Read Komrem A’NPHUTNA 50 Bible Online

A’NPHUTNA 50 - Komrem bible

A’NPHUTNA 50

¹Joseph in apa kalōng chunga inbok a kaṭap a ahmai amajôp pek a kae.

²Khava sōa Joseph in apa kalōng kha aṭop thei makna sik thai kano ruh tia ṭong apek hei.

³Angaia kathi kalōng thai kano sik hi ni 40 kahlut. Egypt mihe’n ni 70 ralûm andea ṭajai ansui.

⁴Ṭajaisui kha a’nchai pha Joseph in rengpa ṭōnpui karônhei hneng, “Rengpa hneng lungsettak a hiva ṭong hi amathlung pek ruh:

⁵‘Kapa khan athi sik ting ama’n Canaan ram a amantluksa thlâna khan ke’n ama kahrena sik a intepna inkhat amannei eng. Khava jâra vase eng sona kapa hi vahre rong, khan hong inle sik eng,’ ati vati ruh” tia ahri pek hei.

⁶Rengpa’n, “Naṭong leitep dungjuia se ina napa vahre roh,” tia amasôn.

⁷Khang’khan Joseph in apa kavûm sik leikase. Rengpa ṭōnpui karônhei, a-innpuia re-upahei, khana Egypt ram shunga hlamkakei rakip in Joseph kha anlei-inṭhōipui joa kae.

⁸A-innshunghei, a-u anaihei, apa innshung mi rakip ama leh inṭhōia kase hei. Goshen ram a khan nai-panghei, kemōng, kehei leh serup-hei rōk kha anleidahlon hei.

⁹Ama leh inṭhōia shakor gâri leh shakor kachōng he’m ama leh kase hei; khavakha mi katamtak rup-hei kae.

¹⁰Jordan nisōtinga Atad a savōkna saphōr hmun a anheitlung pha, pha kasôttak kare kasōk a ṭajai anleisuia kae, khana Joseph in jaidena ṭōnhlam kha ni 7 aleihmanga kae.

¹¹Atad hmun a ṭajai anta leisui kha Canaan mihe’n anhmu hei pha anmani’n, “Egypt sahe’n heituk kalûrtak a jaidena ṭōnhlam hi antahmang jo mo!” anti. Khava jâra ahmun kha Abel Mizraim tia anphō.

¹²Khang’khan Jacob sahe’n ama ṭongpek-hei kapōa anleitlo jo;

¹³an-mani’n akalōng kha Canaan ram a ankadoma khana thlân hmun sik a Abraham in Hit phung Ephron hnenga aleirachôk Mamre nisōtinga ka-om Machpelah hlungkhura ama anvûm jo.

¹⁴Joseph in apa anvûmsōa, a-u anaihei khana apa vûmna sik a alei inṭhōipui hei seng leh Egypt a hong inle jo hei.

¹⁵Anpa thisōa Joseph sōpui he’n, “Eini’n achunga ṭhatmak nileitlo rakip jâra Joseph in tûn katlung amater mea phuhlōna sik a’ntluk inne heikhonga sik?” anti.

¹⁶Khava jâra anmani’n Joseph hneng ṭong anlei mansea: “Nipa athimak hma,

¹⁷hinga der sik chea amanthei ung, ‘Lungsettak a nasōpuihei ṭhena, nachunga andik makna rangei mandam heiroh’ aleiti. Tûn napa-Pathen sōk, keini hei ṭhena arangei mandam roh,” anti. Ṭong thangkōi kha athei pha Joseph kha leikaṭap jo.

¹⁸Khava sōa asōpuihei antakkhet ahmai kunga kahong heia le’nkun heia, “Nasōk keini nahmai kunga hin ka-om ung,” anti.

¹⁹Tâk-kha Joseph in anhnenga, “Ṭitmak ruh, ke’n Pathen hmun lathleng tor mak eng?

²⁰Nangni’n kei chunga ṭhatmak nanleimantluk, tâk Pathen inchu omchen kha aleisōk jâra tuning alakahring mi katamtak hei hringkhō hrung theina sik a khavakha akaṭha ting amalet jo kae.

²¹Nantaṭit sik heite om mak. Ke’n nangni leh nansahei ka-en kaṭha sik chei,” ati. Hing’hin lungset ṭong vânga taksenna amannei heia anmalung alei manhōi pek heia kae.

²²Joseph in apa innshunghei leh Egypt a ka-om ṭhak hei; ama athi pha khan akum 110 katluk jo.

²³Ama’n Ephraim sahei leh atu hei katlunga ahmu hei. Ama’n Manasseh sapa Machir sahei kapha innshunga rahlâng manhlutna aleinei hei.

²⁴Ama’n asōpuihei hneng, “Kathina sik kahnai jo, tâk Pathen in nangni a-en kaṭha sik chei khana hiva ram a inphut Abraham, Isaac leh Jacob hneng kalûrtak a ale’ntepna ram a khan aṭhōi sik chei,” ati.

²⁵Khava sōa Joseph in amihei intepna sik a angek hei. Ama’n, “Pathen in nangni khava ram a aṭhōisōt pha chei leh kataksa hi kanchoi sik tia intep ruh,” ati hei.

²⁶Khang’khan Joseph kha akum 110 atluk a kathi jo. Anmani’n aṭop makna sik thai ankanoa kathi rakōnga anthōn jo.