Read Komrem A’NPHUTNA 49 Bible Online

A’NPHUTNA 49 - Komrem bible

A’NPHUTNA 49

¹Jacob in asahei abek heia anhnenga, “Kakimvea hei intûppet ruh, nanchunga ahong kasōk sik hei kha hripek chei rong:

²“Jacob sahei nankhenga hong ruh, varangei ruh. Nanpa Israel ṭonghri varangei ruh.

³“Kasa upapen, Reuben, nang karatha neilaia kamatet che kae Pui kahong tluklaia kasa upapen che kae, Kasa rakip kâra a’nlensak leh ratha kaneipen che kha kae.

⁴Nang chu tuilen inhnak kapō che kae, Tâk-kha apui karônpen changmak tin che, Ajârchu nang in kanuhmei manbo kha na’nchunpui Khana napa jekhum kajana neimak che.

⁵“Simeon leh Levi hi sōpuihei kae. Anmani’n anhmangchâk hei kha innâk-insena hlam a anhmang.

⁶Anmani ṭongmarûk hrina kei invei mak ning, Anmani intûpna kei tlamak ning, Ajârchu anmani hi hnuknat a mi anthat Khana indei hōina sehratchehei antuk mankhôi hei.

⁷Anhnuk kase chunga hâksêr tlung rasoh, ajârchu khavakha ṭit ka-omhêr, Anhnuknat rei jâra hâksêr tlung rasoh, ajârchu khavakha kakhôk hêr. Ke’n anmani Israel ram pumpuia kakathek kachek sik hei. Ke’n anmani anmihei kâra kaman chek-chai sik hei.

⁸“Judah, nang chu nasōpui he’n anmanpâk sik che. Nakadōihei anhrak a nasur hei. Nasōpui he’n na-ângkunga inkun sik hei.

⁹Judah chu shabakkai kapō kae, Athat sik kha avathat khana akhura hong inle Inthlōnga kaje Tûte inkhat in kachok ngammak hei.

¹⁰Judah’n reng tîngpum amatu sik, Khana asōn apâr he’n ahei tik a vai anrôn sik. Jât-hlop he’n kajana anhongpek sik Khana aṭong juina a-âng kunga inkun sik hei.

¹¹Ama’n ashakōrtung kha vomhrui kunga akhit, Vomhrui kung akaṭhapenna khan. Apōnhei kha thisen kapō ju vânga asôp hei.

¹²Ahmit-hei kha ju a-in reia thisen kapōa hong kasen, Aha hei kha sene a-in reia hongkachek hei.

¹³“Zebulun chu tui-ôngpui panga ka-om sik. A-omna tuipang kha rakōnghei ṭhumhmun kachang sik. Aram hōm kha Sidon katlung kachang sik.

¹⁴“Isaachar chu aphur rônna tinbu hei kâra inbok ran, Shakōrtung kanek a ṭhadet mak ning.

¹⁵Tâk-kha a’nhngana hmun khachu kaṭha Khana aram kha madu ka-om ti chu amanhret. Khava jâra aṭhōm amadoa phur rôn sik a intluk Khana sōk kapōa ṭōn anmantlo.

¹⁶“Dan chu amihei sik vaikarôn a’nṭang sik kae. Anmani chu Israel phunglak-hei kapō kachang sik hei.

¹⁷Dan hi hlampanga mari ka-ang sik Kehlam panga tûr kaneitak mari ka-ang sik, Khana khan shakor kemasek amachuk pek a Akachōngpa kha kahnungting ahlon mathlâk sik.

¹⁸“RŌNGPU nahuk sōtna kha kahngâk kae.

¹⁹“Gad chu mikachom he’n anbuhlu sik, Tâk-kha ama’n ahmai amahea ahnong sik hei.

²⁰“Asher ram chu sâk leh in katamtak kasōk sik. Rengpa sâk rahōi kasōk kha ama’n apek sik.

²¹“Naphtali chu aning ahnōma akatlân, lungset ka-om tak ate dông kanei shakhi kae.

²²“Joseph hi tuiripût hnenga ram shakōrtung kapō kae, Hmebung sîra shakōrtungte kapō kae.

²³Aka-en inda he’n ṭit ka-om tak a anbuhlu Khana anthe leh sai vâng anhnong.

²⁴Tâk-kha asai chu akam ṭhak sik, Khana abân ratha hei khachu Jacob Pathen Akahratpen ratha khan, Israelhei Kahrungpa, Kemōng kakhempa khan amanhret pek sik.

²⁵Nankabôm kha Nanpa Pathen kae, Nanvâng kapek kha Akahratpen Pathen kae, Chunga inphut khōsûrna vâng kapek, Khana ralei thōia inphut tuipûtna vâng kapek Ran leh naipang katamtak neina sik a vâng kapek,

²⁶Hmuchi leh reipârna vâng kapek, Tenlaia hmebunga inphut vângpekna hei kha, Kumleikōa hmebung heia madu ka-om neinâk-hei kha. Hiva vâng hei seng hi Joseph luchunga tlung rasoh Asōpui heia inphut ṭhensōt a ka-om ama machea chu hei rasoh.

²⁷“Benjamin chu aphik kase kahne kapō kae. Jîngkâr khōhlei athat hei khana asâk hei,” ati.

²⁸Hihei hi Israel phung 12 hei kha kae, hivahi anpa’n asa inkha-khat hnenga mathlâna ṭong intōk intōk hrep a aleihri pek hei kha kae.

²⁹Khava sōa Jacob in asahei hneng, “Tûnchu akathi kamihei kava inchunpui sik jo hei, Hit phung Ephron hlei shunga hlungkhura khan ahre ruh,

³⁰khava Canaan ram Mamre nisōtinga Machpelah inti hmun a khan. Abraham in khava hlungkhur leh hlei kha Ephron hnenga inphut thlân sik a aleirachôk kae.

³¹Khana khan kae Abraham leh anuhmei Sarah anta leihre hei kha; Isaac leh anuhmei Rebecca anta leihre hei kha; ke’n Leah kalei hrena kha.

³²Hlei kha leh ashunga hlungkhur kha Hit-hei hnenga kalei rachôk kae. Sonna son ahre ruh,” ati.

³³Jacob asahei hneng mansena ṭong ahrisō tak leh ama inthlonga kaje nôk jo khana kathi jo.