Read Komrem SAMUEL INHNINA 11 Bible Online

SAMUEL INHNINA 11 - Komrem bible

SAMUEL INHNINA 11

¹Akum nôk a zerthla renghei anngaia re katlo ansesōt ri pha, David in Joab leh aṭōn karônhei khana Israel remihei kha atir jo hei; Ammonhei kha antor heia Rabbah khōpui kha anhlō jo. Tâk David chu Jerusalema leika-om.

²Ni khat, sûnṭim inhesōa, David ajekhuma inphut kathōisōt a areng innphu chunga kakea kae. Chungting aketou pum a, nuhmei inkhat a’nsi ahmu jo. Amanu kha ahme kaṭha hêr.

³Khava jâra tu mo kae manhretna sik tirle inkhat atira, amanu kha Hit mi Uriah nuhmei Eliam sanu Bathsheba kae tia amanhret jo.

⁴David in amanu kaṭhōi sik mi atir hei, amanu anheiṭhōia David in hmun a’nchunpui jo. (Amanu athla apōn ka-om alachaibi kae.) Khava sōa amanu a-innting inle jo

⁵Hnunga chu anaivon aheimanhret joa David hneng akahri sik a mi inkhat atir jo.

⁶David in Joab hneng ṭongkarôn inkhat atira, “Hit mi Uriah kha kahnenga heitir roh,” ati. Khava jâra Joab in Uriah kha David hneng atir jo.

⁷Uriah aheitlung pha, Joab leh asap-hei akadam hei mo, heikhonga mo re tuk kha akase inthla tia David in ahnenga ader jo.

⁸Khava sōa ama’n Uriah hneng, “Inna se ina pha bongkhat va’nhnga roh,” ati. Uriah kase jo, David in a-inna sik kutchoi atir jo.

⁹Tâk Uriah kha inna vase mak jo; khava kanek a reng-innpui kekot a reng kahngâk-hei leh kareksap jo.

¹⁰David in Uriah kha inna semak ti ṭong athei pha ahnenga ader, “Pha kasôttak vânga sesōtna inphut ahon’lelim che kae; heisa mo inna akase mak che?”

¹¹Uriah’n amasôn, “Israel leh Judah he’n re katuk sik a kasesōt hei, Ṭongtep Bôm kha an-ompui; kahlam kakei Joab leh aṭōn karônhei kha ramhânga rephōra ka-om hei. Ke’n heikhong mo kasâk ka-inna kanuhmei leh akaje sik eng? Khavakha akhôk jâra khan, ke’n khang khava ṭōn kha tlotor hêrmak ning tia a’ntep eng kae!”

¹²David in ati, “Khan chu tuning chu hin inhnga jo roh, ajîng kania katir male sik jo che.” Khava jâra Uriah kha khava ning leh ajîng kania Jerusalema ka-om jo.

¹³David in bu kasâk sik abek a ju amanrui jo. Tâk khava ning jân nôk a’m inna semak jo; se kanek a reng-innpui kot kahngâk-hei innden shunga akampor a’nsia kaje jo.

¹⁴Abân jîngkâra David in Joab sik a chithi inkhat amazet a Uriah kha amanchoi.

¹⁵Hinga amazet, “Uriah hi retlo inhnakna hmun a hmakakeia manṭang roh, heidahlon ina, manthat jo hei roh.”

¹⁶Khava jâra Joab in khōpui kha akekhumlai, ankadōihei ratha hratna amanhretna hmuntak a Uriah kha atir jo.

¹⁷Khōpuia inphut inrepuihei kha kasōk heia Joab sepeihei leh intuk jo hei; David ṭōnkarôn ṭhahrep leh Uriah kha anthat jo hei.

¹⁸Khava sōa Joab in re chungchânga thangkakōi sik David hneng mi atir jo,

¹⁹ṭong karônpa hnenga amanthei, “Re intuk omdân rakip kha rengpa hneng nahrisō pha,

²⁰ahnuk hongkana a ader thei che. ‘Heisik a mo anmani re katuk sik a khōpui hnengtak akase chei? Kurpui banga inphut thepui anheikâp sik ti manhret mak chei mo?

²¹Gideon sapa Abimelech kha heikhong mo antathat mandonsōt mak chei mo? Nuhmei inkhat in kurpui banga inphut chakri hlung inkhat amathlâk a athat kha Thebez hmun a kae. Achang inchu, heisik a mo kurbang kha nanta vahnai ret?’ Hinga rengpa’n aderche’nchu, ‘Naṭōn karôn Uriah kha’m anthatsa jo,’ tia manthei roh.’”

²²Khana ṭong karônpa kha David hneng kasea Joab in hri sik a ṭong apek hei kha ahri pek jo.

²³Ama’n, “Niinrepuihei kha eini nek a kahrat det hei khana khōpuia inphut ramhânga re katuk sik a heikasōk hei, tâk khōpui sōngkot katlunga kanhnong male heia kae.

²⁴Khana kurbanga inphut the vâng anheikâp unga Reng Kalûr, naṭōn karôn ṭhahrep anthat jo hei; naṭōn karôn Uriah kha’m anthatsa jo.”

²⁵David in ṭong karônpa hneng ati, “Joab kha malung ngarna pek roh amalung amandong makna sik hripek roh, rea tu mo akathi sik ti hi nang in hri tor mak che. Re inhnaktak a tloa khōpui kha hlōna sik a manthei roh.”

²⁶Bathsheba’n apuise kathi jo ti ṭong athei pha, apuise sik a ṭajai asui jo.

²⁷Ajaide kha a’nchai pha, David in amanu kha reng-innpuia ahongna sik a mi atir jo; amanu kha anuhmei kachang joa sapa inkhat anei jo. Tâk-kha RŌNGPU’n David ṭōntlo chunga amalung tlaimak jo.