Read Komrem A’NPHUTNA 9 Bible Online

A’NPHUTNA 9 - Komrem bible

A’NPHUTNA 9

¹Pathen in Noah leh asapahei vâng apek a, “Nasōn-napâr he’n raleichung pumpuia an-om theina sik sa leh nai katamtak nei ruh.

²Sha rakip, va leh nga he’n nangni anṭit sik chei. Ankhenga nangni ratha neina thōia man om jo hei kae.

³Tûn hihei hi, thingbō rōbō ka-êm hei leh inṭhōia nansâk thei sik hei; ankhenga nansamsâk sik a kapek jo chei kae.

⁴Nantasâk mak sik chu, thisen kha ataksa hme leh inṭhōia sathei mak tin chei. Ke’n kakhârna ajârchu hringna hi thisena aka-om kae.

⁵Tu mo inkhat in mi athat inchu, ama kha karâkna pek sik kae. Khana tu ran mo inkhat in mihring athat inchu khavakha thina karâkna pek sik kae.

⁶Mi inti hi Pathen lim a a’nsyem kae, khava jâra tu mo inkhat in ama kha athat jo’nchu mikathat kha’m mihlop inkhat in athat sik kae.

⁷“Raleichung pumpuia nansōn nan-pâr kasip a an-omna sik a sa leh nai katamtak nantanei nger sik kae,” ati.

⁸Pathen in Noah leh asapahei hneng ahri,

⁹“Tûn ke’n nang leh natu-nasahei hneng intepna kanei kae,

¹⁰hivahi akahring rakip, va rakip leh sha rakip, rakōnga inphut nang leh nahong sōkpui rakip hei leh intepna jo kae.

¹¹Ke’n ṭongsō hei vâng hin nang leh intepna kanei kae: akahring inti hei hi ave nôk a tuishânglen vâng that manram mak jo hei ning; tuishânglen in ralei hi manhmang mak jo ning.

¹²Nang leh akahring rakip hneng aka-om ṭhak sik jo intepna kaneipui chei kha mêrchîkna sik a,

¹³ke’n sumtuk shunga kasaisûm kada sik kae. Hivahi raleichunga kaṭongtep mêrchîkna kha kachang sik.

¹⁴Chungvân kha sumtuk in amakhu tlit a khana saisûm ahe’nlâr pha,

¹⁵ke’n nang leh ranhring rakip hneng kalei intepna, akahring rakip tuishânglen vânga that mak jo chei ning ti kha kamandonsōt sik kae.

¹⁶Sumtuk kâra saisûm kha ahong inlâr pha, ke’n khavakha ka-en sik, khana kumsôt sik a raleichunga kei leh akahring hei kâra ṭongtepna kha kamandonsōt sik.

¹⁷Khavakha ranhring rakip hnenga kaṭongtep mêrchîkna kha kae.”

¹⁸Rakōnga inphut ahong kasōk Noah sapahei khachu Shem, Hem, Japheth hei kae, (Hem kha Canaan pa kae).

¹⁹Hiva Noah sapa 3 hei hi raleichunga mi rakip pa leh puhei kae.

²⁰Hlei kathlō Noah kha vomhrui rahōn kathlō ahma kakeipen kae.

²¹Noah’n vomhrui theiju a-in jâra inrui joa pōnbōia apōn-inna kajea leika-om.

²²Canaan pa Hem in apa pōnbōia a-om kha ahmu pha kasōksōt a a-u anai 2 hei hneng aleihri pek hei.

²³Khava sōa Shem khana Japheth in pōn insedun inkhat anloa andâr katlunga anmakheia ankahnungting insôn heia pōn-inn ansora anpa pōnbōia aka-om kha anva makhu. Anpa pōnbōia aka-om kha hmu makna sik antia anhmai anmahe.

²⁴Noah aju inrui kha ahei ṭhat jo pha asapa mathlum pen leitlo pekna kha amanhret jo.

²⁵Khava jâra ama’n ati, “Canaan hâksêrna chen rasoh! A-u anaihei sōk chang rasoh.

²⁶Shem Pathen RŌNGPU manpâk a om rasoh! Canaan kha Shem sōk kachang sik.

²⁷Pathen in Japheth manpung rasoh. Asōn leh pârhei kha Shem mihei leh om hei rasoh. Canaan in Japheth sōk kachang sik.”

²⁸Tuishâng alensōa Noah kum 350 lakahring,

²⁹khana akum 950 atluk pha kathi jo.