenga Egypt ram shunga ram kaṭhapen kha kapek sik hei, anhringna sik inhleihêra anchen sik,” ati.

¹⁹Annuhmeihei leh ansahei khana anpa heiṭhōina sik a intôrna gâri Egypt a inphut anchoina sik a manthei heiroh.

²⁰Anneinâk antadahlon hei sik a anmalung mandong sik changmak, Egypt ram a ka-om akaṭhapen ram kha antâ akachang sik kae,” ati.

²¹A’nhri kapōa Jacob sapa he’n anleitlo jo. Rengpa ṭongpek dungjuia Joseph in gâri apek jo hei khana anhlam hrona sik bu amantluk pek jo hei.

²²Anmani inkha-khat pōn leh der inthlengna sik apek hei; tâk Benjamin chu dangka 300 leh pōn leh der inthlengna 5 apeksa a kae.

²³Apa sik a Egypt a a’nhmu neinâk kaṭhapen shakōrtung 10 phur leh sâng, buhlom leh alak hlam hrona sâk thei shakōrtung 10 tarôn aleitir pek jo.

²⁴Ama’n a-u anaihei kha atir jo hei khana anmani ansesōt pha anhnenga, “Nangni hlam a innâk-inse tlomak ruh no,” ati hei.

²⁵Egypt andahlona Canaan ram inle jo hei.

²⁶Anpa hneng, “Joseph tûn katlung lakahring. Egypt pumpui vaikarôn kae,” antipek. Jacob malung kha inhmak banna, leitaksen tor mak a kae.

²⁷Tâk-kha Joseph in anhnenga ahri rakip kha anhri pek pha, ama Egypt a ṭhōina sik a Joseph tahei tir pek gâri kha ahmu pha, aratha hong kahrok jo.

²⁸Ama’n, “Kasapa Joseph tûn kapha alakahring nu! Kei tader sik kha hivahin katluk hrep jo! Kei kase nger sik eng, kathi mak hma kava inhmupui sik,” ati.