Read Komrem SAMUEL INHNINA 10 Bible Online

SAMUEL INHNINA 10 - Komrem bible

SAMUEL INHNINA 10

¹Pha bongkhat sōa Ammon rengpa Nahash kathi jo, asapa Hanun in reng hongkachang jo.

²Rn David in ati, “Apa Nahash in aleitlo kapō enga, asapa Hanun chunga ṭhōn maritna kanei sik.” Khava jâra David in ṭongkarôn mi atir heia alungsetna amalâra kae. Anmani Ammon khō antlung jo pha,

³Ammon hlamkakei he’n rengpa hneng anti, “David in lungsetna ṭong kahri sik a mi ahei tir hei hi, napa kajana kae tia namandon mo? Kha changmak! Eini hlōna sik a khōpui ka-en inthlip sik mi ahei tir hei kae.”

⁴Hanun in David ṭongkarônhei kha asur jo hei, anhnerhme aṭimkhat avo pek heia, ankahnung tinga anzakkō hmor a-eptan pek heia, atir jo hei.

⁵Inna anhe’nle sik kha inzak hranghra jo hei. David in omchen kasōk kha athei pha, anmani kha anhnerhme aseimak kârseng anhe’nle makna sik Jerichoa an-omna sik a ṭong atir jo.

⁶Ammon he’n David kha indōipui inkhat a ansyem jo, khava jâra Bethrehob leh Joba ram a Syria remi 20,000, Tob ram a 12,000 khana Maacah rengpa hnenga 1,000 anleinêk hei.

⁷David in athei joa, remi rakip leh Joab kha atir jo.

⁸Ammonhei kha hong intôrsōt heia, ankhōpui kalenpen Rabbah hlutna khan inrin a ka-om jo hei, alakseng, Syriahei leh Tob a leh Maacah a mihei chu ramhânga inrin a ka-om hei.

⁹Joab in ankahnungting leh anhmating anta heibuhlu sik a ahmua, Israel remi kathem pen akadeisōt heia Syria intongting ada hei.

¹⁰A’nhleiseng kha asōpuipa Abishai hlamkeina thōia Ammonhei kahnget a ada hei.

¹¹Joab in ahnenga ati, “Syria he’n antor jo eng inchu hong ina ava’nthōpui roh, khana Ammon he’n antor che’nchu akahong enga kava’nthōpui sik che.

¹²Ratha kahrat leh akahrâng chang roh! Nimihei sik leh ni-Pathen khōpuihei sik a inhnaktak a re tuk rih. Khana RŌNGPU lungdo kha intlo rasoh!”

¹³Joab leh ami he’n re kasō sik a anhma annam jo, Syriahei kha katlân jo hei.

¹⁴Ammon he’n Syriahei tlânsōt kha anhmu pha, Abishai a inphut katlânsōt heia khōpui shungting inle jo hei. Khava jâra Joab kha Ammonhei leh an-intukna inphut hong inlea Jerusalem ting kase jo.

¹⁵Israel he’n antor jo ung ti kha Syria he’n ani’nhret a anloirup rakip anbek mantûp jo hei.

¹⁶Hadadezer rengpa’n Euphrates tuidung nisōtinga aka-om Syriahei kabek sik a mi atir hei, Zoba a ka-om Hadadezer rengpa rehlam kakei Shobach hlamkeina hnōia Helam a kava jo hei.

¹⁷David in athei pha, Israel remihei amantûp hei, Jordan tuidung re kakea Syriahei re inrin a Helam ting anjōn jo. Re intuk anphut jo,

¹⁸Israel he’n Syria remihei kha anhnong male jo hei. David leh ami he’n Syria shakor gâri katôr 700 leh shakor remi 40,000 anthat jo hei, khana ankadōi rehlam kakei Shobach um antôn masuk a rehmun a kathi jo.

¹⁹Hadadezer thōia aleika-om reng he’n Israel in antor jo me ti ani’nhret pha, anmani leh inchamna antloa anram mi kachang jo hei. Khava jâra Syria he’n Ammonhei kha abân inthōpui nôk sik kaṭi jo hei.