Read Komrem SAMUEL INHNINA 1 Bible Online

SAMUEL INHNINA 1 - Komrem bible

SAMUEL INHNINA 1

¹Saul thisōa David kha Amalek-hei avatorna heia inphut hong inle jo khana Ziklag a ni 2 leikachōng.

²Ajîng kania Saul rekur a inphut rether inkhat hong katlung. Amalung inrim malârna apōnhei akei hlera alua ravut ada. David hneng kasea kajatak a raleia inkun jo.

³David in ader, “Nang khona inphut akahong che mo?” Ama’n amasôn, “Israelhei rephōra inphut ahei katlânsōt eng kae.”

⁴David in ader, “Heimo akasōk ahri pek roh.” Ama’n amasôn, “Niremi hei kha rehmun a inphut katlânsōt jo hei khana nimi katamtak he’m anthat jo hei. Saul leh asapa Jonathan kha’m anthat jo hei.”

⁵David in ader, “Saul leh Jonathan kathi kha heikhonga mo namanhret?”

⁶Ama’n amasôn, “Gilboa Tlânga kahong sōk a khan Saul kha ama kasei vânga ale’nthia akangir kha kahmu khana ahneng vena inrepuihei shakor gâri leh shakor kachōnghei heikahnai jo hei.

⁷Khava sōa, ama he’nhea anihmua anibek eng. Ke’n, “Ôk, apu!” tia kamasôn.

⁸Tu che mo tia aleider eng, ke’n Amalek mi eng kalei ti.

⁹Khava sōa ama’n, ‘Hin va-ina avathat roh, intôn inhnak hêr jo eng, akathi sik jo eng kae,’ ati.

¹⁰Khana ahnenga kase enga kathasōt jo, ajârchu raleia atlulim leh kathi sik jo ti kalei manhret. Khava sōa alu chunga inphut alenlukhu kalosōt a khana akutbâna inphut azakser kalosōtpek khana khahei kha nahnenga kahei choi jo hei kae.

¹¹David amalung a’nreng jâra apōn akeihler khana ami he’num khanga anleitlo.

¹²Saul, Jonathan, khana Rōngpu mi Israelhei sik a malung inrima, ṭajai ansuia thlai anhngōi jo, ajârchu rehmun a mi katamtak anthat jo hei.

¹³David in rether ṭong heikarônpa hneng ader, “Nang khona inphut che mo?” Ama’n amasôn, “Kei Amalek mi eng kae tâk nanram shunga ka-om eng.”

¹⁴David in amasôn, “RŌNGPU takadeisōt reng kha heikhonga mo nathat ngam?”

¹⁵Khava sōa David in ami inkhat abek a, “Ama hi that roh,” ati. Mipa khan Amalek mi kha avōk a thina theia intôn jo,

¹⁶khana David in Amalek mipa hneng ati, “Hivahi nabinga nahei rôn sōt kae. RŌNGPU’n reng sik a akadeisōt jo mi nathat kha nabinga kahnōm chea kae.”

¹⁷David in Saul leh asapa Jonathan chunga hiva ṭajai suina hi aleisak,

¹⁸hivahi Judah mihei hneng mantheina sik a ṭong apek hei. (Hivahi Jashar lekharabu a insun.)

¹⁹“Israel tlâng heia kanhlam kakei kathihei! Kanremi kahrângpen hei kapûr jo hei!

²⁰Gath khōshunga achangmak leh Ashkelon hlamdunga phôngsōt mak ruh. Philisti nuhmeihei inpâkna manchang mak ruh; pathen ka-ôimak sanuhei hōina mannei mak hei ruh.

²¹“Gilboa tlâng heia khōtui achangmak leh radaitui tlamak rasoh; ahleihei kha ahei tik a ram inhrong chang rasoh! Ajârchu mikahrâng hei pho hei kha hme kasetak a khana khan inhlon inthla jo hei; Saul pho kha thai innojen mak jo.

²²Jonathan sai kha thinathei kae, Saul chemjâm kha lungsetna kase kae, akahrat hei atuk maphûr hei, inrepuihei athat hei.

²³“Saul leh Jonathan hei, inlak-hei, lungset ka-om hei; kahringsōm hei, kathisōm hei; Hmuvânlai kanek a kayâng hei, shabakkai kanek a kahrat hei.

²⁴“Israel nuhmeihei, Saul sik a inrim ruh! Ama’n pōnsen lâr kaṭha vâng amansi chei khana hlung mankatam hei leh sana vâng amanret chei.

²⁵“Remi kahrânghei kha kapûr jo hei; rehmun a anthat jo hei. Jonathan kha tlâng chunga kathia intehlon jo.

²⁶“Sōpui Jonathan, nang sik a inrim eng; heituk a kalungset che mo! Nalungsetna eng kha heituk a a’nlak jo mo, nuhmeihei lungsetna kanek a inshâng jôk.

²⁷“Remi kahrânghei kapûr jo hei, anhmangchâk hei andahlon jo hei khana hmangna kase kachang jo hei.”